تارازدا ۇقك ورتالىق اپپاراتىنىڭ قىزمەتكەرلەرى ءماجىلىستىڭ ەكس-سپيكەرى نۇرلان نىعماتۋليننىڭ ۇلى نۇرحان نۇرلانوۆتى ۇستادى. بۇل تۋرالى Orda.kz حابارلادى، دەپ جازادى "ادىرنا" ۇلتتىق پورتالى.
ەكس-سپيكەردىڭ ۇلىنىڭ ۇستالۋى تۋرالى ءمان-جاي انىقتالىپ جاتىر.
ايتا كەتەيىك، نۇرحان نۇرلانوۆ «قازفوسفات» جشس باسشىسى.
P.S. «قازفوسفات» زاۋىتىنىڭ ديرەكتورى نۇرحان نۇرلانوۆ Orda.kz رەداكتسياسىنا حابارلاسىپ، تارازداعى ۇيىندە ەكەنىن، كەڭسەسىندە ءتىنتۋ جۇرگىزىلمەگەنىن، قاماۋعا الىنباعانىن ايتتى. توتەنشە جاعدايلار دەپارتامەنتى مەن قالا، وبلىس اكىمدىكتەرىنىڭ وكىلدەرىمەن بىرگە زاۋىتتاعى شۇعىل جينالىستا ورىنباسارلارى بولعانىن، ءوزىنىڭ «نۇسقاۋ بەرىپ» زاۋىتتان شىعىپ كەتكەنىن ايتتى. نۇرلانوۆ جانە «Kaz Chemicals» باسقارما توراعاسىنىڭ ورىنباسارى يگور زاۆيالوۆ كاسىپورىنداعى شىعارىندىلاردىڭ سەبەبى تۋرالى تۇسىنىك بەرۋدەن باس تارتتى. «بۇل ماسەلەمەن كوميسسيا اينالىسادى. توتەنشە جاعدايدىڭ سەبەپتەرى انىقتالعاننان كەيىن رەسمي ءباسپاسوز مالىمدەمەسى جاريالانادى» دەپ جاۋاپ بەردى.
ەسكە سالساق، تارازداعى «قازفوسفات» زاۋىتىندا اپات بولعان. بۇل تۋرالى وبلىس اكىمدىگىندە حابارلاندى. ولار اۋادا «ءفتوريدتى قوسىلىستاردىڭ ازداپ ارتقانىن» اتاپ ءوتتى.
«11 شىلدەدە، ساعات 20:30-دا تاراز قالاسىنداعى «قازفوسفات مينەرالدى تىڭايتقىشتار» جشس زاۋىتىندا اپات بولدى. ەكولوگيا دەپارتامەنتى قالا پروكۋراتۋراسىمەن بىرگە سقا شەكاراسىندا زياندى زاتتاردى ولشەۋگە شىقتى. فتورلى سۋتەكتىڭ ارتۋى 2-3 ەسە، اممياكتىڭ، كۇكىرتسۋتەكتىڭ، سو2-ءنىڭ ارتۋى انىقتالعان جوق. وسىدان كەيىن توپ شايقۇرىققا قالا شەكاراسىنا قاراي بەت الدى، ويتكەنى جەل سول باعىتتا ءجۇردى. شايقۇرىقتا بارلىق كورسەتكىشتەر بويىنشا نورمادان اسۋ انىقتالعان جوق. بۇل جاعداي توپتىڭ باقىلاۋىندا، ناتيجەلەرى تۋرالى قوسىمشا حابارلاناتىن بولادى» دەلىنگەن حابارلامادا.
"ادىرنا" ۇلتتىق پورتالى
