Áleýmettik jeliler men túrli messendjerlerde QR Prezıdenti Jarlyǵy boıynsha 2023 jyldyń 1 qańtarynan áıelderdiń zeınetke shyǵý jasy 58 jas bolyp tómendeıdi degen aqparat jalǵan bolyp shyqty. Bul jaıly QR Eńbek jáne halyqty áleýmettik qorǵaý mınıstrligi:
"Áıelderdiń zeınetke shyǵýynyń zańnamamen belgilengen jasy halyqaralyq jáne otandyq sarapshylar júrgizgen zertteýler nátıjeleri men uzaq merzimdi aktýarlyq boljamdarǵa negizdelgen, halyqaralyq praktıkaǵa jáne álemdegi qalyptasyp otyrǵan ekonomıkalyq jáne demografııalyq jaǵdaıǵa sáıkes keletinin esterińizge salamyz. Bekitilgen jas mólsheri bazalyq jáne yntymaqty zeınetaqyny jáne Biryńǵaı jınaqtaýshy zeınetaqy qorynan tólenetin tólemderdi eskere otyryp, qazaqstandyqtar qurmetti demalysqa shyqqannan keıin tıisti zeınetaqy tólemderin qalyptastyrý qajettiligimen negizdelgen.
Bul rette yntymaqty zeınetaqy júıesi birtindep qysqarýda, óıtkeni olardy taǵaıyndaý kezinde 1998 jylǵy 1 qańtarǵa deıin, ıaǵnı jınaqtaýshy júıe engizilgenge deıin ázirlengen eńbek ótili eskeriledi. Osyǵan baılanysty mindetti zeınetaqy jarnalary esebinen qalyptastyrylatyn jınaqtaýshy zeınetaqynyń róli artady, zeınetaqy jarnalaryn aýdarý kezeńi men mólsheri neǵurlym kóp bolsa, ol soǵan sáıkes joǵary bolady", - dedi.
Osy rette, yntymaqty zeınetaqy júıesi birtindep qysqarylýda. Sebebi, 1998 jylǵy 1 qańtarǵa deıingi, ıaǵnı jınaqtaýshy júıe taǵaıyndaý kezindegi eńbek ótili eskeriledi. Soǵan baılanysty zeınetaqy jarnalarynan qalyptastyrylatyn jınaqtaýshy zeınetaqynyń róli de artady.
Aıta ketý kerek, qoldanystaǵy zańnamaǵa sáıkes azamattarǵa zeınetkerlikke erte shyǵýyna ruqsat etilgen. Iaǵnı, BJZQ-da erlerdiń zeınetaqy jınaqtary 55 jasqa, al áıelderdiki 52,5 jasqa tolǵanda, zeınetaqy tólemderin alý quqyǵyna ıe bola alady.
"Azamattardan jalǵan aqparatqa nazar aýdarmaýdy jáne aqparatty tek resmı derekkózderden paıdalanýdy suraımyz: jalǵan aqparat taratý zań boıynsha jazalanady", - dep eskertti vedomstvo halyqqa.
Dáýlethanqyzy Roza
