اتىراۋ قالاسىنداعى ء"بىلىم-يننوۆاتسيا" ليتسەي-ينتەرناتىنىڭ تۇلەگى ريزابەك الپامىس ۇبت-دان ەڭ جوعارعى 132 بالل جينادى. بولاشاعىنا نىق سەنىممەن قارايتىن تۇلەك وڭتۇستىك كورەياداعى Ulsan National Institute of Science and Technology (UNIST) ۋنيۆەرسيتەتىنە وقۋعا ءتۇستى. بۇل تۋرالى وڭىرلىك كوممۋنيكاتسيالار قىزمەتى جازدى، دەپ حابارلايدى «ادىرنا» ءتىلشىسى.
ول سونىمەن قاتار وڭتۇستىك كورەيانىڭ ەكى الدىڭعى قاتارلى عىلىمي زەرتتەۋ جانە تەحنولوگيا ۋنيۆەرسيتەتى مەن گونكونگتاعى عىلىم جانە تەحنولوگيالار ۋنيۆەرسيتەتىنەن شاقىرتۋ العان.
تۇلەك 2021 جىلى ەۋروپالىق فيزيكا وليمپياداسىنان كۇمىس مەدال، بيىل ازيا وليمپياداسىنان قولا مەدالدى قانجىعاسىنا بايلاعان. 2021-2022 جىلدارى حالىقارالىق فيزيكا وليمپياداسىنان ەكى دۇركىن كۇمىس مەدال يەگەرى اتاندى. بيىل و.جاۋتىكوۆ اتىنداعى حالىقارالىق وليمپيادادان دا التىن مەدال يەمدەنگەن.
«ماقساتىم - جاڭا تەحنولوگيالاردى ويلاپ تابۋعا ءوز ۇلەسىمدى قوسۋ. قازاقستانداعى عىلىم مەن تەحنيكا سالاسىن دامىتۋعا ات سالىسسام دەگەن ويىم بار. بوس ۋاقىتىمدا باعدارلامالار قۇراستىرعاندى، فۋتبول ويناعاندى جاقسى كورەم. بىراق ۋاقىتىمنىڭ كوبىن عىلىممەن اينالىسۋعا ارنايمىن»،– دەيدى بولاشاق عالىم.
ايتا كەتەيىك، Ulsan National Institute of Science and Technology وقۋ ورداسى ءبىلىم دەڭگەيى بويىنشا الەمدەگى ەڭ مىقتى 200 ۋنيۆەرسيتەتتىڭ قاتارىنا كىرەدى.
