قوشانوۆ: جاستار ادىلەتتى، اشىق، قۋاتتى قازاقستاندا ءومىر ءسۇرۋى ءتيىس

2681
Adyrna.kz Telegram

بۇگىن مەملەكەت باسشىسى قاسىم-جومارت توقاەۆ بەينەجازبا ارقىلى «AMANAT» جاستار قاناتىنىڭ كەزەكتەن تىس VI سەزىنە قاتىسۋشى دەلەگاتتارعا قۇتتىقتاۋ ءسوز ارناپ، ەل جاستارىنا ارنايى ۇندەۋ جولدادى. سەزد بارىسىندا جاستار قاناتىن ترانسفورماتسيالاۋدىڭ جاڭا باعدارلاماسى قابىلدانىپ، ورتالىق كەڭەستىڭ قۇرامى مەن جاستار ۇيىمىنىڭ اتاۋى وزگەرتىلدى، دەپ جازادى "ادىرنا" ۇلتتىق پورتالى. 

اقمولا وبلىسىنىڭ زەرەندى اۋىلىندا ءوتىپ جاتقان سەزدىڭ پلەنارلىق وتىرىسىنا ەلىمىزدىڭ بارلىق وڭىرىنەن 350-دەن استام دەلەگات پەن قوناق قاتىستى.

پلەنارلىق وتىرىس بارىسىندا قازاقستان پرەزيدەنتى قاسىم-جومارت توقاەۆ «AMANAT» پارتياسى جاستار قاناتىنىڭ كەزەكتەن تىس VI سەزىنىڭ دەلەگاتتارىنا ارنايى ۇندەۋ جولدادى.

وندا پرەزيدەنت جاڭا قازاقستاننىڭ جاستارى ايرىقشا تۇسىنۋگە ءتيىس ءۇش ماڭىزدى باعىتتى اتادى. ولار – تەرەڭ ءبىلىم، ەڭبەكقورلىق جانە وتانشىلدىق قاسيەت.

بىرىنشىدەن، مەملەكەت باسشىسىنىڭ ايتۋىنشا، كوزى اشىق، كوكىرەگى وياۋ ازاماتتار ەلدى العا باستايدى، بولاشاقتىڭ كىلتى تسيفرلىق تەحنولوگيا مەن يننوۆاتسيادا. سوندىقتان بىرنەشە ءتىل ءبىلىپ، ءتۇرلى كاسىپ يگەرۋ جاستاردىڭ قولىنان كەلەدى. پرەزيدەنت اتاپ وتكەندەي، ەلىمىز باسەكەگە قابىلەتتى بولۋى قاجەت. حالقىمىزدىڭ ءال-اۋقاتىن ارتتىرىپ، تۇرمىس ساپاسىن جاقسارتۋ كەرەك.

مەملەكەت باسشىسىنىڭ ايتۋىنشا، ءبىلىمدى ءارى بىلىكتى ورەندەر عانا بيىك ماقساتقا جەتە الادى. ەلگە تىرەك بولۋ – ءاربىر جاستىڭ مۇراتى. ەل جاستاردان تىڭ باستامالار جانە وزىق يدەيالار كۇتەدى.

ەكىنشىدەن، جاستار ادال ەڭبەكتى باعالاپ، رۋحى بيىك، ساناسى سەرگەك بولۋعا ءتيىس. جاڭا زاماننىڭ جاقسى قاسيەتتەرىن بويعا سىڭىرە وتىرىپ، جاھاندانۋدىڭ جاعىمسىز اسەرلەرىن دە ەستەن شىعارماۋ كەرەك. مەملەكەتتىك مۇددە بارىنەن بيىك تۇرۋى  كەرەك ەكەنىن ايتا كەلىپ، پرەزيدەنت ءاربىر جاستى انا ءتىلىن، اتا ءداستۇرىن، ءتول تاريحىن بىلۋگە ۇندەدى.

