"بۇگىندە بىزدە اسكەرگە بارۋدان قاشاتىن ىنجىق، اسكەردەگى سىناقتارعا توزە بىلمەيتىن ءالجۋاز جىگىتتەر ءوسىپ كەلە جاتىر. بۇل قوعامدا اكەنىڭ ءرولىنىڭ تومەندەگەنىن كورسەتىپ وتىر". بۇل تۋرالى قر پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەسى لياززات قوجاحمەت مالىمدەدى.
"قازىر بىزدە مەكتەپتەردە ساباق بەرەتىن ۇستازداردىڭ 90 پايىزى ايەل ادامدار، اتا-انالار جينالىسىنا باراتىنداردىڭ باسىم بولىگى ايەل ادامدار. ياعني بالالاردىڭ تاربيەسىنە ارالاسىپ وتىرعان جەتەكشى ادامدار ايەلدەر بولعانىنا قاراماستان بۇگىندە بىزدە اسكەرگە بارۋدان قاشاتىن ىنجىق، اسكەردەگى سىناقتارعا توزە بىلمەيتىن ءالجۋاز جىگىتتەر ءوسىپ كەلە جاتىر. ياعني بۇل مەملەكەتتە ەر ادامداردىڭ، قوعامدا اكە ءرولىنىڭ تومەندەگەنىن كورسەتىپ وتىر. وسىعان بايلانىستى ءبىز ۇلتتىق كوميسسيا مۇشەسى رەتىندە ءار مەكتەپتىڭ جانىنان اكەلەر كەڭەسىن قۇرۋدى ۇسىنامىن. سەبەبى اكەلەر كەڭەسى جەكە ەر بالالاردى تاربيەلەپ، ولارعا قالاي اكە بولۋعا بولادى، قالاي وزىنە جاۋاپكەرشىلىك ۇستاۋعا بولادى، جىنىستىق تاربيە بەرۋ ماسەلەسىندە دە اكەلەر بالالارمەن بولەك جۇمىس ىستەۋى كەرەك دەپ ەسەپتەيمىن. ياعني اكەلەر كەڭەسى قاجەت. ودان بولەك اسكەري ومىرگە دايىندايتىن اسكەري كلۋبتار اشۋدى ۇسىنامىن", - دەيدى لياززات قوجاحمەت.
"ادىرنا" ۇلتتىق پورتالى
