قىزىلوردادا شاڭىراقتىڭ شىرايىن كىرگىزىپ، وتباسىلىق قۇندىلىقتاردى دارىپتەگەن ونەگەلى جانۇيالار ماراپات بيىگىنەن كورىندى. "مەرەيلى وتباسى" ۇلتتىق بايقاۋىنا قاتىسقان ۇلگىلى وتباسىلاردىڭ قاتارى تاعى دا تولىقتى. بيىلدىڭ وزىندە بايقاۋعا 1700-گە جۋىق وتباسى ءوتىنىم بەرىپ، ونىڭ 178-ءى قاتىسۋعا جولداما العان. بۇگىن «دوستىق» ۇيىندە ۇلتتىق بايقاۋدىڭ وبلىستىق جەڭىمپازدارىن ماراپاتتاۋ سالتاناتى ءوتتى.
وبلىس اكىمى نۇرلىبەك نالىباەۆ جەڭىمپازداردى قۇتتىقتاپ، ەلىمىزدە وتباسى ينستيتۋتى ارقاشان ەرەكشە قۇرمەت پەن قولداۋعا يە بولاتىنىن جەتكىزىپ، شاڭىراقتىڭ ءتۇتىنىن ءتۇزۋ ۇشىرىپ، وتباسىنا بەرەكە سىيلاعان جانۇيالارعا قۇرمەت كورسەتتى.
— قازاق حالقى ءۇشىن وتباسى – قاسيەتتى ۇعىم، قاستەرلى قۇندىلىق. وتباسىنىڭ بىرلىگى – وتاننىڭ بەرىكتىگى، اعايىننىڭ تاتۋلىعى – اتامەكەننىڭ تۇتاستىعى، ۇلتتىق تاربيەنىڭ، ادامگەرشىلىك پەن يماندىلىقتىڭ باستاۋ بۇلاعى. مەملەكەت باسشىسى قاسىم-جومارت كەمەلۇلى توقاەۆ «ءاربىر وتباسىن ساقتاۋ – وتانىمىزدىڭ بەرىك بولۋىنىڭ كەپىلى. ولاردىڭ ارقايسىسىنا تۇتاستىق پەن تاتۋلىقتىڭ ءداستۇرىن ورنىقتىرۋىمىز كەرەك»، - دەپ ايتقان بولاتىن.
2014 جىلدان باستاۋ العان «مەرەيلى وتباسى» ۇلتتىق كونكۋرسى وتباسى قۇندىلىقتارى مەن قازاق ءۇشىن قاشاندا كيەلى سانالاتىن ءبىر شاڭىراق استىندا بەرەكەلى ءومىر ءسۇرۋدىڭ ماڭىزدىلىعىن ناسيحاتتاۋدا ورنى ەرەكشە، تاعىلىمدى شارا. بۇل بايقاۋعا قاتىسقان وتباسىلاردىڭ بارلىعى دا – ناعىز مەرەيلى جەڭىمپازدار، - دەدى ايماق باسشىسى ن.نالىباەۆ.
«مەرەيلى وتباسى» ۇلتتىق كونكۋرسىنىڭ وبلىستىق ىرىكتەۋ كەزەڭىنىڭ قورىتىندىسى بويىنشا جالاعاشتىق ماشتاەۆتار وتباسى جۇلدەلى ءىىى ورىندى، شيەلى اۋدانىنان قاتىسقان رىسپەمبەتوۆتەر اۋلەتى جۇلدەلى ءىى ورىندى يەلەندى. جۇلدەلى ءى ورىنعا قىزىلوردا قالاسىنىڭ ەرمانوۆتار وتباسى ءى ورىن يەمدەنسە، شيەلىلىك بايجانوۆتار وتباسى باس جۇلدەگە لايىق دەپ تانىلىپ، ەلورداداعى رەسپۋبليكالىق سايىسقا ءوڭىر اتىنان جولداما الدى.
وبلىس اكىمى نۇرلىبەك ماشبەكۇلى جەڭىمپاز اتانعان وتباسىلارعا باعالى سىيلىقتار مەن ارنايى ديپلومدار تابىستادى.
سونداي-اق، بايقاۋعا بەلسەندى قاتىسىپ، ۇلتتىق قۇندىلىق پەن وتباسى مەرەيىن جوعارىلاتۋ باعىتىنداعى ونەگەسىن كورسەتە بىلگەن وتباسىلار ارنايى نوميناتسيالارمەن ماراپاتتالدى. اتاپ ايتقاندا، قازالىلىق سۇلەيمەنوۆتەر اۋلەتى «ونەرلى وتباسى»، قارماقشىلىق بەردىباەۆتار جانۇياسى «ونەگەلى وتباسى»، قارماقشىلىق شامشاتوۆتار اۋلەتى «ۇلگىلى وتباسى»، جالاعاشتىق بەكنيازوۆتار شاڭىراعى «بەرەكەلى وتباسى»، ارالدىق سىدىقوۆتار اۋلەتى «تالانت تۇعىرى وتباسى»، سىرداريالىق ەسەنحوجاەۆتار اۋلەتى «وزات وتباسى»، جاڭاقورعاندىق تولەگەنوۆتەر جانۇياسى «تولاعايلار وتباسى» نوميناتسيالارىمەن جانە ارنايى جۇلدە قورىمەن ماراپاتتالدى.
سالتاناتتى جيىندا قازاقستاننىڭ ەڭبەك سىڭىرگەن ءارتىسى كۇلان قالىمبەتوۆا، قر مادەنيەت قايراتكەرى، جىراۋ رۋسلان احمەتوۆ پەن ونىڭ شاكىرتتەرى جانە «رەۆەرانس» بي توبى ونەر كورسەتىپ، ونەگەلى وتباسىلارعا قۇرمەت سەزىمىن انمەن جەتكىزدى.
