Rınat Rıfhatuly Zaıtovtyń basshylyǵyndaǵy «Alataý» dástúrli óner teatry tól ónerimizdiń ornyn aıshyqtaı túsý, qanatyn keńge jaıý maqsatynda 2022 jyldyń 10-28 maýsym aralyǵynda «Ágýgaı men Igıgaı» atty halyq ertegileri men dástúrli ánderden quralǵan balalarǵa arnalǵan mýzykalyq qoıylym (2022 – Balalar jyly aıasynda), «Altybaqan» oıyn-saýyq án keshi, aıtysker aqyn Rınat Zaıtovtyń «Men senderdi jaqsy kóremin, adamdar» atty mýzykalyq keshi, sondaı-aq «Aıman-Sholpan» mýzykalyq komedııasymen (premera) Nur-Sultan, Pavlodar, Ekibastuz, Semeı, Kýrchatov, Abaı jáne Aıagózge gastróldik saparlarmen barýdy josparlaǵan bolatyn. Bul sapardyń Teatr úshin tuńǵysh ret ekenin aıta ketken jón. Teatrdyń kórkemdik jetekshisi – Juldyzbek Jumanbaı.
«Alataý» dástúrli óner teatrynyń jańa formattaǵy qoıylymdaryna kórermender tánti bolyp, aq jarma tilekterin aıtyp, oı-pikirlerin ortaǵa saldy:
QR Mádenıet jáne sport vıe-mınıstri Nurqısa Dáýeshov: «Alataý» dástúrli óner teatrynyń Elordamyzdaǵy alǵashqy gastróldik sapary sátti boldy dep oılaımyn. Barsha jurtshylyqqa dástúrli ónerimizdi, mádenıetimizdi joǵarǵy deńgeıde kórsetti. Osyndaı talanttar bar jerde bizdiń ónerimiz máńgilik bolady. Óner ıeleriniń eńbekterin árqashan baǵalap, Memleket basshysymen qoldaý boıynsha jumystardy birge atqaramyz degen senimdemin. Teatr ujymyna óz atymnan sheksiz alǵysymdy aıtamyn. Árqashan bıikte bolaıyq!».
QR Parlamenti Májilisiniń depýtaty Erlan Saırov: «Qoıylym-konertten keremet áser aldym. Bizdiń salt-dástúrimizdiń, tól mádenıetimizdiń jańa kórinisi. Eń aldymen osy ujymdy quttyqtaımyn. Ekinshiden, osy bir tyń baǵyttaǵy qoıylymdardy Qazaqstan boıynsha nasıhattaý kerek. Tabystarǵa jete bersin, biz de kómektesýge daıynbyz jáne tilektespiz».
«Jastar» teatrynyń dırektory, Memlekettik syılyqtyń ıegeri Ádil Ahmetov: «Alataýdyń bókterinen, Almatydan kelgen «Alataý» dástúrli óner teatrynyń «Aıman-Sholpan» mýzykalyq komedııasyn tamashalap, bir rahattanyp qaldyq. Osy oraıda Rınat Zaıtov pen Juldyzbek Jumanbaıdyń úlken erlikke barǵandaryna kýá boldym. Týra keshegi Jumat Shanın, Temirbek Júrgenovterdiń isterin atqaryp otyr. Óıtkeni akterler bar, dástúrli ánshiler bar, bıshiler bar, barlyǵyn biriktirip, ujym etip, bir dúnıe qylyp shyǵarý úlken eńbek. Áriptesterime alǵysymdy bildiremin. Teatrdyń bolashaǵy zor. Qazaqstanda mundaı ulttyq teatr máńgi ómir súredi. Bizdiń ónerimizdiń eń shyńynda turý kerek dep esepteımin. Sáttilik!».
M. Gorkıı atyndaǵy memlekettik akademııalyq orys drama teatrynyń dırektory Ernar Jumataev: «Búgingi «Aıman-Sholpan» mýzykalyq komedııasy óziniń ereksheligimen ótti. Elorda tórinde, «Jastar» teatrynda kórermenderdiń qýanyshtarynda shek joq. Rejısserdiń ózindik sheshimi bar. Akterlerden bólek, dástúrli ánshiler jáne t.b. qatysty. Teatrdyń alǵa qoıǵan maqsaty bar, ózindik stıli bar. Qoǵammen baılanystyra otyryp, biraz aıtar oıy boldy».
«A. I.» teatrynyń dırektory, QR Eńbek sińirgen qaıratkeri, ánshi, aktrısa Aıgúl Imanbaeva: «Birinshiden, men «Alataý» dástúrli óner teatrynyń tilekshisimin, kórermenimin. Shynyn aıtý kerek. Elordaǵa keldi degendi estip, jumysymdy tastaı salyp keldim. Teatrdyń óziniń stılıstıkasyn qalyptastyryp kele jatqanyn búgin «Aıman-Sholpan» mýzykalyq komedııasynan kórdik. Bizdiń salt-sana, ádet-ǵuryp, qazaqtyń yrymy, qazaqtyń qanyna bitken qasıetteri, tipti bala kúnimizde oınaǵan joǵalyp ketken oıyndarymyz, jalpy qazaqtyń bolmysy «Aıman-Sholpan» qoıylymynda qamtylǵan. «Aıman-Sholpan» burynnan qoıylyp keledi. Biraq qazirgi almaǵaıyp zamanda bul qoıylym jańasha baǵytta boldy».
Teatr jáne kıno akteri, Qazaqstannyń eńbek sińirgen qaıratkeri Dáýren Serǵazın: «Eń aldymen Alataý» dástúrli óner teatryn «Aıman-Sholpan» permerasymen quttyqtaımyn. Óziniń janrynda, ózindik baǵytynda qoıyldy. Óz maqsatyna óz deńgeıinde jetti dep oılaımyn. Kórermenderdiń kóńilderinen shyqty. Ystyq yqylastaryn alyp otyr. Mundaı teatr elimizge kerek. Árqashanda qoldaımyz. Nasıhattaımyz. Elimiz boıynsha aralasa eken degen tilegimiz bar. Bul teatrda kóp nárse jatyr. Bizdiń tarıhymyz jatyr, ulttyq qundylyqtarymyz jatyr. Ujymdy quttyqtaımyn. Aq jol, sáttilik tileımin. Permeralar kóp bolsyn. Úlken-úlken merekelerde, festıvalderde kezdese bereıik».
Aqyn Iranǵaıyp Kúzembaev: «Alataý» teatry keremet bir demalys syılady. Barlyǵyna rahmet. Ónerleri órge bassyn. Shyn máninde attaryna zattary saı bolyp, Aıman men Sholpannyń ózderin kórgendeı boldyq. Kótibar bolsyn, qaısysyn alsaq ta ózderiniń sheberlikterin kórsetti. Oǵan kýá búgingi kórermenderdiń qoshemetteri. «Alataý» dástúrli óner teatry jasaı bersin».
Qýanysh Jumabekuly
«Alataý» dástúrli óner teatry Ádebıet bóliminiń meńgerýshisi