ۇشىنشىدەن، وتانشىلدىق قاسيەت تۋرالى مەملەكەت باسشىسى اركىم قوعام الدىنداعى جاۋاپكەرشىلىگىن تەرەڭ سەزىنۋ كەرەك ەكەنىن، تۋعان ەلگە قۇرمەت جالىندى سوزدەن ەمەس، جاسامپاز ىستەن كورىنەتىنىن، الدىنا ماقسات قويعان ازامات ناعىز مەملەكەتشىل تۇلعاعا اينالاتىنىن ەرەكشە اتاپ ءوتتى.

قاسىم-جومارت توقاەۆ ءسوزىن قورىتىندىلاي كەلە، اعا بۋىننىڭ جاستارعا زور ءۇمىت ارتاتىنىن، ونى جاستاردىڭ اقتايتىنىنا سەنىم ءبىلدىرىپ، سەزد جۇمىسىنا تابىس تىلەدى.

ءوز كەزەگىندە، جاستار قاناتىنىڭ توراعاسى نۇرجان جەتپىسباەۆ ەلىمىزدىڭ ساياسي جۇيەسىنىڭ ترانسفورماتسياسى «AMANAT» پارتياسىنىڭ ترانسفورماتسياسىنان باستالعانىن اتاپ ءوتتى.

«پارتيانى دامىتۋدىڭ كەزەكتى كەزەڭى ونىڭ جاستار قاناتىن جاڭعىرتۋ سانالادى. ءبىز جاستار مەن بيلىك اراسىنداعى ءوزارا ءىس-قيمىلدىڭ ءتيىمدى ارناسىنا اينالعىمىز كەلەدى. بارلىق وڭىردەن كەلىپ تۇسكەن ۇسىنىستار نەگىزىندە قايتا جانداندىرۋ باعدارلاماسى ازىرلەندى. سونداي-اق ۇيىمنىڭ ورتالىق كەڭەسىنىڭ قۇرامى قايتا قارالدى»، – دەدى نۇرجان جەتپىسباەۆ.

پلەنارلىق وتىرىس بارىسىندا ءسوز سويلەگەن مەدياۆولونتەر دياس كامەريدانوۆ پارتياعا بارلىق تاريحي قۇجاتتار مەن دەرەكتى فيلمدەر قازاق جانە اعىلشىن تىلدەرىندە تسيفرلاندىرىلاتىن «Tarih» بىرىڭعاي پلاتفورماسىن ازىرلەۋدى ۇسىندى. بۇل قازاقستان تاريحىن ديدجيتاليزاتسيالاۋعا جانە ونى بارشاعا قولجەتىمدى ەتۋگە مۇمكىندىك بەرەدى.

پارتيا جاستار قاناتىنىڭ الماتى قالالىق فيليالىنىڭ ۆولونتەرى اريانا بەلوبجيتسكايا  ەرىكتىلەردىڭ 100 مەكتەبىن قامتيتىن ۆولونتەرلەر اكادەمياسىن قۇرۋدى ۇسىندى. «بۇل ءبىر الاڭدا ءتۇرلى باعىتتاعى ەرىكتىلەردى جيناۋعا مۇمكىندىك بەرەدى. ولار جاڭا ءبىلىمدى، تاجىريبە مەن بىلىكتىلىكتەردى الا الادى. شەتەلدىك ساراپشىلاردان دا ۇيرەنەدى»، – دەپ اتاپ ءوتتى ول.

قاڭتار ايىنداعى وقيعالار كەزىندە اسكەري قىزمەتتە بولعان اقتوبەلىك ۇلان مىرزابايدىڭ ايتۋىنشا، وتان قورعاۋ – ءاربىر قازاقستاندىقتىڭ ازاماتتىق بورىشى. «جاستاردىڭ پاتريوتتىق تاربيەسىنە ەرەكشە نازار اۋدارۋ قاجەت. بۇل رەتتە، پارتيانىڭ جاستار قاناتى جۇزەگە اسىرىپ جاتقان «Qaisar» جوباسى بۇرىنعىدان دا وزەكتى بولا ءتۇستى. بيىل وسى جوبا اياسىندا ەل اۋماعىنداعى 2000-نان استام جوعارى سىنىپ وقۋشىسى قامتىلدى. وسى باعىتتاعى جۇمىستى بەلسەندى تۇردە جالعاستىرۋ كەرەك»، – دەدى ۇلان مىرزاباي.

