"ەلگە قايتارىلعان اقشاعا جاس جۇبايلارعا ارنالعان مەملەكەت مەنشىگى بولىپ تابىلاتىن، جەكەشەلەندىرۋگە جاتپايتىن ءبىر بولمەلى پاتەرلەر سالۋ كەرەك. وسىلاي ەتكەن كۇندە قازاقتىڭ سانى كوبەيەدى. جاس جۇبايلاردىڭ اجىراسۋى ازايادى. جاستار ەلىمىزدىڭ بولاشاعى. ال ەلدىڭ بولاشاعىنا اقشانى اياۋعا بولا ما؟" بۇل پىكىردى بەلگىلى مادەنيەتتانۋشى بەردالى وسپان Adyrna.kz ۇلتتىق پورتالىنىڭ تىلشىسىنە بەرگەن سۇحباتىندا ايتتى.
"ۇرلانعان اقشالار ەلگە قايتارىلىپ جاتىر" دەگەن جاقسى حاباردى ەستىدىم. ەندى سول قوماقتى قارجىنى قايدا، قالاي جۇمساۋ كەرەك دەگەن سۇراقتىڭ تۋىنداۋى زاڭدى. ءتۇرلى ويلار دا ايتىلۋدا. مەنىڭشە، بۇل قاراجاتتى بىرنەشە ماسەلەلەردى شەشۋگە جۇمساۋ ناقتى ناتيجە بەرمەيدى. سەبەبى، اقشا كوپ بولىككە بولىنەدى دە قايدا، قانشا جۇمسالعانى تۋرالى ءبىلۋ قيىنعا سوعادى جانە بۇلاي ەتكەن جاعدايدا، قاراجاتتىڭ تاعى دا ۇرلانۋ قاۋپى تۋىندايدى. ولاي بولماس ءۇشىن ەلگە قايتارىلعان اقشانى بۇكىل ەلدىڭ كوزىنە كورىنەتىن ءبىر عانا اۋقىمدى ىسكە جۇمساعان دۇرىس دەپ بىلەمىن",- دەيدى مادەنيەتتانۋشى.
بەردالى وسپان كەلەسىدەي ۇسىنىستار ايتتى:
"ەلگە قايتارىلعان اقشاعا جاس جۇبايلارعا ارنالعان مەملەكەت مەنشىگى بولىپ تابىلاتىن، جەكەشەلەندىرۋگە جاتپايتىن ءبىر بولمەلى پاتەرلەر سالۋ كەرەك. ءار جاس جۇپ ۇيلەنگەن كۇنى، نەكە قيۋ ورنىندا، رەسمي تۇردە مەملەكەتتىك ورتاق تىزىمگە تىركەلىنەدى جانە ۇيلەنۋ كۋالىگى مەن بىرگە پاتەر تىزىمىنە تىركەلگەنى تۋرالى قۇجات بەرىلەدى. پاتەردىڭ كىلتى جاس جۇبايلارعا، ولار العاشقى ءسابيىن پەرزەنتحانادان الىپ شىققان كۇنى بەرىلەدى. جاس جۇبايلار بولاشاقتا جاڭا ءۇي الا الماسا، مەملەكەت مەنشىگى بولىپ تابىلاتىن ءبىر بولمەلى پاتەردە ءومىر بويى تۇرۋعا قۇقىلى. بولاشاقتا جاس جانۇيا جاڭا ءۇي العان جاعدايدا، پاتەر مەملەكەت قاراماعىنا قايتارىلادى. بوساعان پاتەرلەر، باسقا جاس جۇبايلارعا العاشقى ءسابيىن پەرزەنتحانادان الىپ شىققان كۇنى بەرىلەدى. ەگەر جاس جۇبايلار اجىراسقان جاعدايدا، پاتەردە تۇرۋ قۇقى بالاسىمەن قالعان اناسىندا نەمەسە اكەسىندە بولادى. ءسابيلى بولماعان جاس جۇبايلارعا پاتەر بەرىلمەيدى. ەگەر جاس جۇبايلاردىڭ پاتەر العاننىن كەيىن ءسابيى شەتىنەسە، نەمەسە بالالارى باسقا دا جاعدايدا قازا بولىپ، باسقا بالالارى بولماعان جاعدايدا، ولار سول پاتەردە ارى قاراي تۇرا بەرەدى",- دەيدى بەردالى وسپان.
جوبا حالىقتىڭ قاداعالاۋىمەن ىسكە اسۋى شارت.
"بۇلاي بولۋى ءۇشىن قازاقستاننىڭ ءار ازاماتى عالامتور جۇيەسى ارقىلى، پاتەر الۋ تىزىمىنە كىمنىڭ تىركەلگەنىن، پاتەردىڭ كىمگە بەرىلگەنىن، قاي پاتەردىڭ مەملەكەت قاراماعىنا قايتارىلعانىن، قاراپ ءبىلىپ وتىرا الاتىنداي اشىق تۇردە جۇرگىزىلەدى. وسىلاي ەتكەن كۇندە قازاقتىڭ سانى كوبەيەدى. جاس جۇبايلاردىڭ اجىراسۋى ازايادى. ال قازاقتىڭ سانىنىڭ كوبەيۋى - ەلىمىزدىڭ كوركەيۋى دەگەن مەنىڭ ويىما ءبارىڭىز قوسىلاسىزدار دەگەن سەنىمدەمىن. ەندىگى جەردە ەلگە قايتارىلعان قاراجات، بۇل جوبانى ارى قاراي جالعاستىرۋعا جەتە مە دەيتىن سۇراق تۋىندايتىنىن ءبىلىپ وتىرمىن. بۇل يگى ءىس مەملەكەت تاراپىنان جالعاستىرىلۋى قاجەت. جاستار ەلىمىزدىڭ بولاشاعى. ال ەلدىڭ بولاشاعىنا اقشانى اياۋعا بولا ما؟ بۇل سۇراقتىڭ جاۋابىن وزدەرىڭىز ايتىڭىزدار",- دەپ تۇيىندەدى ءسوزىن بەردالى وسپان.
زارينا اشىربەك،
"ادىرنا" ۇلتتىق پورتالى
