الماتى وبلىسىنىڭ تۇرعىنى ءوزىن جول بويىندا قاعىپ كەتكەن جۇرگىزۋشىنىڭ ءبىر ايدان بەرى زاڭنان جالتارىپ جۇرگەنىن ايتادى، دەپ حابارلايدى "ادىرنا" ۇلتتىق پورتالى.
"Dalanews.kz" سايتىنىڭ جازۋىنشا، الماتى وبلىسى گۇلدالا اۋىلىنىڭ تۇرعىنى تازاگۇل جامەشوۆا ءبىر ايدان بەرى ەكىنشى توپتاعى مۇگەدەك. تاڭعى ساعات جەتىدە الماتى-كوكپەك-كوكتال تاس جولىندا جاياۋ جۇرگىنشىلەرگە ارنالعان جولاقتان ءوتىپ بارا جاتقان تازاگۇلدى «Chevrolet Aveo» جەڭىل كولىگى قاعىپ كەتەدى. الايدا كولىك جۇرگىزۋشىسى جاۋاپكەرشىلىكتەن جالتارىپ، زاڭ الدىندا جاۋاپ بەرمەگەن. ال جابىرلەنۋشىنىڭ جازعان ارىزىن جاۋاپتى ورگاندار ەسكەرۋسىز قالدىرعان. الماتى تۇرعىنى قۇقىق قورعاۋ ورگاندارىنىڭ زاڭدى بەلشەسىنەن باسىپ وتىرعانىن ايتادى.
تازاگۇلدىڭ ءىنىسى المازدىڭ ايتۋىنشا، بۇل وقيعا 2021 جىلى 10 قازاندا بولعان.
"تاڭەرتەڭگى ۋاقىتتا اپكەمدى جاياۋ جۇرگىنشىلەر جولاعىنان ءوتىپ بارا جاتقان جەرىنەن جەڭىل كولىك قاعىپ كەتتى. اپكەم 8 مەتر جەرگە ۇشىپ تۇسكەن. قاتتى سوققىدان سول جاق يىعى، ومىرتقاسى، جامباسى، بالتىر سۇيەگى سىندى. سەگىز اي بويى توسەكتەن تۇرا الماي جاتتى. قازىر ەكىنشى توپتاعى مۇگەدەك. تۇندە ۇيقىدان، كۇندىز كۇلكىدەن ايىرىلدى. جانىنا تەك اۋرۋدى باساتىن ءدارى عانا جاردەم بەرەدى", – دەيدى الماز.
تازاگۇل جامەشوۆانى قاققان كولىك ىشىندە ەكى ەر ادام بولعان. كولىك وقيعاسى بولعان كەزدە جۇرگىزۋشىنىڭ جانىندا وتىرعان جىگىت سىرتقا شىعىپ، قاتتى سوققىدان جول شەتىنە ۇشىپ تۇسكەن ايەلدىڭ باسىن كوتەرىپ: «تاتە، ءبىز ءسىزدى قاعىپ كەتتىك»، – دەگەن. وقيعا ورنىنا جەدەل-جاردەم كەلىپ، تازاگۇلدى تەز ارادا تالعار اۋدانىنىڭ اۋرۋحاناسىنا جەتكىزەدى.
"مەن اپكەمدى قاعىپ كەتكەن كەزدە، دەرەۋ سول جەرگە باردىم. كولىك جۇرگىزۋشىسى كەشىرىم سۇراپ، بارلىق جاۋاپكەرشىلىكتى ءوز موينىنا الاتىنىن، اپكەمنىڭ ەمىنە كومەكتەسەتىن ايتتى. باسقا تۇسكەنگە كونەسىڭ، ادامگەرشىلىككە سالىپ، ارىز جازباي-اق، قويايىن دەدىم. بىراق، جۇرگىزۋشىنىڭ ادامشىلىعى بولماي شىقتى. اپكەمنىڭ ەم-دومىنا كومەكتەسپەك تۇگىلى، قالىن سۇراۋعا جاراعان جوق", – دەيدى الماز.
الماز ءبىر كۇننەن كەيىن تالعار اۋدانى پوليتسياسىنا ارىز تۇسىرەدى. پوليتسيا «ءبارى زەرتتەلەدى» دەپ، ارىزدى الىپ قالادى.
