دەپۋتات امانجان جامالوۆ مينيسترلەر كابينەتىنىڭ ازىق-تۇلىك باعاسىن تەجەۋگە قاتىستى جۇرگىزىپ جاتقان شارالارىن سىنعا الدى. بۇل تۋرالى ول پارلامەنت پالاتالارىنىڭ بىرلەسكەن وتىرىسىندا ايتتى، دەپ حابارلايدى «ادىرنا» ءتىلشىسى.
ماجىلىسمەن ينفلياتسيا ماسەلەسىنە توقتالا كەلە، ەلىمىزدە حالىقتىڭ الەۋمەتتىك وسال توپتارىن قولداۋدىڭ ماقساتتى شارالارى قاجەت ەكەنىن اتاپ ءوتتى.
«ۇكىمەت باعانىڭ ءوسۋىن تەجەۋ ءۇشىن رەۆولۆەرلىك دەپ اتالاتىن جۇيەنى، باسقاشا ايتقاندا، ساۋدا جەلىلەرىن جەڭىلدىكپەن نەسيەلەۋدى قولدانادى. وعان 81 ميلليارد تەڭگە جۇمسالدى. تاعى 16,8 ميلليارد تەڭگە تۇراقتاندىرۋ قورلارىن قالىپتاستىرۋعا جۇمسالدى. بۇل سوما 100 ملرد تەڭگەگە جۋىق بولىپ تۇر. بىراق ەشقانداي ناتيجە جوق. باعا ءوستى. بۇل اقشانى ساۋدا جەلىلەرىنە ەمەس، حالىققا تىكەلەي تاراتقان دۇرىس. بىزدە 1 ميلليونعا جۋىق كەدەي ادام بار، باعانىڭ وسۋىنەن ولار ەڭ كوپ زارداپ شەگىپ وتىر، – دەدى دەپۋتات.
