Jer kólemi boıynsha 9-shy orynda turǵan Qazaqstan saıahatshylarǵa demalýǵa arnalǵan túrli kórkem jerlerdi usynady. Qysta shańǵy tebý bolsa, jazda kólge shomylý, taýǵa shyǵý sekildi demalys túrleriniń bári bar.
Jaǵajaı kýrortyna barǵyńyz kelse, Aqtaý qalasyna baryńyz. Kaspıı teńiziniń jaǵalaýyn tamashalaýdyń ózi adamǵa kúsh syılaıdy. Sondaı-aq, bul qalada besjuldyzdy - “Rixos Water World Aktau” qonaq úıi bar. Qonaqtarǵa arnalǵan fıtnes ortalyqtar, baqshalar, basseınder men túrli meıramhanalar salynǵan. Kún saıyn tańerteń tańǵy as usynylady. Qonaq úıde ústel tennısi men tennıs oınaýǵa bolady. “Rixos Water World Aktau” - Aqtaý áýejaıynan 43 km qashyqtyqta ornalasqan. Baǵalary bólmelerine qaraı ártúrli bolýy múmkin. Eger, arnaıy jekemenshik týrlarmen Almaty qalasynan barar bolsańyz, 2 adamǵa 6 kúnge shamamen 977000 shamasynda kórsetilgen. Bul týrdyń ishine mynalar kiredi:
• ushaq baǵasy;
• qonaq úıge ornalastyrý;
• toptyq transferler;
• tamaqtandyrý;
• medıınalyq saqtandyrý.
Osyǵan qarap, týrmen barasyz ba, nemese ózińiz jeke barǵandy qup kóresiz be, ony sheshý óz erkińizde.
Sondaı-aq, Almaty men Nur-Sultan qalasynda da demalatyn jerler óte kóp. Elimizdiń astanasy záýlim ǵımarattary men damyǵan ınfraqurylym ortalyǵymen áıgili bolsa, al Almaty qalasy jasyl jelekter men baqtardyń kóptigimen, bıik taýlarymen kóz tartady. Shańǵy demalysyn unatatyndar tanymal “Shymbulaq” kýrortyna barýy kerek. Bul kýrort - Ile Alataýynyń ásem shatqalynda teńiz deńgeıinen 2260 metr bıiktikte, Almatynyń ortalyǵynan kólikpen 15 mınýttyq jerde ornalasqan. Búginde Shymbulaqqa jasta, káride jıi barady.
Al bárimizge tanymal Býrabaıda demalý quny qansha? borovoe.kz saıtynyń aıtýy boıynsha, Býrabaıda demalýdy kez kelgen adamnyń qaltasy kóteredi. Saıahat týraly túsinikke ıe bolý úshin siz týrdyń qunyn ǵana emes, sonymen qatar qalanyń ózinde turýdy, joldyń qunyn bilýińiz kerek. Býrabaıdaǵy shıpajaılardyń baǵasyn týroperatordan alýǵa bolady, al endi kólik pen tamaq qunyna zer salaıyq:
Benzın baǵasy bul jaqta qymbat, sol úshin taksı quny da soǵurlym kóp. Tamaq qunyna keler bolsaq, ol meıramhanalardyń dárejelerine baılanysty bolady. Túski as quny shamamen 2500tg quraıdy. Al dúkenderdegi azyq-túlik baǵasy barlyq jerde birdeı. Alaıda, aqshańyzdy únemdegińiz kelse, birden bazarǵa barsańyz bolady. Ol jaqtyń baǵasy dúkenderder qaraǵanda áldeqaıda tómen. Al endi Býrabaıdyǵy qonaq-úı men shıpajaılardyń baǵalaryn aıta keteıin:
• “Samal” qonaq úıi - 8000tg;
• “Altyn-kúl” qonaq úıi - 6000tg;
• “Shýchınskıı» shıpajaıy - 8500tg;
• “Jasyl orman” shıpajaıy - 9500tg;
• “Alem+” qonaq úıi - 7000tg;
• “Jumbaqtas” qonaq úıi - 5500tg.
Sondaı-aq, “Altyn emel”, “Kólsaı”, “Sharyn kanony”, “Taýtúrgen” sekildi jerler otbasyńyzben shyǵyp demalyp, boı sergitip, tamasha tabıǵatpen tildesip qaıtatyn kórikti jerler. Mysaly, Almaty oblysy Eńbekshiqazaq aýdany, Túrgen aýyldyq okrýgi quramyndaǵy aýyl – Taýtúrgen - demalyp, boı jazyp qaıtýǵa arnalǵan taptyrmas jer. Bul jerde ózińiz balyq aýlap, sony qýyryp, ózińiz jeı alasyz. Sonymen qatar, ol jaqta qonaqtarǵa arnaıy kıiz úıler tigilgen. Qazaqı atmosferany sezingińiz kelse, osy jerge attaesańyz bolady.
Eń aldymen demalysqa attanbas buryn, birinshi aýa-raıy boljamymen tanysyp alǵanyńyz jón. Sómkeńizdi jınap, Qazaqstannyń qaı jerinde demalamyn dep oılap otyrsańyz, óz qyzyǵýshylyǵyńyzǵa qarańyz. Sebebi, Qazaqstanda zamanaýı jerler de, kóne tarıhı jerler de, tabıǵatpen baılanysqa shyǵatyn jerler de óte kóp. Qarajatyńyzǵa saı ár jerde demalýǵa múmkinshiligińiz bar, tek durys baǵytty, durys jerdi anyqtap alsańyz bolǵany.
Roza DÁÝLETHANQYZY,
«Adyrna» ulttyq portaly
