يادرولىق قارۋعا تىيىم سالۋ تۋرالى شارتقا قاتىسۋشى مەملەكەتتەردىڭ العاشقى كەزدەسۋى 2022 جىلى 21-23 ماۋسىمدا ۆەنا قالاسىندا وتەدى. بۇل تۋرالى پرەمەر-ءمينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردى ايتتى، دەپ حابارلايدى «ادىرنا» ءتىلشىسى.
«شارتتىڭ 2021 جىلى قاڭتاردا كۇشىنە ەنۋى بۇۇ-عا مۇشە مەملەكەتتەردىڭ يادرولىق قارۋدى دەليگيتيماتسيالاۋ – ونى زاڭنان تىس دەپ جاريالاۋ جونىندە ناقتى شارالار قابىلداۋعا دەگەن شەشىمىن كورسەتەتىن، كۇتىلگەن سيگنال بولدى. بۇل – يادرولىق سىناقتاردىڭ بارلىق زياندى سالدارىن باستان كەشىرگەن حالقىمىز ءۇشىن ەرەكشە وقيعا. بۇۇ باس اسسامبلەياسىنىڭ 75-ءشى سەسسياسىندا سويلەگەن سوزىندە قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ اتاپ وتكەندەي، «بۇگىندە قازاقستان ءوزىنىڭ يادرولىق زىمىران ارسەنالىنان ءوز ەركىمەن باس تارتقان جانە الەمدەگى ەڭ ءىرى اتوم سىناق پوليگونىن جاپقان جاۋاپتى مەملەكەت رەتىندە بۇكىل الەم ءۇشىن مىسال جانە ۇلگى». ۋكرايناداعى قازىرگى اسكەري قاقتىعىس، يادرولىق قارۋدى قايتارۋ تۋرالى اڭگىمەلەر جانە ونى قولدانۋدىڭ قاۋىپتەرى ءبىزدى ادامزاتتىڭ ۇجىمدىق وسالدىعى تۋرالى جانە قىرعىنعا ۇشىراتاتىن قارۋعا تىيىم سالۋ مەن جويۋدىڭ شۇعىل قاجەتتىلىگى تۋرالى ويلانۋعا ءماجبۇر ەتەدى. ءبىز بارلىق مەملەكەتتەردى، سونىڭ ىشىندە يادرولىق دەرجاۆالاردى، بۇۇ-نىڭ 100 جىلدىق مەرەيتويىنا وراي، 2045 جىلعا دەيىن يادرولىق قارۋدى تولىق جويۋدىڭ كەزەڭدىك جوسپارىن ازىرلەۋگە شاقىرامىز. وسى ماقساتقا قول جەتكىزۋ تۋرالى ۇسىنىستار مەن ۋاعدالاستىقتار ياقتسش-نىڭ ءبىرىنشى كونفەرەنتسياسىنىڭ دا، ياقتش-نىڭ شولۋ كونفەرەنتسياسىنىڭ دا قورىتىندى قۇجاتتارىندا كورسەتىلۋى مۇمكىن. قازاقستان وسى يگى ماقساتقا قول جەتكىزۋ جولىندا كوپتەگەن ساياسي جانە تەحنيكالىق كەدەرگىلەر بار ەكەنىن تۇسىنەدى. وسى باعىتتا پراكتيكالىق جۇمىسقا كىرىسۋدى قاجەت دەپ سانايمىز»،– دەدى ول.
