قازاقستاندا قاي جەرلەردە دەمالۋعا بولادى؟

2557
Adyrna.kz Telegram

جەر كولەمى بويىنشا 9-شى ورىندا تۇرعان قازاقستان ساياحاتشىلارعا دەمالۋعا ارنالعان ءتۇرلى كوركەم جەرلەرءدى ۇسىنادى. قىستا شاڭعى تەبۋ بولسا،  جازدا كولگە شومىلۋ، تاۋعا شىعۋ سەكىلدى دەمالىس تۇرلەرىنىڭ ءبارى بار.

  جاعاجاي كۋرورتىنا بارعىڭىز كەلسە، اقتاۋ قالاسىنا بارىڭىز. كاسپي تەڭىزىنىڭ جاعالاۋىن تاماشالاۋدىڭ ءوزى ادامعا كۇش سىيلايدى. سونداي-اق، بۇل قالادا بەسجۇلدىزدى - “Rixos Water World Aktau” قوناق ءۇيى بار. قوناقتارعا ارنالعان فيتنەس ورتالىقتار، باقشالار، باسسەيندەر مەن ءتۇرلى مەيرامحانالار سالىنعان. كۇن سايىن تاڭەرتەڭ تاڭعى اس ۇسىنىلادى. قوناق ۇيدە ۇستەل تەننيسى مەن تەننيس ويناۋعا بولادى. “Rixos Water World Aktau” - اقتاۋ اۋەجايىنان 43 كم قاشىقتىقتا ورنالاسقان. باعالارى بولمەلەرىنە قاراي ءارتۇرلى بولۋى مۇمكىن. ەگەر، ارنايى جەكەمەنشىك تۋرلارمەن الماتى قالاسىنان بارار بولساڭىز، 2 ادامعا 6 كۇنگە شامامەن 977000 شاماسىندا كورسەتىلگەن. بۇل تۋردىڭ ىشىنە مىنالار كىرەدى:

ۇشاق باعاسى;

قوناق ۇيگە ورنالاستىرۋ;

توپتىق ترانسفەرلەر;

تاماقتاندىرۋ;

مەديتسينالىق ساقتاندىرۋ.

  وسىعان قاراپ، تۋرمەن باراسىز با، نەمەسە ءوزىڭىز جەكە بارعاندى قۇپ كورەسىز بە، ونى شەشۋ ءوز ەركىڭىزدە.

  سونداي-اق، الماتى مەن نۇر-سۇلتان قالاسىندا دا دەمالاتىن جەرلەر وتە كوپ. ەلىمىزدىڭ استاناسى ءزاۋلىم عيماراتتارى مەن دامىعان ينفراقۇرىلىم ورتالىعىمەن ايگىلى بولسا، ال الماتى قالاسى جاسىل جەلەكتەر مەن باقتاردىڭ كوپتىگىمەن، بيىك تاۋلارىمەن كوز تارتادى. شاڭعى دەمالىسىن ۇناتاتىندار تانىمال “شىمبۇلاق” كۋرورتىنا بارۋى كەرەك. بۇل كۋرورت -  ىلە الاتاۋىنىڭ اسەم شاتقالىندا تەڭىز دەڭگەيىنەن 2260 مەتر بيىكتىكتە، الماتىنىڭ ورتالىعىنان كولىكپەن 15 مينۋتتىق جەردە ورنالاسقان. بۇگىندە شىمبۇلاققا جاستا، كارىدە ءجيى بارادى.

  ال بارىمىزگە تانىمال بۋرابايدا دەمالۋ قۇنى قانشا؟ borovoe.kz سايتىنىڭ ايتۋى بويىنشا، بۋرابايدا دەمالۋدى كەز كەلگەن ادامنىڭ قالتاسى كوتەرەدى. ساياحات تۋرالى تۇسىنىككە يە بولۋ ءۇشىن ءسىز تۋردىڭ قۇنىن عانا ەمەس، سونىمەن قاتار قالانىڭ وزىندە تۇرۋدى، جولدىڭ قۇنىن ءبىلۋىڭىز كەرەك. بۋرابايداعى شيپاجايلاردىڭ باعاسىن تۋروپەراتوردان الۋعا بولادى، ال ەندى كولىك پەن تاماق قۇنىنا زەر سالايىق:

  بەنزين باعاسى بۇل جاقتا قىمبات، سول ءۇشىن تاكسي قۇنى دا سوعۇرلىم كوپ. تاماق قۇنىنا كەلەر بولساق، ول مەيرامحانالاردىڭ دارەجەلەرىنە بايلانىستى بولادى. تۇسكى اس قۇنى شامامەن 2500تگ قۇرايدى. ال دۇكەندەردەگى ازىق-تۇلىك باعاسى بارلىق جەردە بىردەي. الايدا، اقشاڭىزدى ۇنەمدەگىڭىز كەلسە، بىردەن بازارعا بارساڭىز بولادى. ول جاقتىڭ باعاسى دۇكەندەردەر قاراعاندا الدەقايدا تومەن. ال ەندى بۋرابايدىعى قوناق-ءۇي مەن شيپاجايلاردىڭ باعالارىن ايتا كەتەيىن:

• “سامال” قوناق ءۇيى - 8000تگ;

• “التىن-كۇل” قوناق ءۇيى - 6000تگ;

• “شۋچينسكي» شيپاجايى - 8500تگ;

• “جاسىل ورمان” شيپاجايى - 9500تگ;

“الەم+” قوناق ءۇيى - 7000تگ;

“جۇمباقتاس” قوناق ءۇيى - 5500تگ.

   سونداي-اق، “التىن ەمەل”، “كولساي”، “شارىن كانونى”، “تاۋتۇرگەن” سەكىلدى جەرلەر وتباسىڭىزبەن شىعىپ دەمالىپ، بوي سەرگىتىپ، تاماشا تابيعاتپەن تىلدەسىپ قايتاتىن كورىكتى جەرلەر.  مىسالى، الماتى وبلىسى ەڭبەكشىقازاق اۋدانى، تۇرگەن اۋىلدىق وكرۋگى قۇرامىنداعى اۋىل تاۋتۇرگەن - دەمالىپ، بوي جازىپ قايتۋعا ارنالعان تاپتىرماس جەر. بۇل جەردە ءوزىڭىز بالىق اۋلاپ، سونى قۋىرىپ، ءوزىڭىز جەي الاسىز. سونىمەن قاتار، ول جاقتا قوناقتارعا ارنايى كيىز ۇيلەر تىگىلگەن. قازاقي اتموسفەرانى سەزىنگىڭىز كەلسە، وسى جەرگە اتتاەساڭىز بولادى.

  ەڭ الدىمەن دەمالىسقا اتتانباس بۇرىن، ءبىرىنشى اۋا-رايى بولجامىمەن تانىسىپ العانىڭىز ءجون. سومكەڭىزدى جيناپ، قازاقستاننىڭ قاي جەرىندە دەمالامىن دەپ ويلاپ وتىرساڭىز، ءوز قىزىعۋشىلىعىڭىزعا قاراڭىز. سەبەبى، قازاقستاندا زاماناۋي جەرلەر دە، كونە تاريحي جەرلەر دە، تابيعاتپەن بايلانىسقا شىعاتىن جەرلەر دە وتە كوپ. قاراجاتىڭىزعا ساي ءار جەردە دەمالۋعا مۇمكىنشىلىگىڭىز بار، تەك دۇرىس باعىتتى، دۇرىس جەردى انىقتاپ الساڭىز بولعانى.

 

روزا داۋلەتحانقىزى،

«ادىرنا» ۇلتتىق پورتالى

پىكىرلەر