قاپشاعاي قالالىق سوتى سوتتالعان باقىتبەك ەسەنتاەۆتىڭ ءوتىنىشىن قارادى. بەلگىلى پروديۋسەر بايان ماقساتقىزىنىڭ بۇرىنعى كۇيەۋى، كاسىپكەر باقىتبەك ەسەنتاەۆ مەرزىمىنەن بۇرىن بوستاندىققى شىعادى، دەپ حابارلايدى "ادىرنا" ۇلتتىق پورتالى.
الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ 2016 جىلعى 3 قاراشاداعى ۇكىمىمەن ەسەنتاەۆ كىسى ولتىرۋگە وقتالۋ (قك 24-بابىنىڭ 3-بولىگى، 99-باپتىڭ 1-بولىگى) بويىنشا 9 جىلعا سوتتالدى. باس بوستاندىعىنان ايىرۋ ورىندارىندا، جازاسىن قىلمىستىق-اتقارۋ مەكەمەسىندە وتەدى.
قاپشاعاي قالالىق سوتىنىڭ حابارلاۋىنشا، ەسەنتاەۆ جازاسىن وتەۋ كەزىندە سوتقا مەرزىمىنەن بۇرىن شارتتى تۇردە بوساتۋ تۋرالى ءوتىنىش بەرگەن.
پروكۋرور سوتتالعان ەسەنتاەۆتىڭ ءوتىنىشىن قاناعاتتاندىرۋدى سۇرادى. سوتتالۋشى مەن ونىڭ قورعاۋشىسى ءوتىنىشحاتتى تولىق قولداپ، قاناعاتتاندىرۋدى ءوتىندى. جابىرلەنۋشى الاگوزوۆا ب.م. جانە ونىڭ وكىلى دە ب.ەسەنتاەۆتى شارتتى تۇردە مەرزىمىنەن بۇرىن بوساتۋعا كەلىستى.
ەسەنتاەۆ جازاسىن وتەۋ كەزىندە 11 سىياقى، 1 ايىپپۇل وتەلگەن، جازانىڭ ½ بولىگىن وتەگەن، ياعني 6 جىل 1 اي 2 كۇن، مىنەز-قۇلقىنىڭ 3 وڭ دارەجەسى بار.
جاسالعان قىلمىسىنىڭ قوعامدىق قاۋىپتىلىگىن ءتۇسىنىپ، ىستەگەن ىسىنە وكىنەدى. سوت ۇكىمىمەن وندىرىلگەن 756 269 تەڭگە پروتسەستىك شىعىندار ەرىكتى تۇردە وتەلدى. قاپشاعاي قالالىق سوتىنىڭ 2022 جىلعى 12 شىلدەدەگى قاۋلىسىمەن سوتتالعان ەسەنتاەۆتىڭ مەرزىمىنەن بۇرىن شارتتى تۇردە بوساتۋ تۋرالى ءوتىنىشى قاناعاتتاندىرىلدى.
قاۋلى زاڭدى كۇشىنە ەنگەن جوق.
ەستەرىڭىزگە سالا كەتەيىك، 2016 جىلى باقىتبەك ەسەنتاەۆقا ءوز ايەلىن ولتىرمەك بولدى دەگەن ايىپ تاعىلىپ، 9 جىلعا سوتتالعان ەدى.
"ادىرنا" ۇلتتىق پورتالى
