"Elge qaıtarylǵan aqshaǵa jas jubaılarǵa arnalǵan memleket menshigi bolyp tabylatyn, jekeshelendirýge jatpaıtyn bir bólmeli páterler salý kerek. Osylaı etken kúnde qazaqtyń sany kóbeıedi. Jas jubaılardyń ajyrasýy azaıady. Jastar elimizdiń bolashaǵy. Al eldiń bolashaǵyna aqshany aıaýǵa bola ma?" Bul pikirdi belgili mádenıettanýshy Berdaly Ospan Adyrna.kz ulttyq portalynyń tilshisine bergen suhbatynda aıtty.
"Urlanǵan aqshalar elge qaıtarylyp jatyr" degen jaqsy habardy estidim. Endi sol qomaqty qarjyny qaıda, qalaı jumsaý kerek degen suraqtyń týyndaýy zańdy. Túrli oılar da aıtylýda. Menińshe, bul qarajatty birneshe máselelerdi sheshýge jumsaý naqty nátıje bermeıdi. Sebebi, aqsha kóp bólikke bólinedi de qaıda, qansha jumsalǵany týraly bilý qıynǵa soǵady jáne bulaı etken jaǵdaıda, qarajattyń taǵy da urlaný qaýpi týyndaıdy. Olaı bolmas úshin elge qaıtarylǵan aqshany búkil eldiń kózine kórinetin bir ǵana aýqymdy iske jumsaǵan durys dep bilemin",- deıdi mádenıettanýshy.
Berdaly Ospan kelesideı usynystar aıtty:
"Elge qaıtarylǵan aqshaǵa jas jubaılarǵa arnalǵan memleket menshigi bolyp tabylatyn, jekeshelendirýge jatpaıtyn bir bólmeli páterler salý kerek. Ár jas jup úılengen kúni, neke qııý ornynda, resmı túrde memlekettik ortaq tizimge tirkelinedi jáne úılený kýáligi men birge páter tizimine tirkelgeni týraly qujat beriledi. Páterdiń kilti jas jubaılarǵa, olar alǵashqy sábıin perzenthanadan alyp shyqqan kúni beriledi. Jas jubaılar bolashaqta jańa úı ala almasa, memleket menshigi bolyp tabylatyn bir bólmeli páterde ómir boıy turýǵa quqyly. Bolashaqta jas januıa jańa úı alǵan jaǵdaıda, páter memleket qaramaǵyna qaıtarylady. Bosaǵan páterler, basqa jas jubaılarǵa alǵashqy sábıin perzenthanadan alyp shyqqan kúni beriledi. Eger jas jubaılar ajyrasqan jaǵdaıda, páterde turý quqy balasymen qalǵan anasynda nemese ákesinde bolady. Sábıli bolmaǵan jas jubaılarǵa páter berilmeıdi. Eger jas jubaılardyń páter alǵannyn keıin sábıi shetinese, nemese balalary basqa da jaǵdaıda qaza bolyp, basqa balalary bolmaǵan jaǵdaıda, olar sol páterde ary qaraı tura beredi",- deıdi Berdaly Ospan.
Joba halyqtyń qadaǵalaýymen iske asýy shart.
"Bulaı bolýy úshin Qazaqstannyń ár azamaty ǵalamtor júıesi arqyly, páter alý tizimine kimniń tirkelgenin, páterdiń kimge berilgenin, qaı páterdiń memleket qaramaǵyna qaıtarylǵanyn, qarap bilip otyra alatyndaı ashyq túrde júrgiziledi. Osylaı etken kúnde qazaqtyń sany kóbeıedi. Jas jubaılardyń ajyrasýy azaıady. Al qazaqtyń sanynyń kóbeıýi - elimizdiń kórkeıýi degen meniń oıyma bárińiz qosylasyzdar degen senimdemin. Endigi jerde elge qaıtarylǵan qarajat, bul jobany ary qaraı jalǵastyrýǵa jete me deıtin suraq týyndaıtynyn bilip otyrmyn. Bul ıgi is memleket tarapynan jalǵastyrylýy qajet. Jastar elimizdiń bolashaǵy. Al eldiń bolashaǵyna aqshany aıaýǵa bola ma? Bul suraqtyń jaýabyn ózderińiz aıtyńyzdar",- dep túıindedi sózin Berdaly Ospan.
Zarına ÁShIRBEK,
"Adyrna" ulttyq portaly