بۇدان سوڭ سولتۇستىك قازاقستان وبلىسى وزەرنوە اۋىلى مەكتەبىنىڭ ينفورماتيكا ءپانىنىڭ مۇعالىمى اسىل احمەتوۆا ءسوز سويلەدى: «قازىرگى ۋاقىتتا جاستاردىڭ باسىم بولىگى ءوز بولاشاعىن مەگاپوليستەرمەن بايلانىستىراتىنى جاسىرىن ەمەس. الايدا اۋىل – حالقىمىزدىڭ بەسىگى. سوندىقتان جاستاردى قولداۋعا باعىتتالعان باعدارلامالار ۇلكەن قالالارمەن شەكتەلمەي، اۋىل جاستارىنا دەيىن جەتۋى ءتيىس».

اسىل احمەتوۆا كوشپەندىلەر مۇراسى مەن تۇركى الەمىنىڭ قۇندىلىقتارىن دارىپتەۋدىڭ ماڭىزى زور ەكەنىن اتاپ ءوتتى. وسى ماقساتتا، ءار جىل سايىن ءتۇرلى مەملەكەتتەردە وتكىزىلىپ كەلە جاتقان دۇنيەجۇزىلىك كوشپەندىلەر ويىندارىن 2024 جىلى قازاق دالاسىندا ۇيىمداستىرۋدى ۇسىندى.

سونداي-اق، قوعام قايراتكەرى داۋلەت مۇقاەۆ سەزد دەلەگاتتارى مەن قوناقتارىن «اقىلدى جاس ازامات» جانە «AQYL BATTLE» جوبالارى تۋرالى حاباردار ەتتى.

ەۋرو-2022-ءنىڭ ۇزدىك شابۋىلشىسى اتانعان «قايرات» فۋتزال كلۋبىنىڭ شابۋىلشىسى ءبىرجان ورازوۆ پارتيانىڭ جاستار قاناتىنىڭ اتاۋىن وزگەرتۋدى ۇسىندى.

«جاڭا قازاقستاندى ءوز وتانىن سۇيەتىن، ءبىلىمدى، پاراساتتى، دارىندى، رۋحتى جاستار قۇراتىنى ءسوزسىز. سوندىقتان بۇگىنگى دەلەگاتتارعا پارتيانىڭ جاستار قاناتىنىڭ اتاۋىن «جاستار رۋحى» دەپ وزگەرتسەك دەگەن ۇسىنىسىم بار»، – دەدى ءبىرجان ورازوۆ.

بۇل شەشىمدى ءىس-شارانىڭ بارلىق قاتىسۋشىلارى قولدادى.

«رۋح – حالقىمىز ءۇشىن كيەلى قۇندىلىقتاردى بىلدىرەتىن ۇعىم. بۇل اتاۋ وتە تەرەڭ ماعىناعا يە، ۇلكەن جاۋاپكەرشىلىك جۇكتەيدى. جاڭا اتاۋ ۇيىمنىڭ جۇمىسىن دا تۇبەگەيلى وزگەرتۋدى تالاپ ەتەدى. ياعني، جاڭارتىلعان جاستار قاناتى جاس ۇرپاقتىڭ مۇددەلەرىن شىن مانىندە قورعاۋى ءتيىس»، – دەدى ءماجىلىس دەپۋتاتى ەلنۇر بەيسەنباەۆ.

«AMANAT» پارتياسى ساياس كەڭەسىنىڭ مۇشەسى، تانىمال تەلەجۇرگىزۋشى ماقسات تولىقباي پارتيا اتاۋىن وزگەرتۋ تۋرالى ۇسىنىسقا قولداۋ ءبىلدىردى.

