Elorda mańynda ótken áskerı jattyǵý kezinde sarbaz oq tıip qaıtys boldy. Oqys oqıǵa keshe, 8 shildede Kishi Maılan dep atalatyn oqý-jattyǵý alańynda bolǵan, - dep habarlaıdy “Adyrna” ulttyq portaly KTK telearnasyna silteme jasap.
"Aıbyn" prezıdenttik polkiniń kelisimshartpen júrgen kishi serjantyn seriktesi baıqaýsyzda jazym qylypty. Ázirge áskerıler aıtyp otyrǵan resmı nusqa osy. Biraq 21 jastaǵy Darhan Máliktiń jaqyndary buǵan sengen joq. Sebebi tańnan beri syltaý san ózgerdi deıdi zar ılegen baýyrlary.
Kishi serjant Darhan Málik keshke túngi kezekshilikke ketken. Al kelesi kúni tańda 21 jastaǵy jigittiń tapanshadan atylyp qalǵany týraly sýyq habar jetti.
"Ákesimen sóıleskende aıtty "maǵan qońyraý shalyp, oq tıip ózine ózi atylyp ketti" deıdi. Ashanada otyrǵanda ózinen ózi atylyp ketti. Endi týysymyzdyń úıine qyzmetinen adamdar kelip jatyr degesin, biz aıttyq, "ketpesin, tildeseıik, sóıleseıik, bizge ne aıtady eken" dep. Sol kezde aıtty, ashanada eki jigit otyrady, narıadty tapsyryp. Ashanada otyrǵan ýaqytta Darhan myltyǵynda oq bolmaıdy. Oınap otyrǵan. Al qarsylasynda oq bolady, ol baıqamaı qalady. Atqan ýaqytta birden basyna tıedi", - deıdi marqumnyń týysy Aızada Seıdahmetova.
Oqıǵa astanadan 60 shaqyrym jerdegi polıgonda bolǵan. Kishi Maılan dep atalatyn polıgonda áskerıler oqý-jattyǵý jıynyn ótkizip jatyr eken. Kelisimshartpen qyzmet etetin Darhan Málik sonda kúzette boldy. Sýyt kelgen habarǵa sene almaǵan týystary shydaı almaı tańerteńnen áskerı bólimge jetti. Olar ajaldyń seriginen kelgenine kúmán keltirip otyr. Óıtkeni komandırlerdiń jaýaby tańnan beri san ózgerdi deıdi ákesi.
"Maǵan aıtqan aqparaty ártúrli bolyp tur. Tańerteń óziniń avtomaty atylyp ketti dedi. Endi bir saǵat ótkennen keıin joldas jigittiń tapanshasy atylyp qaldy dedi. Endi súıekti alyp kele jatqan ofıerler qoqys tógýge shyqqan, sol jerde ekeýi bir-birimen oınaǵan, sonda atylyp qaldy deıdi. Ár túrli aqparat", - deıdi marqumnyń ákesi.
Dese de, ázirge resmı nusqa osy. Aıryqsha maqsattaǵy memlekettik kúzet kúshteri qolbasyshysynyń orynbasary jazataıym oqıǵa dep sendirip tur. Polıgonda bolmaǵannan keıin polkovnık myrza ózi de mán-jaıdy ashyq bilmeıdi. Biraq marqumnyń týystaryna habar aıtyp, barlyq aıqaıdy estip júrgen osy kisi.
"Áskerı tergeý bastaldy. Olar serigi ekeýi qarapaıym qaýipsizdik erejesin buzǵan. Kezekshilik kezinde tapanshany jáıdan jáı syrtynan alyp shyǵýǵa da bolmaıdy. Ol óziniń syrtynda turý kerek. Ony nege sýyryp alyp shyqty, men bilmeımin. Áskerı qylmystyq bólimi osy suraqtardy anyqtaıdy", - deıdi QR Memlekettik kúzet qyzmeti aıryqsha maqsattaǵy kúshter qolbasshysynyń orynbasary.
Darhandy jazataıym atyp aldym degen serigi birden tergeýge alynǵany habarlandy. Ol marqummen birge áskerı sapqa kelgen, artyq minezi baıqalmaǵan bala deıdi jaýaptylar. Ekeýi dos ta bolǵan. Qazir serjanttyń denesi máıithanada. Tekseristen keıin týǵan jeri Arqalyqqa súıegi jetkiziledi. Túngi kezeginiń bitýine jarty táýlik qalǵanda ómirimen qoshtasqan serjanttyń artynda 20 jastaǵy áıeli, tórt baýyry men ata-anasy qaldy.
”Adyrna” ulttyq portaly
Басқалармен бөлісе отырыңыз
