5 ماۋسىم كۇنى وتكەن رەسپۋبليكالىق رەفەرەندۋمدا شىمكەنتتەگى سايلاۋ ۋچاسكەلەرىندە جۇمىس ىستەگەن 2705 ادام ەڭبەكاقىسىن الا الماي ءجۇر. رەسپۋبليكانىڭ وزگە وڭىرلەرىندەگى ارىپتەستەرىنىڭ جالاقىسى تۇسكەنىن العا تارتقان كوميسسيا مۇشەلەرى بەلگىلى زاڭگەر ايگۇل ورىنبەكتەن كومەك سۇراعان، دەپ حابارلايدى «ادىرنا» ۇلتتىق پورتالى "Azattyq Rýhy"-نا سىلتەمە جاساپ.
«شىمكەنت قالاسىنداعى سايلاۋ ۋچاسكەلەرىنىڭ جۇمىسىن ۇيلەستىرىپ كەلە جاتقانىما 15 جىلداي بولدى. الدىڭعى سايلاۋلاردا ۋچاسكە مۇشەلەرىنىڭ ەڭبەكاقىسى ۋاقىتىلى تولەنەتىن. بيىلعى رەفەرەندۋمنىڭ اقشاسىن شىمكەنت قالاسى بويىنشا بىردە ءبىر ادام المادى. بىزگە كورشىلەس تۇركىستان وبلىسى الىپ قويعان، ورداباسىدا، سايرامدا، الماتى قالاسىندا تۋىستاردان دا سۇراپ كوردىك، ولارعا دا ۋاقىتىلى تولەنگەن. ءبىزدىڭ شىمكەنت قانا ەلدەن ەرەكشەلەنىپ ءجۇر»، - دەيدى كوميسسيا مۇشەلەرىنىڭ ءبىرى.
اتالعان ماسەلەگە قاتىستى رەداكتسيا ءتىلشىسى شىمكەنت قالالىق رەفەرەندۋم كوميسسياسىنا حابارلاستى. توراعا قايىربەك كۇنانباەۆتىڭ مالىمەتىنشە، رەفەرەندۋم مۇشەلەرى وسى ايدىڭ اياعىنا دەيىن ەڭبەكاقىلارىن الادى.
«شىمكەنت كالاسىندا 317 سايلاۋ كوميسسياسىندا 2705 مۇشە ەڭبەك ەتتى. بارلىق 2705 ادامنىڭ جالاقىسى بىرىڭعاي شىمكەنت كالالىك سايلاۋ كوميسسياسى اركىلى تولەنەدى. قازىرگى تاندا بۇكىل 317 كوميسسيانىڭ تابەلدەرى جيناقتالىپ، ولارعا جالاقى تولەۋ بويىنشا جۇمىستار اتقارىلۋدا. الايدا كوپتەگەن كوميسسيا مۇشەلەرىنىڭ جالاقى شوتتارى ەمەس، الەۋمەتتىك شوتتارىن، بۇعاتتالعان شوتتارىن بەرۋى، سول سياقتى كوميسسيا مۇشەلەرىنىڭ 30%-ىنىڭ اۋىسۋىنا بايلانىستى جالاقىنى اۋدارۋ ۋاقىت الىپ وتىر. رەفەرەندۋمدا جۇمىس اتكارعان مۇشەلەرگە جالاقى رەسپۋبليكالىق بيۋدجەتتەن تولەنەدى جانە ول تولىعىمەن جەتكىلىكتى. كوميسسيا مۇشەلەرىنىڭ جالاقىلارى زاڭعا سايكەس، 2022 جىلدىڭ 30 ماۋسىمىنا دەيىن تولەنەتىن بولادى»، - دەدى قايىربەك قۇنانباەۆ.
