رينات ريفحاتۇلى زايتوۆتىڭ باسشىلىعىنداعى «الاتاۋ» ءداستۇرلى ونەر تەاترى ءتول ونەرىمىزدىڭ ورنىن ايشىقتاي ءتۇسۋ، قاناتىن كەڭگە جايۋ ماقساتىندا 2022 جىلدىڭ 10-28 ماۋسىم ارالىعىندا «اگۋگاي مەن يگيگاي» اتتى حالىق ەرتەگىلەرى مەن ءداستۇرلى اندەردەن قۇرالعان بالالارعا ارنالعان مۋزىكالىق قويىلىم (2022 – بالالار جىلى اياسىندا), «التىباقان» ويىن-ساۋىق ءان كەشى، ايتىسكەر اقىن رينات زايتوۆتىڭ «مەن سەندەردى جاقسى كورەمىن، ادامدار» اتتى مۋزىكالىق كەشى، سونداي-اق «ايمان-شولپان» مۋزىكالىق كومەدياسىمەن (پرەمەرا) نۇر-سۇلتان، پاۆلودار، ەكىباستۇز، سەمەي، كۋرچاتوۆ، اباي جانە اياگوزگە گاسترولدىك ساپارلارمەن بارۋدى جوسپارلاعان بولاتىن. بۇل ساپاردىڭ تەاتر ءۇشىن تۇڭعىش رەت ەكەنىن ايتا كەتكەن ءجون. تەاتردىڭ كوركەمدىك جەتەكشىسى – جۇلدىزبەك جۇمانباي.
«الاتاۋ» ءداستۇرلى ونەر تەاترىنىڭ جاڭا فورماتتاعى قويىلىمدارىنا كورەرمەندەر ءتانتى بولىپ، اق جارما تىلەكتەرىن ايتىپ، وي-پىكىرلەرىن ورتاعا سالدى:
قر مادەنيەت جانە سپورت ۆيتسە-ءمينيسترى نۇرقيسا داۋەشوۆ: «الاتاۋ» ءداستۇرلى ونەر تەاترىنىڭ ەلوردامىزداعى العاشقى گاسترولدىك ساپارى ءساتتى بولدى دەپ ويلايمىن. بارشا جۇرتشىلىققا ءداستۇرلى ونەرىمىزدى، مادەنيەتىمىزدى جوعارعى دەڭگەيدە كورسەتتى. وسىنداي تالانتتار بار جەردە ءبىزدىڭ ونەرىمىز ماڭگىلىك بولادى. ونەر يەلەرىنىڭ ەڭبەكتەرىن ارقاشان باعالاپ، مەملەكەت باسشىسىمەن قولداۋ بويىنشا جۇمىستاردى بىرگە اتقارامىز دەگەن سەنىمدەمىن. تەاتر ۇجىمىنا ءوز اتىمنان شەكسىز العىسىمدى ايتامىن. ارقاشان بيىكتە بولايىق!».
قر پارلامەنتى ءماجىلىسىنىڭ دەپۋتاتى ەرلان سايروۆ: «قويىلىم-كونتسەرتتەن كەرەمەت اسەر الدىم. ءبىزدىڭ سالت-ءداستۇرىمىزدىڭ، ءتول مادەنيەتىمىزدىڭ جاڭا كورىنىسى. ەڭ الدىمەن وسى ۇجىمدى قۇتتىقتايمىن. ەكىنشىدەن، وسى ءبىر تىڭ باعىتتاعى قويىلىمداردى قازاقستان بويىنشا ناسيحاتتاۋ كەرەك. تابىستارعا جەتە بەرسىن، ءبىز دە كومەكتەسۋگە دايىنبىز جانە تىلەكتەسپىز».
«جاستار» تەاترىنىڭ ديرەكتورى، مەملەكەتتىك سىيلىقتىڭ يەگەرى ءادىل احمەتوۆ: «الاتاۋدىڭ بوكتەرىنەن، الماتىدان كەلگەن «الاتاۋ» ءداستۇرلى ونەر تەاترىنىڭ «ايمان-شولپان» مۋزىكالىق كومەدياسىن تاماشالاپ، ءبىر راحاتتانىپ قالدىق. وسى ورايدا رينات زايتوۆ پەن جۇلدىزبەك جۇمانبايدىڭ ۇلكەن ەرلىككە بارعاندارىنا كۋا بولدىم. تۋرا كەشەگى جۇمات شانين، تەمىربەك جۇرگەنوۆتەردىڭ ىستەرىن اتقارىپ وتىر. ويتكەنى اكتەرلەر بار، ءداستۇرلى انشىلەر بار، بيشىلەر بار، بارلىعىن بىرىكتىرىپ، ۇجىم ەتىپ، ءبىر دۇنيە قىلىپ شىعارۋ ۇلكەن ەڭبەك. ارىپتەستەرىمە العىسىمدى بىلدىرەمىن. تەاتردىڭ بولاشاعى زور. قازاقستاندا مۇنداي ۇلتتىق تەاتر ماڭگى ءومىر سۇرەدى. ءبىزدىڭ ونەرىمىزدىڭ ەڭ شىڭىندا تۇرۋ كەرەك دەپ ەسەپتەيمىن. ساتتىلىك!».
