پرەزيدەنت قاسىم-جومارت توقاەۆ پرەمەر-ءمينيستردىڭ ورىنباسارى ەرالى توعجانوۆتى قابىلدادى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
مەملەكەت باسشىسىنا حالىقتىڭ تابىسىن ارتتىرۋ باعدارلاماسىنىڭ جۇزەگە اسىرىلۋ بارىسى تۋرالى مالىمەت بەرىلدى.
ەرالى توعجانوۆ قاسىم-جومارت توقاەۆقا ءبىرىنشى جارتىجىلدىقتىڭ قورىتىندىسى بويىنشا باعدارلاما شارالارى اياسىندا بيۋدجەت سالاسىنداعى 850 مىڭ قىزمەتكەردىڭ، كۆازيسەكتوردىڭ وندىرىستىك باعىتىندا جۇمىس ىستەيتىن 240 مىڭ جانە بيزنەس قۇرىلىمدارىنداعى 1,2 ميلليون ەڭبەككەردىڭ جالاقىسى وسكەنىن باياندادى.
پرەزيدەنتكە ۇكىمەتتىڭ بارلىق الەۋمەتتىك مىندەتتەمەلەردى ورىنداپ جاتقانى تۋرالى ايتىلدى. جەرگىلىكتى اتقارۋشى ورگاندارمەن بىرلەسىپ، تابىسى جوق ازاماتتاردىڭ ەكونوميكاعا الەۋمەتتىك تۇرعىدان جۇمىلدىرىلۋىنا قاتىستى كەشەندى شارالار اتقارىلىپ جاتىر. بۇل رەتتە ولارعا جۇمىس ورىندارى اشىلىپ، جاڭا كاسىپ تۇرلەرىن مەڭگەرۋ ءۇشىن بىلىكتىلىكتەرىن ارتتىرۋعا مۇمكىندىك جاسالۋدا.
پرەمەر-مينيستر ورىنباسارىنىڭ ايتۋىنشا، 2025 جىلعا دەيىنگى ينۆەستيتسيالىق جوبالاردى جۇزەگە اسىرۋ اياسىندا 2 ميلليوننان استام جۇمىس ورنىن اشۋ جوسپارلانعان. ونىڭ 444 مىڭى بيىل اشىلماق. 1 شىلدەدەگى مالىمەت بويىنشا 249 مىڭ ادام جۇمىسپەن قامتىلعان. بۇل جىلدىق جوسپاردىڭ 56 پايىزىنا سايكەس كەلەدى.
اكىمدىكتەرمەن بىرلەسىپ، وڭدەۋ ونەركاسىبى، مۇناي-گاز حيمياسى سالارىندا جانە اگرارلىق سەكتوردا 2025 جىلعا دەيىنگى ينۆەستيتسيالىق جوبالار پۋلى جاساقتالعان. بۇل تىزىمدە 266 مىڭنان استام ادامدى جۇمىسپەن قامتيتىن 847-گە جۋىق جوبا بار.
مەملەكەت باسشىسىنا «جاستار تاعىلىمداماسى» جانە «العاشقى جۇمىس ورنى» جوبالارى بويىنشا تاعىلىمدامادان ءوتۋ مەرزىمىن ۇزارتۋ، ەڭبەكاقى كولەمىن ارتتىرۋ جانە جاستاردىڭ جاڭا بيزنەس يدەيالارىن جۇزەگە اسىرۋعا بولىنەتىن گرانتتاردىڭ كولەمىن ءوسىرۋ جونىندە باياندالدى. حالىقتىڭ الەۋمەتتىك جاعدايى تومەن توپتارىنا جاتاتىن ازاماتتاردىڭ تۇراقتى تابىس تابۋى ءۇشىن جاعداي جاسالۋدا جانە ايەلدەردى جۇمىسپەن قامتۋ تەتىگى ازىرلەندى.
مەملەكەت باسشىسى حالىقتىڭ تابىسىن ارتتىرۋدىڭ ماڭىزدىلىعىن جانە مۇنىڭ ۇلتتىق جوبالاردا كوزدەلگەن ماقساتتارعا قول جەتكىزۋگە تىكەلەي بايلانىستى ەكەنىن اتاپ ءوتتى. ۇكىمەتكە اتالعان ماسەلەلەردى ەرەكشە باقىلاۋدا ۇستاۋ تاپسىرىلدى. پرەزيدەنت ازاماتتاردىڭ تابىسىن ارتتىرۋ جۇمىستارى بارلىق ورتالىق جانە جەرگىلىكتى اتقارۋ ورگاندارى ءۇشىن باستى مىندەت بولۋعا ءتيىس دەپ سانايدى.
