ۇقك سيرياداعى سوعىستا قانشا قازاقستان ازاماتىنىڭ قازا تاپقانى تۋرالى دەرەكپەن ءبولىستى.

4431
Adyrna.kz Telegram
ۇلتتىق قاۋىپسىزدىك كوميتەتىنىڭ (ۇقك) ازاتتىق اگەنتتىگىنە بەرگەن رەسمي جاۋابىنداعى دەرەك بويىنشا، سيريا مەن يراكتا سوعىس باستالعالى تاياۋ شىعىسقا 8OO -گە جۋىق قازاقستان ازاماتى كەتكەن. ولاردىڭ كوبى – بالالار.

- شىلدەدەگى جاعداي بويىنشا، سيريا مەن يراكتاعى حالىقارالىق تەرروريستىك ۇيىمداردا قازاقستاندىق 120 ەر ادام، 250-دەن استام ايەل جانە 500 كامەلەتكە تولماعان بالا بار، - دەپ جازىلعان ۇقك جاۋابىندا.

قانشا قازاقستاندىق ەلىنە ورالدى؟

استانا يراك پەن سيرياداعى سوعىستا بارلىعى قانشا قازاقستاندىقتىڭ قازا تاپقانىن بىلمەيدى. ۇلتتىق قاۋىپسىزدىك كوميتەتىندە تەك سيرياداعى حالىقارالىق تەرروريستىك ۇيىمدار جاعىندا سوعىسقان 260-تان استام قازاقستاندىقتىڭ قازا بولعانى تۋرالى مالىمەت بار.

ۇقك دەرەگى بويىنشا، قارۋلى قاقتىعىسقا زاڭسىز قاتىسقانى ءۇشىن سيريادا 60-قا جۋىق، يراكتا شامامەن 20 قازاقستان ازاماتى قاماۋدا وتىر.

استانا قازىر قۇقىق قورعاۋ جانە مەملەكەتتىك ورگاندارمەن بىرىگىپ، ۇرىس ايماقتارىنا كەتكەن قازاقستاندىقتاردى ەلگە قايتارۋ ءۇشىن جۇمىس ىستەپ جاتقانىن حابارلادى.

ۇقك دەرەگىنشە، سيرياداعى اسكەري قاقتىعىس باستالعالى 112 قازاقستاندىق (61 ەر جانە 51 ايەل) ەلگە قايتارىلعان. ال بۇدان بولەك حالىقارالىق تەرروريستىك ۇيىمداردىڭ لاگەرلەرى مەن بازالارىنان قازاقستانعا قايتارىلدى دەلىنگەن بالالاردىڭ سانى - 81.

Daily Mail باسىلىمى جاريالاعان "سيرياداعى جيھادشى قازاق بالالار" تۋرالى يم ۆيدەوسىنىڭ سكرينشوتى.

ال بيىل ناۋرىزدا ۇقك توراعاسىنىڭ ورىنباسارى نۇرعالي بىلىسبەكوۆ استاناداعى جۋرناليستەرگە ارنالعان جيىندا سيريادان 125 قازاقستاندىقتىڭ ورالعانىن، 57 ادام قاماۋدا وتىرعانىن، قالعاندارىنىڭ باقىلاۋدا ەكەنىن ايتقان.

ۇقك سوعىس ايماقتارىنان قايتىپ كەلگەن ادامداردى وڭالتۋ شارالارىن جۇزەگە اسىرىپ جاتقانىن دا مالىمدەدى. بۇل شارالار ءۇشىن قازاقستاندا وڭالتۋ ورتالىقتارى اشىلعان.

قازاقستان ازاماتتارىنىڭ سيريا مەن يراكقا كەتكەنى تۋرالى العاش رەت 2013 جىلى ايتىلا باستاعان. وسى جىلى كۇزدە يراك پەن سيرياداعى قارۋلى جانجالعا يسلامشىل راديكالدار جاعىندا قاتىسۋعا قازاقستاننان بارعان "150 جيحادشى" تۋرالى ۆيدەو تاراعان ەدى.

كەيىن تاياۋ شىعىستاعى سوعىس ايماعىندا ءجۇرىپ قازا تاپقان قازاقستاندىقتار تۋرالى اقپارات دا جيىلەگەن. ولاردىڭ كەيبىرىنىڭ ارتىندا بالا-شاعاسى قالعان. قازاقستاننان سيريا مەن يراكقا كەتكەن بالالارىن قايتارۋ ماقساتىمەن اتا-انالار كوميتەتى دە قۇرىلعان. كەي اتا-انا ءتىپتى سيرياعا بالاسىن ىزدەپ بارعانىمەن، ولاردى ەلگە قايتۋعا كوندىرە الماي ورالعان.

ءبىر جىل بۇرىن، ياعني 2017 جىلدىڭ شىلدەسىندە تۇركيانىڭ ىشكى ىستەر مينيسترلىگى «كىتاپ» دەپ اتالاتىن بايانداما جاريالاپ، 1941 قازاقستان ازاماتىنىڭ تۇركيا ارقىلى سيرياعا وتپەك بولعانىن حابارلاعان. ستامبۋل جاريالاعان باياندامادا قازاقستان ازاماتتارى قاقتىعىس ايماعىنا كىرۋگە ءجيى تالپىناتىن 10 ەل قاتارىندا اتالعان.

وتكەن جىلى قاراشادا قازاقستان سىرتقى ىستەر مينيسترلىگى قازاقستاننىڭ ورال قالاسىنىڭ تۇرعىنى - 1988 جىلى تۋعان ايەل مەن ونىڭ ءتورت بالاسى سيرياداعى سوعىس ايماعىنان شەشەنستان استاناسى گروزنىيعا ارنايى رەيسپەن ءبىر توپ اداممەن بىرگە جەتكىزىلگەنى تۋرالى حابارلاعان.

قازاقستان 2015 جىلى كۇزدە دايش ۇيىمىن "تەرروريستىك توپ" دەپ تانىعان.

ۇلتكز

پىكىرلەر