اسكەردە تاعى دا 21 جاستاعى سارباز قايتىس بولدى

"اكەسىمەن سويلەسكەندە ايتتى "ماعان قوڭىراۋ شالىپ، وق ءتيىپ وزىنە ءوزى اتىلىپ كەتتى" دەيدى. اسحانادا وتىرعاندا وزىنەن ءوزى اتىلىپ كەتتى. ەندى تۋىسىمىزدىڭ ۇيىنە قىزمەتىنەن ادامدار كەلىپ جاتىر دەگەسىن، ءبىز ايتتىق، "كەتپەسىن، تىلدەسەيىك، سويلەسەيىك، بىزگە نە ايتادى ەكەن" دەپ. سول كەزدە ايتتى، اسحانادا ەكى جىگىت وتىرادى، ناريادتى تاپسىرىپ. اسحانادا وتىرعان ۋاقىتتا دارحان مىلتىعىندا وق بولمايدى. ويناپ وتىرعان. ال قارسىلاسىندا وق بولادى، ول بايقاماي قالادى. اتقان ۋاقىتتا بىردەن باسىنا تيەدى", - دەيدى مارقۇمنىڭ تۋىسى ايزادا سەيداحمەتوۆا.

وقيعا استانادان 60 شاقىرىم جەردەگى پوليگوندا بولعان. كىشى مايلان دەپ اتالاتىن پوليگوندا اسكەريلەر وقۋ-جاتتىعۋ جيىنىن وتكىزىپ جاتىر ەكەن. كەلىسىمشارتپەن قىزمەت ەتەتىن دارحان مالىك سوندا كۇزەتتە بولدى. سۋىت كەلگەن حابارعا سەنە الماعان تۋىستارى شىداي الماي تاڭەرتەڭنەن اسكەري بولىمگە جەتتى. ولار اجالدىڭ سەرىگىنەن كەلگەنىنە كۇمان كەلتىرىپ وتىر. ويتكەنى كومانديرلەردىڭ جاۋابى تاڭنان بەرى سان وزگەردى دەيدى اكەسى.

"ماعان ايتقان اقپاراتى ءارتۇرلى بولىپ تۇر. تاڭەرتەڭ ءوزىنىڭ اۆتوماتى اتىلىپ كەتتى دەدى. ەندى ءبىر ساعات وتكەننەن كەيىن جولداس جىگىتتىڭ تاپانشاسى اتىلىپ قالدى دەدى. ەندى سۇيەكتى الىپ كەلە جاتقان وفيتسەرلەر قوقىس توگۋگە شىققان، سول جەردە ەكەۋى ءبىر-بىرىمەن ويناعان، سوندا اتىلىپ قالدى دەيدى. ءار ءتۇرلى اقپارات", - دەيدى مارقۇمنىڭ اكەسى.

دەسە دە، ازىرگە رەسمي نۇسقا وسى. ايرىقشا ماقساتتاعى مەملەكەتتىك كۇزەت كۇشتەرى قولباسىشىسىنىڭ ورىنباسارى جازاتايىم وقيعا دەپ سەندىرىپ تۇر. پوليگوندا بولماعاننان كەيىن پولكوۆنيك مىرزا ءوزى دە ءمان-جايدى اشىق بىلمەيدى. بىراق مارقۇمنىڭ تۋىستارىنا حابار ايتىپ، بارلىق ايقايدى ەستىپ جۇرگەن وسى كىسى.

"اسكەري تەرگەۋ باستالدى. ولار سەرىگى ەكەۋى قاراپايىم قاۋىپسىزدىك ەرەجەسىن بۇزعان. كەزەكشىلىك كەزىندە تاپانشانى ءجايدان ءجاي سىرتىنان الىپ شىعۋعا دا بولمايدى. ول ءوزىنىڭ سىرتىندا تۇرۋ كەرەك. ونى نەگە سۋىرىپ الىپ شىقتى، مەن بىلمەيمىن. اسكەري قىلمىستىق ءبولىمى وسى سۇراقتاردى انىقتايدى", - دەيدى قر مەملەكەتتىك كۇزەت قىزمەتى ايرىقشا ماقساتتاعى كۇشتەر قولباسشىسىنىڭ ورىنباسارى.

دارحاندى جازاتايىم اتىپ الدىم دەگەن سەرىگى بىردەن تەرگەۋگە الىنعانى حابارلاندى. ول مارقۇممەن بىرگە اسكەري ساپقا كەلگەن، ارتىق مىنەزى بايقالماعان بالا دەيدى جاۋاپتىلار. ەكەۋى دوس تا بولعان. قازىر سەرجانتتىڭ دەنەسى ءمايىتحانادا. تەكسەرىستەن كەيىن تۋعان جەرى ارقالىققا سۇيەگى جەتكىزىلەدى. تۇنگى كەزەگىنىڭ بىتۋىنە جارتى تاۋلىك قالعاندا ومىرىمەن قوشتاسقان سەرجانتتىڭ ارتىندا 20 جاستاعى ايەلى، ءتورت باۋىرى مەن اتا-اناسى قالدى.

”ادىرنا” ۇلتتىق پورتالى