«ارىز جازعاننان كەيىن پوليتسياعا حابارلاسىپ تۇردىق. ولار ءىس قارالىپ جاتقانىن ايتىپ ءجۇردى. وسى كەزدە اپكەمدى قاققان كولىك جۇرگىزۋشىسى بىزگە: «جازعان ارىزىڭدى قايتارىپ ال، ايتپەسە وزىڭە جامان بولادى»، – دەپ قوقان-لوقى كورسەتە باستادى. مەنىڭ ەكىنشى اپكەمنىڭ جۇمىسىنا 5-6 ەر ادام بارىپ قورقىتىپ كەتكەن. ءۇش اي وتكەننەن كەيىن پوليتسياعا بارعانىمىزدا، ءىستىڭ باياعىدا جابىلىپ قالعانىن ايتتى. ءبىز اڭ-تاڭ بولدىق. جاۋاپتى ورگان بىزگە ءتىپتى، بۇل تۋرالى ەسكەرتكەن دە جوق»، – دەيدى جابىرلەنۋشىنىڭ ءىنىسى الماز.
الماز تاعى دا ارىز جازادى. ادۆوكات جالدايدى. بىراق، سوتقا دەيىنگى تەرگەپ-تەكسەرۋ ورگاندارى ءالى كۇنگە دەيىن ءىستى سوزىپ، سوتقا جىبەرمەي وتىر.
"تالعار اۋدانى پوليتسيا تەرگەۋشىسى كولىك جۇرگىزۋشىنىڭ «مەنىڭ كىنام جوق» دەگەن ءسوزىن عانا ايعاق ەتىپ وتىر. ونىڭ جاياۋ جۇرگىنشىلەر جولىنا جاقىنداعاندا ساعاتىنا 60 كم ءجۇرۋى ءتيىس ەكەنىنە، باعدارشامدى ەلەمەگەنىنە نازار اۋدارىپ وتىرعان جوق. ەڭ سوراقىسى، پوليتسيا مەنىڭ اپكەمدى جاياۋ جۇرگىنشىلەر جولاعىنان ەمەس، ودان 30 مەتر قاشىقتىقتا، وتۋگە بولمايتىن جەردەن وتكەن، كولىكتىڭ استىنا ءوزى تۇسكەن ەتىپ قورىتىندى شىعارىپ وتىر. اپكەمدى قاعىپ كەتكەن كەزدە، ونىڭ باسىن ۇستاپ جىلاعان ەر بالا جۇرگىزۋشىنىڭ بالدىزى. ماعان ونى جۇرگىزۋشىنىڭ ايەلى ءوز اۋزىمەن ايتقان بولاتىن. بىراق، پوليتسيا ول جىگىتتىڭ ورنىنا كۋاگەردى الماستىرىپ، جازىقتى تاراپتىڭ پايداسىنا شەشىپ وتىر. ودان قالا بەرە، وقيعا ورنىنا جەتكەن جەدەل-جاردەمنەن ەشقانداي تۇسىنىكتەمە الماعان. ال، كولىك وقيعاسى بولعان جەردىڭ كارتاسى تەك جۇرگىزۋشىنىڭ ايتقانىمەن سىزىلدى. جۇرگىزۋشى اپكەمدى قاعىپ كەتكەننەن كەيىن ەكىنشى كۇنى-اق، قۇقىق قورعاۋ ورگاندارى تاراپىنان «ارەستكە» الىنعان كولىگىن جوندەۋدەن وتكىزىپ، ەمىن-ەركىن ءمىنىپ الدى. بۇل زاڭسىزدىقتىڭ قالاي ىسكە اسقانىنا تەرگەۋشى جاۋاپ بەرگەن جوق. تەك جۇرگىزۋشىنىڭ جاعىنا شىعىپ، ءبىزدىڭ ارىز-شاعىمىمىزدى قۇلاعىنا ىلمەدى", – دەيدى زاڭنان ادىلدىك ىزدەگەن الماز.
ونىڭ ايتۋىنشا، تازاگۇل جامەشوۆانى قاعىپ كەتكەن كولىك جۇرگىزۋشىسىنىڭ زاڭ ورگاندارىندا ىستەيتىن "تۋىسى" بار كورىنەدى. قۇقىق قورعاۋ ورگاندارىنىڭ ءىستى سونشا سوزبالاقتاعانىنا قاراعاندا، "تۋىستىقتىڭ" ءبىر سەبى ءتيىپ تۇرعانىنا كۇمان قالمايدى.
ء"ىستى اشۋدان گورى "جاۋىپ تاستاۋعا" قۇمار قۇقىق قورعاۋشى ورگانداردى كورگەندە، كوكەيگە "ادىلەتتى قازاقستانعا جەتۋ ءۇشىن ءالى قانشا جىلدى سارپ ەتەمىز؟" دەگەن سۇراق كەلەدى", – دەيدى اراشا ىزدەگەن الماز مىرزا.
"ادىرنا" ۇلتتىق پورتالى
