بيىل وقۋ جىلىندا ۇلتتىق بىرىڭعاي تەستىلەۋدى 154 مىڭ تالاپكەر ەكى مۇمكىندىكتى قاتار ەسەپتەگەندە 276 مىڭ رەت تەست تاپسىردى. بۇل تۋرالى ورتالىق كوممۋنيكاتسيالار قىزمەتى الاڭىندا وتكەن جيىندا ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ مالىمدەدى، دەپ حابارلايدى “ادىرنا” ۇلتتىق پورتالى.
«تەستىلەۋ قورىتىندىسى بويىنشا 103 مىڭنان استام تالاپكەر شەكتى بالل جينادى، بۇل قاتىسۋشىلاردىڭ جالپى سانىنىڭ 67%-ىن قۇرايدى. وتكەن جىلمەن سالىستىرعاندا بۇل كورسەتكىش 7%-عا جوعارى بولدى. تەستىلەنۋشىلەردىڭ 51 مىڭعا جۋىعى (33%-ى) شەكتى بالل جيناي المادى. ۇبت ورتاشا بالى 66 بالدى قۇرادى.
بيىل ەڭ جوعارى بالل 139 بولدى. جوعارى بالدى قازاقستان بويىنشا 3 تالاپكەر جينادى. بىراق وكىنىشكە قاراي، ەكى تالاپكەردىڭ 139 بالعا اكادەميالىق ادالدىقتى ساقتاماي، ەرەجە بۇزۋ ارقىلى قول جەتكىزگەنى انىقتالىپ، ەكەۋىنىڭ دە ناتيجەسى جويىلدى. قازىر ءۇشىنشى تالاپكەردىڭ ناتيجەسى تەكسەرىلىپ جاتىر»، - دەدى ۇلتتىق تەستىلەۋ ورتالىعىنىڭ ديرەكتورى.
بەلگىلى بولعانداي، 3179 وقۋشى 120 بالدان جوعارى جيناعان. بيىل ۇبت-عا تىيىم سالىنعان زاتتاردى كىرگىزۋ جانە ۇبت ەرەجەلەرىن بۇزۋ بويىنشا 327 جاعداي تىركەلگەن.
”ادىرنا” ۇلتتىق پورتالى
