Búgin kópshilik Jarket qalasyndaǵy sot ne bolar eken dep kútti. Sonymen: "Almaty oblysynyń Panfılov aýdandyq soty Qytaı azamaty, etnıkalyq qazaq Saıragúl Saýytbaıǵa alty aı shartty jaza kesip, Qazaqstanda qaldyrý týraly úkim shyǵardy. Sýdıa Dınara Quıqabaeva Saıragúl Saýytbaıdy Qazaqstan shekarasyn zańsyz kesip ótti dep aıyptap, alty aı merzimge bas bostandyǵynan aıyrý, biraq ony "jazasyn jeńildetetin erekshe jaǵdaıyna" baılanysty shartty jazaǵa almastyrýǵa úkim kesti.
Sýdıa úkim oqyǵan kezinde sot barysynda Saıragúl Saýytbaıdyń qylmysty "otbasymen qaýyshý maqsatymen jasaǵany" anyqtalǵanyn, qylmysy "aýyr emes" dep esepteıtinin aıtty.
Sýdıa Saıragúl Saýytbaıǵa jaza taǵaıyndaýda Qazaqstan qol qoıǵan BUU-nyń halyqaralyq Bala quqyqtary jónindegi konvenııasy basshylyqqa alynǵanyn aıtty. Saýytbaıdyń etnıkalyq qazaq ekeni ári Qazaqstan azamattyǵyn alýǵa quqyǵy bary erekshe jaǵdaı retinde eskerilgen.
Úkimnen soń Saıragúl Saýytbaı sot zalynan bosatyldy.
Búgin túske deıin sottyń jaryssóz kezeńinde prokýror Arzygúl Imıarova ony Qazaqstan aýmaǵynan shyǵarmaýdy, jazasyn jeńildetip, sot zalynan bosatýdy suraǵan. Prokýror Saýytbaıdyń balalary Qazaqstan azamaty ekenin, osy elde turatynyn jáne balalarymen kezdesýin qamtamasyz etý qajettigin aıtqan. Ol osyǵan baılanysty ári Saýytbaı qylmysyn moıyndaǵandyqtan oǵan Qazaqstannan shyǵarý jazasy qoldanylmaıtynyn jetkizgen.
Sot tergeýi kezinde Saıragúl Saýytbaı ózine taǵylǵan aıypty tolyq moıyndaıtynyn aıtyp, prokýrormen proessýaldyq kelisim jasasýdy suraǵan. Ol ózine Qytaıda "saıası qysym jasalǵandyqtan shekaradan zańsyz ótýden ózge jol qalmaǵanyn" málimdegen. Saýytbaıdyń sózinshe, ol Qytaıda qupııa sanalatyn "saıası úırený ortalyqtarynda" jumys istegen, "memleket qupııasyn áshkerelemeý" týraly qolhat bergen. Saıragúl Saýytbaı Qytaıǵa qaıtarylsa, ol elde ózine ólim jazasy kesilýi múmkin ekenin, Qazaqstanda qandaı jazaǵa da kelisetinin málimdegen.
Saıragúl Saýytbaıdyń kúıeýi Ýálı Islám bıyl mamyrda áıelin Qazaqstan Ulttyq qaýipsizdik komıtetiniń qyzmetkerleri "Qorǵas keden beketin zańsyz buzyp ótti" degen aıyppen ustaǵanyn habarlaǵan.
Saıragúl Saýytbaıdyń kúıeýi Ýálı Islám men eki balasy Qazaqstan azamattyǵyn alǵan. Erli-zaıypty Ýálı Islám men Saıragúl Saýytbaı eki balasymen birge Qazaqstanǵa 2016 jyly kóship kelmek bolǵan". Azattyq saıty osylaı dep habarlady.
