يزرايلدە ءۇش اۆتوبۋس جارىلدى. وقيعا تەل-ءاۆيۆتىڭ وڭتۇستىگىندەگى بات-يام قالاسىندا بولدى. بۇل تۋرالى ۆۆس جازدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، بيلىك تەراكت بولۋى مۇمكىن دەپ تەرگەۋدە.
الدىن الا مالىمەت بويىنشا، زارداپ شەككەندەر جوق.
سونىمەن قاتار، تاعى ەكى اۆتوبۋستان جارىلعىش قۇرىلعى تابىلعان.
يزرايل باق-تارى كولىك ءمينيسترى ميري رەگەۆتىڭ ءاربىر كولىكتە جارىلعىش زات بار-جوعىن تەكسەرۋ ءۇشىن بارلىق اۆتوبۋستار مەن تەمىرجول قوزعالىسىن توقتاتۋعا بۇيرىق بەرگەنىن حابارلادى.
پوليتسيا وكىلى اري دورون 12-ارناعا پوليتسيانىڭ ايماقتى تەكسەرۋدى جالعاستىرىپ جاتقانىن جانە جۇرتشىلىق كەز كەلگەن كۇدىكتى پاكەتتەر مەن زاتتارعا نازار اۋدارۋعا ءتيىس ەكەنىن ايتتى.
“قۋانىشىمىزعا وراي لاڭكەستەر تايمەردى دۇرىس ەمەس ۋاقىتقا ورناتقان بولۋى مۇمكىن. بىراق باعا بەرۋگە ءالى ەرتە”، دەدى ول.
الەۋمەتتىك جەلىدە جاريالانعان كادرلاردا كەم دەگەندە ءبىر اۆتوبۋستىڭ ورتەنىپ جاتقانى، ودان ءتۇتىن شىققانىن كورۋگە بولادى.
جەرگىلىكتى باق-تىڭ حابارلاۋىنشا، جارىلماعان 5 كەلى جقا-نىڭ بىرىندە يزرايل كۇشتەرى جۋىردا لاڭكەستىككە قارسى وپەراتسيا جۇرگىزگەن باتىس شەريادا «تۋلكارم ءۇشىن كەك» دەگەن جازۋ بار.
قورعانىس ءمينيسترى يسراەل كاتس باتىس جاعالاۋداعى بوسقىندار لاگەرلەرىندەگى وپەراتسيالاردىڭ «قارقىندىلىعىن ارتتىرۋعا» بۇيرىق بەرگەنىن ايتتى.
پرەمەر-مينيستر بينيامين نەتانياحۋ كەڭسەسى تاراتقان مالىمدەمەدە پرەمەر-ءمينيستردىڭ وقيعا تۋرالى حاباردار ەتىلگەنى ايتىلعان.
بيلىك حالىقتى بات-يامعا بارماۋعا جانە كۇدىكتى زاتتار تابىلعان جاعدايدا قىراعى بولۋعا شاقىرادى.