م. گوركي اتىنداعى مەملەكەتتىك اكادەميالىق ورىس دراما تەاترىنىڭ ديرەكتورى ەرنار جۇماتاەۆ: «بۇگىنگى «ايمان-شولپان» مۋزىكالىق كومەدياسى ءوزىنىڭ ەرەكشەلىگىمەن ءوتتى. ەلوردا تورىندە، «جاستار» تەاترىندا كورەرمەندەردىڭ قۋانىشتارىندا شەك جوق. رەجيسسەردىڭ وزىندىك شەشىمى بار. اكتەرلەردەن بولەك، ءداستۇرلى انشىلەر جانە ت.ب. قاتىستى. تەاتردىڭ العا قويعان ماقساتى بار، وزىندىك ءستيلى بار. قوعاممەن بايلانىستىرا وتىرىپ، ءبىراز ايتار ويى بولدى».
«ا. ي.» تەاترىنىڭ ديرەكتورى، قر ەڭبەك سىڭىرگەن قايراتكەرى، ءانشى، اكتريسا ايگۇل يمانباەۆا: «بىرىنشىدەن، مەن «الاتاۋ» ءداستۇرلى ونەر تەاترىنىڭ تىلەكشىسىمىن، كورەرمەنىمىن. شىنىن ايتۋ كەرەك. ەلورداعا كەلدى دەگەندى ەستىپ، جۇمىسىمدى تاستاي سالىپ كەلدىم. تەاتردىڭ ءوزىنىڭ ستيليستيكاسىن قالىپتاستىرىپ كەلە جاتقانىن بۇگىن «ايمان-شولپان» مۋزىكالىق كومەدياسىنان كوردىك. ءبىزدىڭ سالت-سانا، ادەت-عۇرىپ، قازاقتىڭ ىرىمى، قازاقتىڭ قانىنا بىتكەن قاسيەتتەرى، ءتىپتى بالا كۇنىمىزدە ويناعان جوعالىپ كەتكەن ويىندارىمىز، جالپى قازاقتىڭ بولمىسى «ايمان-شولپان» قويىلىمىندا قامتىلعان. «ايمان-شولپان» بۇرىننان قويىلىپ كەلەدى. بىراق قازىرگى الماعايىپ زاماندا بۇل قويىلىم جاڭاشا باعىتتا بولدى».
تەاتر جانە كينو اكتەرى، قازاقستاننىڭ ەڭبەك سىڭىرگەن قايراتكەرى داۋرەن سەرعازين: «ەڭ الدىمەن الاتاۋ» ءداستۇرلى ونەر تەاترىن «ايمان-شولپان» پەرمەراسىمەن قۇتتىقتايمىن. ءوزىنىڭ جانرىندا، وزىندىك باعىتىندا قويىلدى. ءوز ماقساتىنا ءوز دەڭگەيىندە جەتتى دەپ ويلايمىن. كورەرمەندەردىڭ كوڭىلدەرىنەن شىقتى. ىستىق ىقىلاستارىن الىپ وتىر. مۇنداي تەاتر ەلىمىزگە كەرەك. ارقاشاندا قولدايمىز. ناسيحاتتايمىز. ەلىمىز بويىنشا ارالاسا ەكەن دەگەن تىلەگىمىز بار. بۇل تەاتردا كوپ نارسە جاتىر. ءبىزدىڭ تاريحىمىز جاتىر، ۇلتتىق قۇندىلىقتارىمىز جاتىر. ۇجىمدى قۇتتىقتايمىن. اق جول، ساتتىلىك تىلەيمىن. پەرمەرالار كوپ بولسىن. ۇلكەن-ۇلكەن مەرەكەلەردە، فەستيۆالدەردە كەزدەسە بەرەيىك».
اقىن يرانعايىپ كۇزەمباەۆ: «الاتاۋ» تەاترى كەرەمەت ءبىر دەمالىس سىيلادى. بارلىعىنا راحمەت. ونەرلەرى ورگە باسسىن. شىن مانىندە اتتارىنا زاتتارى ساي بولىپ، ايمان مەن شولپاننىڭ وزدەرىن كورگەندەي بولدىق. كوتىبار بولسىن، قايسىسىن الساق تا وزدەرىنىڭ شەبەرلىكتەرىن كورسەتتى. وعان كۋا بۇگىنگى كورەرمەندەردىڭ قوشەمەتتەرى. «الاتاۋ» ءداستۇرلى ونەر تەاترى جاساي بەرسىن».
قۋانىش جۇمابەكۇلى
«الاتاۋ» ءداستۇرلى ونەر تەاترى ادەبيەت ءبولىمىنىڭ مەڭگەرۋشىسى
