80 مىڭعا جۋىق تالاپكەر ءبىلىم گرانتتارىن تاعايىنداۋ كونكۋرسىنا قاتىسۋ ءۇشىن ءوتىنىش بەردى. بۇل تۋرالى عىلىم جانە جوعارى ءبىلىم مينيسترىلىگى حابارلادى، دەپ جازادى "ادىرنا" ۇلتتىق پورتالى.
قۇجاتتاردى قابىلداۋ 13-22 شىلدە ارالىعىندا جۇرگىزىلدى. بايقاۋ ناتيجەلەرى 15 تامىزعا دەيىن جاريالانادى.
ۇمىتكەرلەر اراسىندا بالدار تەڭدىگى جاعدايىندا باسىم قۇقىققا يە بولاتىن 20 مىڭنان استام ادام بار. ولاردىڭ ىشىندە «التىن بەلگى» يەگەرلەرى، حالىقارالىق جانە رەسپۋبليكالىق وليمپيادالاردىڭ جەڭىمپازدارى، وقۋ ۇزدىكتەرى بار.
«بيىل گرانت كونكۋرسىنا قۇجاتتاردى قابىلداۋ جوعارى وقۋ ورىندارىنىڭ قابىلداۋ كوميسسيالارى ارقىلى ءداستۇرلى فورماتتا جانە ۆيرتۋالدى كوميسسيالار ارقىلى ونلاين قابىلداندى. بىرنەشە جىل قاتارىنان تالاپكەرلەر ەڭ كوپ سۇرانىسقا يە وقىتۋ باعىتتارى بويىنشا تاڭداۋدى وزگەرىسسىز جاساپ جاتىر. وتىنىشتەردىڭ كوپشىلىگى «پەداگوگيكالىق عىلىمدار»، «ينجەنەرلىك، وڭدەۋ جانە قۇرىلىس سالالارى»، «اقپاراتتىق-كوممۋنيكاتسيالىق تەحنولوگيالار» سياقتى باعىتتارعا بەرىلدى. قابىلداۋ ناۋقانىنىڭ ناتيجەسىنە سايكەس، بولاشاق مۇعالىمدەر، ءتىس دارىگەرلەرى جانە ينجەنەرلەر اراسىندا ءبىر گرانتتىق ورىنعا ەڭ ۇلكەن كونكۋرس بولادى»، – دەپ اتاپ ءوتتى قر عجب ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
ۆەدومستۆو مالىمەتىنشە، بيىل 154 مىڭ تالاپكەر ۇلتتىق بىرىڭعاي تەستىلەۋدەن ءوتتى. ۇبت قورىتىندىسى بويىنشا شەكتى بالدى 103 مىڭنان استام ادام جينادى، بۇل – قاتىسۋشىلاردىڭ جالپى سانىنىڭ 67%.
ايتا كەتەيىك، 2022-2023 وقۋ جىلىندا باكالاۆرياتقا 73 مىڭعا جۋىق گرانت ءبولىنىپ وتىر.
"ادىرنا" ۇلتتىق پورتالى
