وسكەمەندە جۇزدەگەن ادامدى تاقىرعا وتىرعىزعان 29 جاستاعى كەلىنشەك ۇستالدى. حالىققا قانت ساتامىن دەپ الداعان الاياق 90 ميلليون تەڭگەگە توناپ كەتكەن، دەپ حابارلايدى “ادىرنا” ۇلتتىق پورتالى كتك ارناسىنا سىلتەمە جاساپ.
كۇدىكتى الدىمەن الەۋمەتتىك جەلىدە قانت ساتاتىنىن ايتىپ، جارنامانى جان-جاققا تاراتقان. ال بايلانىسقا شىققان ادامدارمەن جىلى-جىلى سويلەسكەن. سوسىن الدىن-الا تولەم جاساۋدى سۇرادى.
وسىلايشا، از ۋاقىتتىڭ ىشىندە حالىقتان 90 ميلليون تەڭگە جيناپ الدى. بىراق بىردە-ءبىر تاپسىرىس ورىندالمادى.
قالا تۇرعىندارى الدانىپ قالعاندارىن تۇسىنگەننەن كەيىن بىردەن پوليتسياعا ارىز جازعان. سونىڭ نەگىزىندە ءتارتىپ ساقشىلارى الاياق ايەلدى ۇستادى. قازىرگى كەزدە قىلمىستىق ءىس قوزعالدى.
"اتالعان فاكتى بويىنشا قىلمىستىق كودەكسىنىڭ 190-بابى، 3-بولىگىنە سايكەس سوتقا دەيىنگى تەرگەۋ باستالدى. بۇل قىزعا قاتىستى كەلۋ مىندەتتەمەسى تۇرىندە بۇلتارتپاۋ شاراسى قابىلداندى", - دەيدى وبلىستىق پوليتسيانىڭ ىشكى جانە سىرتقى كوممۋنيكاتسيالار باسقارماسى باسشىسىنىڭ مىندەتىن اتقارۋشى تاتيانا كارپوۆا.
“ادىرنا” ۇلتتىق پورتالى
