Medıaııa - álem elderiniń tájirıbesinde qalyptasqan ınstıtýt, zamanaýı demokratııalyq qoǵamnyń bir kórinisi. Bul baǵyt boıynsha elimizde 2011 jyly qabyldanǵan Medıaııa týraly Zań ata-babadan ónege bolǵan daýdy sheshý dástúrin qaıta jańǵyrtyp, jańa serpin bergen bolatyn.
Jalpy oblys kóleminde kásibı jáne qoǵamdyq medıatorlardyń sany jyl saıyn artyp keledi. Búginde olardyń sany myńǵa jýyqtaǵan. Al Qyzylorda qalasynda ornalasqan Dostyq úıinde 2016 jyldan bastap Medıaııa kabıneti jumys isteýde. Etnomedıaııa baǵytynda 45 medıatormen áriptestik baılanys ornatylǵan.
Osyndaı ıgi isterdiń jalǵasy retinde búgin Sotsyz tatýlasý ortalyǵy óz qyzmetin qaıta bastady. Aımaq basshysynyń qoldaýymen qaıta jandandyrylǵan ortalyqtyń tanystyrylymynda oblystyq qoǵamdyq damý basqarmasynyń basshysy M. Qazbekova medıaııa salasynyń qoǵamdyq ómirdegi mańyzyna toqtalyp, Memleket basshysynyń Qazaqstan halqyna Joldaýynda daýlardy sheshýdiń balamaly tásilderin damytýdy, medıaııa salasyndaǵy memlekettik saıasatty jetildirýdi tapsyrǵanyn jetkizdi.
«Bitim» medıaııa ortalyǵy» qoǵamdyq birlestigi úılestiretin tatýlasý ortalyǵy turǵyndarǵa daýlar men janjaldardy bitimgershilik rásimderi arqyly sheshýge múmkindik beredi. Taraptardyń tatýlasýyna, senimdi dıalog pen ózara tıimdi sheshimder qabyldaýyna yqpal etedi.
Ortalyqtyń sotqa deıingi kelisim jasaý arqyly sottardyń júktemesin azaıtýda, medıaııalyq kómekke júginetin turǵyndardyń úlesin arttyrýda mańyzy zor.
Medıaııa ortalyǵynda turaqty negizde kásibı medıatorlar, psıholog mamandar jumys jasaıdy. Olar oblys turǵyndaryna quqyqtyq, ómirlik qıyn jaǵdaıda qalǵan turǵyndarǵa psıhologııalyq keńes beredi.
Kelispeýshiliktiń sanatyn anyqtaýdan bastap, medıator tańdaý, tatýlasý rásimderin ótkizý men kelisim shart jasaýǵa deıingi tıisti qyzmetter kórsetý arqyly kelispeýshilikterdiń tez jáne sapaly sheshilýin qamtamasyz etedi.
Mekemeler men kásiporyndardaǵy zańgerlerge oqytý kýrstary ótkiziledi. Bul sońǵy kezde beleń alǵan óndiristik mekemelerdegi eńbek daýlaryn aldyn alýǵa, qyzmetkerdiń quqyqtyq saýattylyǵyn jetildirýge jol ashady.
Buǵan qosa, qala jáne aýdan ortalyqtarynda kásibı jáne qoǵamdyq medıatorlarǵa kóshpeli semınarlar uıymdastyrylyp, eldi mekenderde azamattardyń quqyqtary men mindetteri týraly túsindirme jumystaryn júrgizip, quqyqtyq keńester berý jumysy turaqty júrgiziletin bolady.
Atap ótý kerek, joba boıynsha usynylatyn barlyq qyzmetter turǵyndarǵa tegin.
