جاڭا وزگەرىستەر ميرزياەۆتىڭ الدىڭعى پرەزيدەنتتىك مەرزىمىن "نولگە" تەڭەيدى — ۆيتسە-سپيكەر

2162
Adyrna.kz Telegram
فوتو: اشىق دەرەككوز
فوتو: اشىق دەرەككوز

وزبەكستان سەناتىنىڭ ۆيتسە-سپيكەرى سادىق سافاەۆ ەل كونستيتۋتسياسىنا ەنەتىن وزگەرىستەر مەملەكەتتىڭ قازىرگى باسشىسى شاۆكات ميرزياەۆتىڭ الدىڭعى پرەزيدەنتتىك مەرزىمىن "نولگە" تەڭەيدى دەدى. بۇل تۋرالى ول "Kun.uz" باسىلىمىنا بەرگەن سۇحباتىندا ايتتى، دەپ حابارلايدى "ادىرنا" ۇلتتىق پورتالى.

بۇل تۋرالى "ازاتتىق" باسىلىمى جازدى.

"قابىلدانسا، جاڭا كونستيتۋتسيا بارلىق ازاماتقا، سونىڭ ىشىندە قازىرگى پرەزيدەنتكە دە سايلاۋعا جاڭا كونستيتۋتسيا بويىنشا تۇسۋگە مۇمكىندىك بەرەدى. پرەزيدەنت بۇل مۇمكىندىكتى پايدالانا ما، جوق پا – بۇل ەڭ اۋەلى وسى كىسىنىڭ وزىنە جانە ونى ۇسىناتىن پارتياعا بايلانىستى. بىراق ونىڭ مۇنداي قۇقىعى بولادى" - دەدى سادىق سافاەۆ.

ۆيتسە-سپيكەر سويتە تۇرا ميرزياەۆتىڭ ءۇشىنشى مەرزىمگە بارعانى دەپ دۇرىس ەكەنىن ايتتى.

"ەگەر مەنىڭ جەكە پىكىرىمدى سۇراساڭىز، ءبىز قازىر وتە قاۋىپتى الەمدە ءومىر ءسۇرىپ جاتىرمىز. مەن مۇنى تاجىريبەمە سۇيەنىپ جانە حالىقارالىق جاعدايدى ساراپتايتىن ادام رەتىندە ايتىپ وتىرمىن. كۇن سايىن كۇردەلەنىپ بارادى. مۇنىڭ جاعىمسىز اسەرى ءبىزدىڭ ەلدى اينالىپ وتپەيدى. بىراق ءبىز بۇعان قاراماستان رەفورمالاردى جالعاستىرا بەرۋىمىز كەرەك. وسى رەفورمالاردى باستاعان ادامنىڭ ولاردى اياعىنا دەيىن جەتكىزۋىنە جول بەرىلۋى كەرەك ەكەنىنە سەنىمدىمىن. مەن بۇل جونىندە كەز كەلگەن اداممەن، كەز كەلگەن جەردە داۋلاسا الامىن" دەدى ول.

بۇل – وزبەكستانداعى ءىرى لاۋازىمدى قىزمەتكەردىڭ كونستيتۋتسيالىق وزگەرىستەر تۋرالى العاش رەسمي پىكىر ءبىلدىرۋى.

وزبەكستاننىڭ دا، شەتەلدىڭ دە ساراپشىلارى ميرزياەۆ باستاماشىل بولعان كونستيتۋتسيالىق وزگەرىستەر شىن مانىندە ونىڭ پرەزيدەنتتىك مەرزىمىن ۇزارتۋعا ارنالعانىن ايتادى. ەلدىڭ بۇرىنعى پرەزيدەنتى يسلام كاريموۆ تۇسىندا دا وسىلاي جاسالعان. بىراق سافاەۆتىڭ مالىمدەمەسىنە دەيىن وزبەك شەنەۋنىكتەرى وزگەرىستەردى نەگىزدەۋدە ادام قۇقىعىنا، رەفورمالاردى جەدەلدەتۋ ىسىنە سىلتەيتىن.

بىلتىر قازاندا ەكىنشى مەرزىمگە پرەزيدەنت بولىپ سايلانعان شاۆكات ميرزياەۆ ازىرگە 2026 جىلعا دەگەن جوسپارىن ايتا قويمادى. كورشى قازاقستاننىڭ پرەزيدەنتى قاسىم-جومارت توقاەۆ ەكى مەرزىمنەن ارتىق وتىرمايتىنىن مالىمدەسە، ميرزياەۆ مۇنداي ۋادە بەرمەگەن.

سافاەۆتىڭ بۇل مالىمدەمەسىنىڭ الدىندا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ميسسياسى وزبەكستانداعى سايلاۋ تۋرالى قورىتىندى ەسەبىن جاريالاعان ەدى.

كوميسسيا سايلاۋ كەزىندە شىنايى باسەكەنىڭ بولماعانىن، جاڭا جانە وپپوزيتسيالىق پارتيالاردىڭ تىركەلۋىنە جول بەرىلمەگەنىن ايتقان.

 

 «ادىرنا» ۇلتتىق پورتالى.

پىكىرلەر