قازاقستان رەسپۋبليكاسى قارجى مينيسترلىگىنىڭ مەملەكەتتىك كىرىستەر كوميتەتى ەل اۋماعىنان كۇنباعىس مايىن اكەتۋگە شەكتەۋ قويىلعانىن جاريالادى، دەپ حابارلايدى "ادىرنا" ۇلتتىق پورتالى "Azattyq Ruhy"-نا سىلتەمە جاساپ.
اۋىل شارۋاشىلىعى ءمينيسترىنىڭ بۇيرىعىمەن قازاقستان اۋماعىنان كۇنباعىس مايىن اكەتۋگە 18 ماۋسىمنان باستاپ 31 تامىزعا دەيىن شەكتەۋلەر ەنگىزىلدى.
"كۇنباعىس مايىن قازاقستان رەسپۋبليكاسىنىڭ اۋماعىنان اكەتۋگە ساندىق شەكتەۋلەر باعالاردى تۇراقتاندىرۋ جانە سىرتقى نارىقتاردا جوعارى سۇرانىسقا بايلانىستى نارىقتا تاپشىلىقتىڭ تۋىنداۋىن بولدىرماۋ ماقساتىندا ەنگىزىلدى", - دەپ كورسەتتى مەملەكەتتىك كىرىستەر كوميتەتىنىڭ ءباسپاسوز قىزمەتى.
جوعارىدا كورسەتىلگەن بۇيرىققا سايكەس كۇنباعىس مايىن قازاقستان رەسپۋبليكاسىنىڭ اۋماعىنان اكەتۋ قازاقستان رەسپۋبليكاسى اۋىل شارۋاشىلىعى مينيسترلىگى اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ اۋماقتىق بولىمشەلەرىمەن بەرىلەتىن فيتوسانيتاريالىق سەرتيفيكات بولعان كەزدە عانا جۇزەگە اسىرىلاتىن بولادى.
"ادىرنا" ۇلتتىق پورتالى
