قازاقستاندا 3 ميلليون گەكتار جايىلىم زاڭسىز بەرىلگەن. بۇل تۋرالى باس پروكۋراتۋرا مالىمدەدى، - دەپ حابارلايدى "ادىرنا" پورتالى.
ۆەدومستۆونىڭ مالىمەتىنشە، تەك سوڭعى ءۇش جىلدا پروكۋرورلار 18 ميلليون گەكتار بوس جانە ءۇش ميلليون گەكتار زاڭسىز بولىنگەن جايىلىمدىق جەرلەردى انىقتاپ، ونىڭ بەس ميلليونى مەملەكەتكە قايتارىلىپ، ءتورت ميلليون گەكتارى اينالىمعا ەنگىزىلگەن.
"جۇمىس ناتيجەسى جەردى يگەرۋگە مۇمكىندىگى جوق ادامدار جەردىڭ جاساندى تاپشىلىعىن تۋعىزاتىنىن كورسەتتى. وسى سەبەپتى ادال شارۋالار مەن اۋىل تۇرعىندارى جايىلىمدىق جەرلەردى پايدالانۋ مۇمكىندىگىنەن ايىرىلىپ، اقىرىندا ولاردىڭ دەگراداتسياسىنا اكەلىپ سوعادى»، - دەپ حابارلادى باس پروكۋراتۋرا.
بۇگىنگى كۇنى ەلدە 15 ميلليون گەكتارعا جۋىق قوعامدىق جايىلىمداردىڭ جەتىسپەيتىنى انىقتالدى، بۇل جەكە قوسالقى شارۋاشىلىقتار ءۇشىن مال جايۋدا قيىندىقتار تۋعىزادى.
"اعىمداعى جىلى جاعدايدى جاقسارتۋ ءۇشىن اۋىل شارۋاشىلىعى مينيسترلىگىمەن بىرلەسىپ مەملەكەتكە قوسىمشا بەس ميلليون گەكتار جەردى قايتارۋ جوسپارلانۋدا. ءبىزدىڭ جەرگىلىكتى شارالار نەگىزىندە اكىمدىكتەر مەملەكەتتىك جايىلىمداردى باسقارۋ جوسپارلارىن بەكىتتى. بۇل جايىلىمدىق جەرلەردى كوشىرۋگە جول بەرمەيدى. اۋىلدىق ەلدى مەكەندەر ماڭىنداعى جەر ۋچاسكەلەرى جەكە تۇلعالارعا بەرىلەدى»، - دەلىنگەن ۆەدومستۆو حابارلاماسىندا.
ەسكە سالايىق، ءساۋىر ايىندا قازاقستان مەملەكەتكە قايتارىلعان پايدالانىلماي جاتقان اۋىل شارۋاشىلىعى جەرلەرىن ءتورت ەسەگە ۇلعايتۋدى جوسپارلاپ وتىرعانى حابارلانعان بولاتىن.
