مەملەكەتتىك حاتشى ءبىر جىل بۇرىن قازاقستاندا اۋىل اكىمدەرىن تىكەلەي سايلاۋ تەتىگى جۇمىس ىستەي باستاعانىن ەسكە سالدى. ماسەلەن، وتكەن جىلدىڭ شىلدە ايىنان بەرى 1093 اۋىلدىق ەلدى مەكەننىڭ باسشىسى سايلاندى، دەپ جازادى "ادىرنا" ۇلتتىق پورتالى.
«ولاردىڭ 215-ءى ءوزىن-ءوزى ۇسىنعاندار، جاڭادان سايلانعانداردىڭ 116-سى ايەل ادامدار»، - دەدى ول.
قارين اۋىل اكىمدەرىنىڭ كورپۋسى 55,6%-عا جاڭارتىلعانىن، بۇل 608 جاڭا اۋىل باسشىسى دەگەندى قوستى. ونىڭ ايتۋىنشا، ولاردىڭ ايتارلىقتاي بولىگى بۇرىن مەملەكەتتىك قىزمەتتە جۇمىس ىستەمەگەن. اۋىل تۇرعىندارىنىڭ قولداۋىن مۇعالىمدەر، دارىگەرلەر، كاسىپكەرلەر، جەرگىلىكتى كاسىپورىندار مەن شارۋا قوجالىقتارىنىڭ باسشىلارى الدى.
جاڭا اكىمدەردىڭ باسىم بولىگى ماڭعىستاۋ – 77,8% (18-ءنىڭ 14-ءى), قاراعاندى – 77,2% (79-دىڭ 61-ءى) جانە جامبىل – 71% (72-ءنىڭ 51-ءى) وبلىستارىندا.
سونداي-اق، وسى جەكسەنبى، 31 شىلدەدە 27 اۋىلدىق وكرۋگتە سايلاۋ وتەتىنى بەلگىلى بولدى. ال جىل سوڭىنا دەيىن تاعى 214 اۋىل باسشىسى سايلانادى.
1037 اۋىلدىق وكرۋگتە سايلاۋ 2023 جانە 2024 جىلدارعا بەلگىلەنگەن.
سونداي-اق الداعى ۋاقىتتا اۋدان اكىمدەرىنىڭ تىكەلەي سايلاۋىن وتكىزۋ جوسپارلانۋدا.
سونىمەن قاتار، جاڭا كونستيتۋتسيالىق رەفورماعا سايكەس، بۇگىن وبلىس اكىمدەرى وبلىس ءماسليحاتتارى دەپۋتاتتارىنىڭ داۋىس بەرۋ قورىتىندىسى بويىنشا تاعايىندالادى.
«وسىلايشا، ەلىمىزدىڭ ساياسي جۇيەسى دايەكتى تۇردە قايتا قۇرىلۋدا، مەملەكەتتىك باسقارۋعا دەموكراتيانىڭ جاڭا قۇرالدارى ەنگىزىلۋدە»، - دەپ تۇيىندەدى مەملەكەتتىك حاتشى.
"ادىرنا" ۇلتتىق پورتالى