«قازاق حالقى اۋەلدەن رۋح، نامىس ۇعىمدارىن ايرىقشا قاستەرلەيدى. ال رۋحاني بايلىق دەگەنىڭىز – ۇلتتىق سانا، ءتىل، ءدىل. ەڭ ۇلكەن بايلىعىمىز دا وسى ادامي كاپيتال، رۋحاني قۇندىلىقتار. ەل بولاشاعى ءبىلىمدى جاستاردىڭ قولىندا. بابالار اماناتى جاس بۋىن ءبىلىم مەن ەڭبەكقورلىقتى ۇلگى ەتە العان كەزدە ورىندالادى. جاڭا قازاقستان – رۋحاني ساباقتاستىق»، – دەدى ماقسات تولىقباي.

سەزدى قورىتىندىلاي كەلە، «AMANAT» پارتياسىنىڭ توراعاسى ەرلان قوشانوۆ جاڭا قازاقستان بولاشاق جاستاردىڭ يگىلىگى ءۇشىن قۇرىلىپ جاتقانىن اتاپ ءوتتى.

«بۇل رەفورمالاردىڭ ءمانى نەدە؟ سىزدەردىڭ ارقايسىڭىزعا – ەلىمىزدىڭ ساياسي ومىرىنە، بيزنەسكە، باسقا دا قوعامداعى ماڭىزدى ماسەلەلەرگە ەركىن ارالاسۋ ءۇشىن تەڭ مۇمكىندىك بەرۋ. ءبىر سوزبەن ايتقاندا، ءبىزدىڭ جاستارىمىز كەلەشەكتە ادىلەتتى دە اشىق قوعامى بار قۋاتتى قازاقستاندا ءومىر سۇرۋلەرى كەرەك. پرەزيدەنت باستاماسىمەن وسى وزگەرىستەردىڭ بارلىعى كونستيتۋتسيامىزعا ەنگىزىلدى، شەگەلەندى، زاڭداستىرىلدى. ەندىگى كەزەكتە وسى رەفورمالاردى ىسكە اسىرۋدا – الدىڭعى قاتاردا جاستار، ارينە سىزدەردىڭ بولۋلارىڭىز وتە ماڭىزدى»، – دەدى ەرلان قوشانوۆ.

«AMANAT» پارتياسىنىڭ توراعاسى جاستار قاناتىنىڭ الدىنا بىرقاتار پەرسپەكتيۆالىق مىندەت قويدى. اتاپ ايتقاندا، جاستار پروبلەمالارىنىڭ ايماقتىق كارتالارىن ەنگىزۋ، دارىندى جاستار ءۇشىن جوبالار جارمەڭكەسىن جانە باسقا دا ءىس-شارالاردى وتكىزۋ، جاس كوشباسشىلارعا ارنالعان وقۋ باعدارلامالارىنىڭ تيىمدىلىگىن ارتتىرۋ، NEET ساناتىنداعى جاستاردىڭ پروبلەمالارىن شەشۋ جونىندەگى جۇمىستى كۇشەيتۋ، «ءبىر تولقىندا»  پىكىرتالاس الاڭىن جانە جوو تۇلەكتەرىن جۇمىسقا ورنالاستىرۋ بويىنشا اگەنتتىك قۇرۋ.

VI كەزەكتەن تىس سەزدىڭ شەشىمىمەن جاستار قاناتىن ترانسفورماتسيالاۋدىڭ جاڭا باعدارلاماسى قابىلداندى، جاستار ۇيىمىنىڭ اتاۋى وزگەرتىلدى. ورتالىق كەڭەستىڭ قۇرامى قوعامدىق پىكىردىڭ بەلسەندى كوشباسشىلارىن، ۇەۇ وكىلدەرىن جانە ت.ب. تارتۋ ەسەبىنەن كەڭەيتىلدى.

"ادىرنا" ۇلتتىق پورتالى 

پىكىرلەر