قىتايدىڭ وڭتۇستىگىندەگى گۋاندۋن پروۆينتسياسىندا توتەنشە جاعدايدىڭ جوعارى دەڭگەيى جاريالاندى. كەيبىر اۋدانداردا وزەندەگى سۋ سوڭعى 50 جىلداعى رەكوردتى دەڭگەيگە جەتتى. مۇندا مەكتەپتەر، كەڭسەلەر مەن ءوندىرىس ورىندارى ۋاقىتشا جابىلدى، دەپ حابارلايدى "ادىرنا" ۇلتتىق پورتالى «حابار 24»-كە سىلتەمە جاساپ.
وزگە دە وڭىرلەردە نوسەر تولاستاماي تۇر. ەلدىڭ وڭتۇستىگى مەن شىعىسىنداعى 5 پروۆينتسيا مەن اۆتونوميالىق اۋدان جاپا شەككەن. قاتتى جاۋعان جاڭبىر مەن سۋ تاسقىنى كەسىرىنەن لاي كوشكىندەرى ءجۇردى. قۇتقارۋشىلار كۇنى-ءتۇنى تىنباي جۇمىس ىستەپ جاتىر. جالپى وسىنداي جاعداي جىل سايىن قايتالانىپ ءجۇر جانە مامانداردىڭ پىكىرىنشە احۋالدىڭ جاقساراتىن ءتۇرى جوق.
"كوپتەگەن زەرتتەۋلەر ىستىق كۇشەيە بەرىپ، ۇلكەن اۋماققا تارايتىنىن كورسەتتى. 2050 جىلعا دەيىن اپتاپ ىستىق كەزەڭدەرى بولاتىن جەردىڭ اۋدانى ءتورت ەسە ارتۋى مۇمكىن. سول كەزگە دەيىن نوسەر جاۋاتىن اۋدان دا ەكى ەسە ارتادى. كليماتتىڭ وزگەرۋىنە قاۋىپ ءتونىپ تۇر، مۇنى قازىردىڭ وزىندە سەزىپ تۇرمىز", – دەدى مەملەكەتتىك كليمات ورتالىعىنىڭ ديرەكتورى چاو تسينچەن.
بۇل قاتەرگە توتەپ بەرۋ ءۇشىن قىتايدا العاش رەت 2035 جىلعا دەيىن كليماتتىڭ وزگەرۋىنە بەيىمدەلۋدىڭ ۇلتتىق ستراتەگياسى جاريالاندى. سول كەزگە دەيىن ەلدە ءتۇرلى تابيعي اپاتتاردى باقىلاۋ جانە ەرتە كەزەڭدە الدىن الۋ جۇيەسى قۇرىلادى. جىل سايىن ودان قىتايدىڭ 3 ميلليونداي تۇرعىنىن زارداپ شەگىپ، ەل ەكونوميكاسى ورتا ەسەپپەن 45 ميلليراد دوللار شىعىنعا باتادى.
"بەيجىڭدە دە جاڭبىر ماۋسىمى باستالدى. مۇندا دا كەيدە سۋ تاسيدى، اسىرەسە شاھاردىڭ شەتكى اۋداندارىندا. مامانداردىڭ ەسەبىنشە، بيىل جازدا جاۋىن-شاشىن مولشەرى ادەتتەگىدەن 40 پروتسەنتكە كوپ بولماق. ىستىق كۇندەر سانى دا كوبەيىپ، اۋانىڭ ورتاشا تەمپەراتۋراسى 25 گرادۋس توڭىرەگىندە بولادى", – دەدى كوررەسپوندەنت بوتاگوز سىرعاباەۆا.
"ادىرنا" ۇلتتىق پورتالى
