ادىلەتتىلىك جەڭدى - سايراگۇل ەلدە قالدى

3309
Adyrna.kz Telegram

بۇگىن كوپشىلىك جاركەت قالاسىنداعى سوت نە بولار ەكەن دەپ كۇتتى. سونىمەن: "الماتى وبلىسىنىڭ پانفيلوۆ اۋداندىق سوتى قىتاي ازاماتى، ەتنيكالىق قازاق سايراگۇل ساۋىتبايعا التى اي شارتتى جازا كەسىپ، قازاقستاندا قالدىرۋ تۋرالى ۇكىم شىعاردى. سۋديا دينارا قۇيقاباەۆا سايراگۇل ساۋىتبايدى قازاقستان شەكاراسىن زاڭسىز كەسىپ ءوتتى دەپ ايىپتاپ، التى اي مەرزىمگە باس بوستاندىعىنان ايىرۋ، بىراق ونى "جازاسىن جەڭىلدەتەتىن ەرەكشە جاعدايىنا" بايلانىستى شارتتى جازاعا الماستىرۋعا ۇكىم كەستى.

سۋديا ۇكىم وقىعان كەزىندە سوت بارىسىندا سايراگۇل ساۋىتبايدىڭ قىلمىستى "وتباسىمەن قاۋىشۋ ماقساتىمەن جاساعانى" انىقتالعانىن، قىلمىسى "اۋىر ەمەس" دەپ ەسەپتەيتىنىن ايتتى.

سۋديا سايراگۇل ساۋىتبايعا جازا تاعايىنداۋدا قازاقستان قول قويعان بۇۇ-نىڭ حالىقارالىق بالا قۇقىقتارى جونىندەگى كونۆەنتسياسى باسشىلىققا الىنعانىن ايتتى. ساۋىتبايدىڭ ەتنيكالىق قازاق ەكەنى ءارى قازاقستان ازاماتتىعىن الۋعا قۇقىعى بارى ەرەكشە جاعداي رەتىندە ەسكەرىلگەن.

ۇكىمنەن سوڭ سايراگۇل ساۋىتباي سوت زالىنان بوساتىلدى.

بۇگىن تۇسكە دەيىن سوتتىڭ ءجارىسسوز كەزەڭىندە پروكۋرور ارزىگۇل يمياروۆا ونى قازاقستان اۋماعىنان شىعارماۋدى، جازاسىن جەڭىلدەتىپ، سوت زالىنان بوساتۋدى سۇراعان. پروكۋرور ساۋىتبايدىڭ بالالارى قازاقستان ازاماتى ەكەنىن، وسى ەلدە تۇراتىنىن جانە بالالارىمەن كەزدەسۋىن قامتاماسىز ەتۋ قاجەتتىگىن ايتقان. ول وسىعان بايلانىستى ءارى ساۋىتباي قىلمىسىن مويىنداعاندىقتان وعان قازاقستاننان شىعارۋ جازاسى قولدانىلمايتىنىن جەتكىزگەن.

سوت تەرگەۋى كەزىندە سايراگۇل ساۋىتباي وزىنە تاعىلعان ايىپتى تولىق مويىندايتىنىن ايتىپ، پروكۋرورمەن پروتسەسسۋالدىق كەلىسىم جاساسۋدى سۇراعان. ول وزىنە قىتايدا "ساياسي قىسىم جاسالعاندىقتان شەكارادان زاڭسىز وتۋدەن وزگە جول قالماعانىن" مالىمدەگەن. ساۋىتبايدىڭ سوزىنشە، ول قىتايدا قۇپيا سانالاتىن "ساياسي ۇيرەنۋ ورتالىقتارىندا" جۇمىس ىستەگەن، "مەملەكەت قۇپياسىن اشكەرەلەمەۋ" تۋرالى قولحات بەرگەن. سايراگۇل ساۋىتباي قىتايعا قايتارىلسا، ول ەلدە وزىنە ءولىم جازاسى كەسىلۋى مۇمكىن ەكەنىن، قازاقستاندا قانداي جازاعا دا كەلىسەتىنىن مالىمدەگەن.

سايراگۇل ساۋىتبايدىڭ كۇيەۋى ءۋالي ءىسلام بيىل مامىردا ايەلىن قازاقستان ۇلتتىق قاۋىپسىزدىك كوميتەتىنىڭ قىزمەتكەرلەرى "قورعاس كەدەن بەكەتىن زاڭسىز بۇزىپ ءوتتى" دەگەن ايىپپەن ۇستاعانىن حابارلاعان.

سايراگۇل ساۋىتبايدىڭ كۇيەۋى ءۋالي ءىسلام مەن ەكى بالاسى قازاقستان ازاماتتىعىن العان. ەرلى-زايىپتى ءۋالي ءىسلام مەن سايراگۇل ساۋىتباي ەكى بالاسىمەن بىرگە قازاقستانعا 2016 جىلى كوشىپ كەلمەك بولعان". ازاتتىق سايتى وسىلاي دەپ حابارلادى.

پىكىرلەر