مەدياتسيا - الەم ەلدەرىنىڭ تاجىريبەسىندە قالىپتاسقان ينستيتۋت، زاماناۋي دەموكراتيالىق قوعامنىڭ ءبىر كورىنىسى. بۇل باعىت بويىنشا ەلىمىزدە 2011 جىلى قابىلدانعان مەدياتسيا تۋرالى زاڭ اتا-بابادان ونەگە بولعان داۋدى شەشۋ ءداستۇرىن قايتا جاڭعىرتىپ، جاڭا سەرپىن بەرگەن بولاتىن.
جالپى وبلىس كولەمىندە كاسىبي جانە قوعامدىق مەدياتورلاردىڭ سانى جىل سايىن ارتىپ كەلەدى. بۇگىندە ولاردىڭ سانى مىڭعا جۋىقتاعان. ال قىزىلوردا قالاسىندا ورنالاسقان دوستىق ۇيىندە 2016 جىلدان باستاپ مەدياتسيا كابينەتى جۇمىس ىستەۋدە. ەتنومەدياتسيا باعىتىندا 45 مەدياتورمەن ارىپتەستىك بايلانىس ورناتىلعان.
وسىنداي يگى ىستەردىڭ جالعاسى رەتىندە بۇگىن سوتسىز تاتۋلاسۋ ورتالىعى ءوز قىزمەتىن قايتا باستادى. ايماق باسشىسىنىڭ قولداۋىمەن قايتا جانداندىرىلعان ورتالىقتىڭ تانىستىرىلىمىندا وبلىستىق قوعامدىق دامۋ باسقارماسىنىڭ باسشىسى م. قازبەكوۆا مەدياتسيا سالاسىنىڭ قوعامدىق ومىردەگى ماڭىزىنا توقتالىپ، مەملەكەت باسشىسىنىڭ قازاقستان حالقىنا جولداۋىندا داۋلاردى شەشۋدىڭ بالامالى تاسىلدەرىن دامىتۋدى، مەدياتسيا سالاسىنداعى مەملەكەتتىك ساياساتتى جەتىلدىرۋدى تاپسىرعانىن جەتكىزدى.
«ءبىتىم» مەدياتسيا ورتالىعى» قوعامدىق بىرلەستىگى ۇيلەستىرەتىن تاتۋلاسۋ ورتالىعى تۇرعىندارعا داۋلار مەن جانجالداردى بىتىمگەرشىلىك راسىمدەرى ارقىلى شەشۋگە مۇمكىندىك بەرەدى. تاراپتاردىڭ تاتۋلاسۋىنا، سەنىمدى ديالوگ پەن ءوزارا ءتيىمدى شەشىمدەر قابىلداۋىنا ىقپال ەتەدى.
ورتالىقتىڭ سوتقا دەيىنگى كەلىسىم جاساۋ ارقىلى سوتتاردىڭ جۇكتەمەسىن ازايتۋدا، مەدياتسيالىق كومەككە جۇگىنەتىن تۇرعىنداردىڭ ۇلەسىن ارتتىرۋدا ماڭىزى زور.
مەدياتسيا ورتالىعىندا تۇراقتى نەگىزدە كاسىبي مەدياتورلار، پسيحولوگ ماماندار جۇمىس جاسايدى. ولار وبلىس تۇرعىندارىنا قۇقىقتىق، ومىرلىك قيىن جاعدايدا قالعان تۇرعىندارعا پسيحولوگيالىق كەڭەس بەرەدى.
كەلىسپەۋشىلىكتىڭ ساناتىن انىقتاۋدان باستاپ، مەدياتور تاڭداۋ، تاتۋلاسۋ راسىمدەرىن وتكىزۋ مەن كەلىسىم شارت جاساۋعا دەيىنگى ءتيىستى قىزمەتتەر كورسەتۋ ارقىلى كەلىسپەۋشىلىكتەردىڭ تەز جانە ساپالى شەشىلۋىن قامتاماسىز ەتەدى.
مەكەمەلەر مەن كاسىپورىندارداعى زاڭگەرلەرگە وقىتۋ كۋرستارى وتكىزىلەدى. بۇل سوڭعى كەزدە بەلەڭ العان وندىرىستىك مەكەمەلەردەگى ەڭبەك داۋلارىن الدىن الۋعا، قىزمەتكەردىڭ قۇقىقتىق ساۋاتتىلىعىن جەتىلدىرۋگە جول اشادى.
بۇعان قوسا، قالا جانە اۋدان ورتالىقتارىندا كاسىبي جانە قوعامدىق مەدياتورلارعا كوشپەلى سەمينارلار ۇيىمداستىرىلىپ، ەلدى مەكەندەردە ازاماتتاردىڭ قۇقىقتارى مەن مىندەتتەرى تۋرالى تۇسىندىرمە جۇمىستارىن جۇرگىزىپ، قۇقىقتىق كەڭەستەر بەرۋ جۇمىسى تۇراقتى جۇرگىزىلەتىن بولادى.
اتاپ ءوتۋ كەرەك، جوبا بويىنشا ۇسىنىلاتىن بارلىق قىزمەتتەر تۇرعىندارعا تەگىن.
