سوڭعى كەزدەردەگى مۇناي قورىنىڭ سارقىلا باستاۋى ايماقتاعى بۇل سالادا جۇمىس جاسايتىن 10 مىڭعا جۋىق ازاماتتىڭ الەۋمەتتىك ماسەلەسىنە تىكەلەي اسەر ەتەدى. سول سەبەپتى دە مۇناي-گاز سەكتورىنداعى كومپانيالاردا قىزمەت ەتەتىن جۇمىسشىلاردىڭ جالاقىسىن قىسقارتپاۋ، ەڭبەككەرلەرگە الەۋمەتتىك قولداۋ كورسەتۋ وتە وزەكتى. اسىرەسە، قىزمەتكەرلەردىڭ ەڭبەك شارتىنىڭ ساقتالۋى، ولارعا الەۋمەتتىك تولەمدەردى ۋاقىتىلى تولەۋ ماسەلەلەرى قوعامدا ءجيى كوتەرىلىپ كەلەدى. سونىمەن بىرگە سەرۆيستىك قىزمەت كورسەتەتىن كاسىپورىندار اراسىندا ءتاريفتى ۇلعايتۋ ماسەلەسى دە باسى اشىق سۇراقتاردىڭ ءبىرى.
بۇل وزەكتى ماسەلەلەردى وڭتايلى باعىتتا شەشۋ ءۇشىن بۇگىن وبلىس اكىمى نۇرلىبەك نالىباەۆ «اقشابۇلاق» كەن ورنىنا بارىپ، جۇمىس پروتسەسىمەن تانىسىپ، «قازگەرمۇناي» كاسىپورنىنداعى ەڭبەك ۇجىمىمەن كەزدەستى.
كاسىپورىنداعى 200-گە جۋىق ماماندارمەن پىكىرلەسكەن ايماق باسشىسى كەز كەلگەن كومپانيا باسشىسى جۇمىسشىلار ماسەلەسىنە كەلگەندە شيەلەنىسكە جول بەرمەي، جۇمىس ورىندارىن قىسقارتپاي، تۇراقتى تۇردە ساقتاپ قالۋ ءۇشىن وڭتايلى شەشىم قابىلداۋى قاجەت ەكەنىن العا تارتتى.
- بۇگىن ءبىز وبلىس اكىمدىگى، جۇمىس بەرۋشى جانە كاسىپوداق اراسىنداعى ءوزارا تۇسىنىستىك پەن ىنتىماقتاستىق تۋرالى مەموراندۋم جاساسۋعا جينالىپ وتىرمىز.
باستى ماقسات – ەڭبەك ۇجىمىنداعى الەۋمەتتىك جاعداي مەن وندىرىستىك پروتسەستەردىڭ تۇراقتىلىعىن، جۇمىس ورىندارىن ساقتاۋ جانە پەرسونالدى جۇمىسپەن قامتۋدى ىسكە اسىراتىن شارالاردى قابىلداۋ. وسى رەتتە، وبلىستاعى ءاربىر جۇمىس بەرۋشى قىزمەتكەرلەرىنە قولايلى ەڭبەك جاعدايلارىن جاساپ، جالاقىلارىن كەزەڭ-كەزەڭىمەن كوبەيتۋدە ناقتى شارالار قابىلداۋى ءتيىس. بىز ءتۇرلى ۇجىمدار اراسىنداعى كەز كەلگەن الەۋمەتتىك ماسەلەلەردى ورنىقتى تۇردە شەشۋىمىز قاجەت. بۇل رەتتە كاسىپورىن مەن اكىمدىكتىڭ مۇددەسى ورتاق بولۋى كەرەك،- دەدى نۇرلىبەك نالىباەۆ.
جيىندا كومپانيانىڭ باس ديرەكتورى ليۋ شاويۋ جانە باس ديرەكتورىنىڭ ءبىرىنشى ورىنباسارى نۇرجان ءابدىراحمانوۆ ءسوز الىپ، كاسىپورىن تاراپىنان اتقارىلعان نەگىزگى جۇمىستاردى تىزبەكتەدى.
باسقوسۋ بارىسىندا ايماق باسشىسى قىزمەت كورسەتەتىن كاسىپورىنداردىڭ ءتاريفىن ۇلعايتۋ ماسەلەسىن كوتەرىپ، ارىپتەستەرىنەن مۇمكىندىگىنە قاراي، ماسەلەنى ءتيىمدى شەشۋ جولىن قاراستىرۋدى ۇسىندى.
كەزدەسۋ اياسىندا وبلىس اكىمدىگى مەن كومپانيا بىرلەسكەن مەموراندۋمعا قول قويدى. ناتيجەسىندە، بۇدان بىلاي كومپانيا كەزەڭ-كەزەڭىمەن جۇمىسشىلاردىڭ ەڭبەكاقىسىن كوبەيتىپ، ءتاريفتى كوتەرۋگە باسىمدىق بەرەدى. سونداي-اق، بيزنەستىڭ الەۋمەتتىك جاۋاپكەرشىلىگى باعىتىنىڭ جالعاسى رەتىندە «قازگەرمۇناي» كاسىپورنى «وقۋشىلار سارايىن» سالىپ بەرۋدى ءوز مىندەتىنە الدى.
ايتا كەتەيىك، وبلىس اكىمى مەن كومپانيا باسشىلارى اراسىنداعى كەلىسسوزدەر ارقاسىندا ايماقتاعى 38 كاسىپورىندا 8 مىڭنان اسا جۇمىسكەردىڭ جالاقىسى 50 پايىزعا دەيىن كوبەيدى.
