26 ناۋرىزعا قاراعان ءتۇنى قازاقستان مەن ليحتەنشتەين ۇلتتىق قۇرامالارى 2026 جىلعى الەم چەمپيوناتىنىڭ ىرىكتەۋ كەزەڭىندەگى ەكىنشى ماتچىن وتكىزىپ، قازاقستان قۇراماسى جەڭىسكە جەتتى، دەپ حابارلايدى "ادىرنا" ۇلتتىق پورتالى.
كەزدەسۋ ليحتەنشتەين استاناسى ۆادۋتس قالاسىنداعى «راينپارك» ستاديونىندا ءوتتى.
قازاقستان ۇلتتىق قۇراماسىنىڭ باس باپكەرىنىڭ مىندەتىن اتقارۋشى ءالي اليەۆ كوماندا قۇرامىنا بىرقاتار وزگەرىس ەنگىزىپ، العاش رەت 16 جاستاعى جۇلدىز داستان ساتپاەۆقا نەگىزگى قۇرامدا الاڭعا شىعۋعا مۇمكىندىك بەردى.
ويىن 2:0 ەسەبىمەن قازاقستان قۇراماسىنىڭ پايداسىنا اياقتالدى.
ەسەپتى ءبىرىنشى تايمنىڭ سوڭىندا ماكسيم سامورودوۆ اشتى. بۇل – ونىڭ قازاقستان قۇراماسىنداعى ءتورتىنشى گولى.
ال قوسىمشا ۋاقىتتا 34 جاستاعى الەكساندر ماروچكين گول سوقتى. بۇل – ونىڭ ۇلتتىق قۇراما ساپىنداعى 51-ماتچى جانە العاشقى گولى.
2026 جىلعى الەم چەمپيوناتىنىڭ العاشقى ىرىكتەۋ ماتچىندا قازاقستان قۇراماسى ۋەلسكە 1:3 ەسەبىمەن جول بەردى. ليحتەنشتەينمەن وتكەن كەزدەسۋگە دەيىن قازاقستان قۇراماسى الەم چەمپيوناتىنىڭ ىرىكتەۋ كەزەڭدەرىندە قاتارىنان 22 ماتچ بويى جەڭىسكە جەتە الماعان ەدى.
