"Búginde bizde áskerge barýdan qashatyn ynjyq, áskerdegi synaqtarǵa tóze bilmeıtin áljýaz jigitter ósip kele jatyr. Bul qoǵamda ákeniń róliniń tómendegenin kórsetip otyr". Bul týraly QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa múshesi Lıazzat Qojahmet málimdedi.
"Qazir bizde mektepterde sabaq beretin ustazdardyń 90 paıyzy áıel adamdar, ata-analar jınalysyna baratyndardyń basym bóligi áıel adamdar. Iaǵnı balalardyń tárbıesine aralasyp otyrǵan jetekshi adamdar áıelder bolǵanyna qaramastan búginde bizde áskerge barýdan qashatyn ynjyq, áskerdegi synaqtarǵa tóze bilmeıtin áljýaz jigitter ósip kele jatyr. Iaǵnı bul memlekette er adamdardyń, qoǵamda áke róliniń tómendegenin kórsetip otyr. Osyǵan baılanysty biz ulttyq komıssııa múshesi retinde ár mekteptiń janynan ákeler keńesin qurýdy usynamyn. Sebebi ákeler keńesi jeke er balalardy tárbıelep, olarǵa qalaı áke bolýǵa bolady, qalaı ózine jaýapkershilik ustaýǵa bolady, jynystyq tárbıe berý máselesinde de ákeler balalarmen bólek jumys isteýi kerek dep esepteımin. Iaǵnı ákeler keńesi qajet. Odan bólek áskerı ómirge daıyndaıtyn áskerı klýbtar ashýdy usynamyn", - deıdi Lıazzat Qojahmet.
"Adyrna" ulttyq portaly
