قوعام قايراتكەرى، ەكس-دەپۋتات سەرىك ءابدىراحمانوۆ «سۇراۋى بار» باعدارلاماسىنا بەرگەن سۇحباتىندا ۇقك نازارباەۆتىڭ جەكەمەنشىك مەكەمەسىنە اينالىپ كەتكەنىن ايتتى دەپ حابارلايدى "ادىرنا" دەرەككوزگە سىلتەپ.
«قاڭتاردان بەرى، مىنە، جارتى جىل ءوتتى. شىندىق پەن كىنالىلەردىڭ اتى اتالعان جوق. ال قاماۋعا كىمدەر الىندى؟ نەگىزگى ايىپكەرلەر ەمەس، ورىنداۋشىلار. ۇلتتىق قاۋىپسىزدىك كوميتەتى دەگەن نازارباەۆتىڭ جەكەمەنشىك كونتوراسىنا اينالىپ كەتكەن دۇنيە. سول سەبەپتەن ءوزىن تارتۋ كەرەك ەدى. تارتا الماي وتىر. قارالىپ جاتىر ول ايىپتىلار. سەنەيىك! قازىر قوعامنىڭ كوڭىلى سىبايلاس جەمقورلىققا اۋىپ كەتتى. انانى دا، مىنانى دا ۇستاپ جاتىر. اناۋ ءبىر ماڭقا گەنەرال ەرعوجيننىڭ وزىنەن 3 ملرد دوللار تابىلىپتى. قاتارداعى، ساپتاعى 10-20-شى تۇرعان ۇرى جۇيەسىنىڭ وكىلى» دەيدى ءابدىراحمانوۆ.
سونىمەن قاتار، ەكس-دەپۋتات ەرعوجين تۋرالى مالىمەتتى قايدان العانىن ءتۇسىندىردى.
«تەرگەۋ ورىندارى اقىرىن تاراتىپ جاتىر. سەنىمدى ادامدارىم بار. ەگەر شىنايى سىبايلاس جەمقورلىقپەن كۇرەس باستالسا، ءبىزدىڭ بيۋدجەت دوللاردىڭ استىندا قالۋى كەرەك. پروفيتسيت ۇستىنە پروفيتسيت، اقشانى قايدا جۇمسايمىز دەگەن ەڭ باستى پروبلەما شىعار ەدى. ونداي جوق. قانىشەرلەردىڭ اتى اتالعان جوق. دەمەك، بارلىعى اقىرىن «تورموزبەن» كەتىپ بارا جاتىر. بۇل توقاەۆ ءۇشىن وتە قاۋىپتى جاعداي» دەيدى ءابدىراحمانوۆ.
"ادىرنا" ۇلتتىق پورتالى
