2022 جىلعى 28 شىلدەدە «قازمۇنايگاز» ۇك اق باسقارما توراعاسى ماعزۇم مىرزاعاليەۆ اتىراۋ مۇناي وڭدەۋ زاۋىتىندا بولىپ، قالپىنا كەلتىرۋ جۇمىستارىنىڭ بارىسىمەن تانىستى.
قازىرگى ۋاقىتتا اتىراۋ ءموز ديناميكالىق جابدىقتار مەن قوندىرعىلاردى كەزەڭ-كەزەڭىمەن ىسكە قوسۋ جۇرگىزىلۋدە.
م.مىرزاعاليەۆ كاسىپورىن باسشىلىعىنا قىسقا مەرزىمدە ىسكە قوسۋ-رەتتەۋ جۇمىستارىن اياقتاۋدى، جابدىقتىڭ جۇمىسقا قابىلەتتىلىگىن قالپىنا كەلتىرۋدى جانە تۇتىنۋشىلارعا قورلاردان مۇناي ونىمدەرىن جونەلتۋدى جالعاستىرۋدى تاپسىردى. سونىمەن قاتار، شتاتتان تىس جاعدايلاردىڭ قاۋپىن ودان ءارى ازايتۋ ءۇشىن قاجەتتى جۇمىستاردى جۇرگىزۋ قاجەتتىگىن اتاپ ءوتتى.
«قازىرگى ۋاقىتتا زاۋىتتا ىسكە قوسۋ-رەتتەۋ شارالارى جالعاسۋدا، تەحنولوگيالىق وبەكتىلەردىڭ جۇمىسىن كەزەڭ-كەزەڭىمەن قالپىنا كەلتىرۋ، جابدىقتى مۇناي ونىمدەرى مەن كاتاليزاتوردان تازارتۋ جۇمىستارى جۇرگىزىلۋدە. بۇل جۇمىستارعا تاۋلىك بويى 250-گە جۋىق جۇمىسشى تارتىلعان. بۇگىنگى تاڭدا بىزدە 26 مىڭ توننا بەنزين، 22 مىڭ توننا ديزەل وتىنى، ءتورت مىڭ توننا كەروسين بار. بەنزين مەن ديزەل وتىنىن تۇتىنۋشىلارعا جەتكىزۋ 5-6 كۇنگە، كەروسين ءبىر اپتاعا جەتەدى»، - دەپ باياندادى ءاموز باس ديرەكتورى مۇرات دوسمۇراتوۆ.
قازىرگى ۋاقىتتا اتىراۋ ءموز ەلەكترمەن جابدىقتاۋ قالپىنا كەلتىرىلدى. شيكىزاتتى وڭدەۋدى باستاۋ 28 شىلدە كۇنى كەشكە جوسپارلانعان.
