ساراپشىلار مەن كەيبىر مەكتەپتەردىڭ وكىلدەرى وقۋ جىلىن ماۋسىم ايىنىڭ سوڭىنا دەيىن ۇزارتۋدى ۇسىنىپ وتىر. بۇل ماسەلە 2022-2023 وقۋ جىلىنداعى ءبىلىم پروتسەسىن ۇيىمداستىرۋ ماسەلەلەرىن تالقىلاۋ ماقساتىندا ۇيىمداستىرىلعان دوڭگەلەك ۇستەلدە كوتەرىلدى، دەپ حابارلايدى "ادىرنا" ۇلتتىق پورتالى "Azattyq Ruhy"-نا سىلتەمە جاساپ.
ى. التىنسارين اتىنداعى ۇلتتىق ءبىلىم اكادەمياسى ءباسپاسوز قىزمەتى ءمالىم ەتكەندەي، وقۋ جىلىن ۇزارتۋدى ۇسىنىپ وتىرعان پەداگوگتەر قوسىمشا وقۋ اپتالارى ءبىلىم الۋشىلاردىڭ كۇندەلىكتى وقۋ جۇكتەمەسىن ازايتۋعا كومەكتەسەتىنىن العا تارتادى. سونىمەن قاتار وقۋ جىلىن ۇزارتۋ «كۇردەلى» تاقىرىپتاردى از ۋاقىتتا يگەرتۋ ماسەلەسىن شەشەدى. سونداي-اق جازعى دەمالىستىڭ ۇزاقتىعىن قىسقارتۋ ءبىلىم الۋشىلاردىڭ العان ءبىلىمىن جوعالتپاۋىنا سەپتىگىن تيگىزەدى.
«ءبىزدىڭ ەل وقۋ جىلىنداعى اپتا سانى ەڭ قىسقا مەملەكەتتەردىڭ ءبىرى – 34 وقۋ اپتاسى. سونىڭ ناتيجەسىندە رەسپۋبليكامىزدىڭ ءبىلىم الۋشىلارى جىلىنا 130 كۇننەن استام دەمالادى، بۇل الەمدەگى ەڭ ۇزاق دەمالىس دەسەك بولادى. سالىستىراتىن بولساق: مىسالى، يزرايلدە دەمالىستىڭ ۇزاقتىعى – 84 كۇن، وڭتۇستىك كورەيادا – 90 كۇن، جاپونيادا – 102 كۇن. زەرتتەۋلەردىڭ ناتيجەسى، بالالار ۇزاق ۇزىلىستەن كەيىن يگەرگەن ماتەريالدىڭ 25%-ىن ۇمىتاتىنىن كورسەتىپ وتىر. سوندىقتان ءبىز قازاقستاندىق مەكتەپتەردەگى وقۋ جىلىن 38 اپتاعا دەيىن ۇزارتۋدى ۇسىنامىز، ياعني، وقۋ جىلىن 15 تامىزدا باستاپ، 5 ماۋسىمدا اياقتاۋدى ۇسىنامىز. نەمەسە قىركۇيەك ايىندا ادەتتەگىدەي باستالسا، وندا 20 ماۋسىمعا دەيىن ۇزارتۋ كەرەك»، – دەدى «BINOM SCHOOL» مەكتەبىنىڭ باسقارۋشى ديرەكتورى ارايلىم ماعزۇموۆا.
«ادىلەت» رەسپۋبليكالىق ورتا جانە مەكتەپكە دەيىنگى ءبىلىم بەرۋ قاۋىمداستىعىنىڭ ءتورايىمى دينارا قۇدايقۇلوۆا دا ءوز سوزىندە وقۋ جىلىن ۇزارتۋ ءۇشىن وڭتايلى دەپ سانايتىن مەرزىمدەردى اتاپ ءوتتى.
«20-25 تامىزدان باستاپ بالالار شىعۋى كەرەك، شىن مانىندە ەكى اپتا بويى بالالار وقۋ پروتسەسىنە تولىعىمەن كىرىسىپ كەتە المايدى دەپ سانايمىز. 20-25 تامىزدان 5 ماۋسىمعا دەيىن كەم دەگەندە ۇزارتىلۋى كەرەك»، - دەدى دينارا قۇدايقۇلوۆا.
ساراپشىلار وقۋ جىلىنىڭ ۇزاقتىعىن ارتتىرۋ سىنىپتارداعى جۇكتەمەنى 1-2 ساعاتقا قىسقارتۋعا، كابينەت تاپشىلىعىن وڭتايلاندىرۋعا، ءبىلىم الۋشىلاردىڭ قوسىمشا ءبىلىم الۋىنا جانە پەداگوگتەردىڭ وزدەرىن كاسىبي دامىتۋىنا كوبىرەك ۋاقىت بولۋگە مۇمكىندىك بەرەتىنىنە سەنىمدى.
«ادىرنا» ۇلتتىق پورتالى.
