بۇگىن ۇكىمەتتىڭ كەزەكتى وتىرىسىندا ەلىمىزدىڭ بيىلعى قاڭتار-مامىر ايلارىنداعى الەۋمەتتىك-ەكونوميكالىق دامۋىنىڭ قورىتىندىسى جانە رەسپۋبليكالىق بيۋدجەتتىڭ ورىندالۋى قارالدى. جيىندا سىر ءوڭىرى الەۋمەتتىك-ەكونوميكالىق دامۋدىڭ نەگىزگى كورسەتكىشتەرى بويىنشا ۇزدىك ۇشتىككە ەنگەنى ايتىلدى.
قر ۇلتتىق ەكونوميكا، قارجى مينيسترلەرى مەن قر ۇلتتىق بانكىنىڭ توراعاسى بايانداما جاسادى.
بايانداما بارىسىندا وڭىرلەردىڭ جۇمىسىنا تالداۋ جاساعان قر ۇلتتىق ەكونوميكا ءمينيسترى الىبەك قۋانتىروۆ وڭدەۋ ونەركاسىبىن دامىتۋ، اۋىل شارۋاشىلىعى، قۇرىلىس، تۇرعىن ءۇيدى پايدالانۋعا بەرۋ، ساۋدا، كولىك ينفراقۇرىلىمىن دامىتۋ جانە جەكە ينۆەستيتسيالار تارتۋ بويىنشا ايماقتاردىڭ جۇمىسىن سارالاپ، قىزىلوردا وبلىسىن 5 اي قورىتىندىسى بويىنشا الەۋمەتتىك-ەكونوميكالىق دامۋدىڭ نەگىزگى 7 كورسەتكىشى بويىنشا وڭ ناتيجەگە قول جەتكiزگەن ۇزدىك وڭىرلەر اراسىندا 3-ءشى ورىندا ورنالاسقانىن ايتتى. سونداي-اق، تۇرعىن ءۇيدى پايدالانۋعا بەرۋ بويىنشا ءوڭىرىمىز شىمكەنت قالاسى مەن تۇركىستان وبلىسىنان كەيىن اقمولا وبلىسىمەن بىرگە ۇزدىك ۇشتىكتى قۇراپ وتىر.
پرەمەر-مينيستر ەكونوميكانىڭ ناقتى سەكتورىنىڭ قارقىندى دامۋىنا وڭدەۋ ونەركاسىبى ايتارلىقتاي ۇلەس قوساتىنىن جەتكىزىپ، جاۋاپتى مەملەكەتتىك ورگاندار مەن وڭىرلەردىڭ اكىمدەرىنە وسى جۇمىس قارقىنىن ساقتاۋدى تاپسىردى. ول ءۇشىن ەكونوميكانى ءارتاراپتاندىرۋ، ينۆەستيتسيالار تارتۋ جانە جاڭا جۇمىس ورىندارىن قۇرۋدى جالعاستىرۋ قاجەت.
ۇكىمەت جيىنىنان كەيىن وبلىس اكىمى نۇرلىبەك نالىباەۆ قالا، اۋدان اكىمدەرى مەن جاۋاپتى سالا باسشىلارىنا نەگىزگى كورسەتكىشتەردەگى تۇسىمدەردى تومەندەتپەۋ جانە بيۋدجەت قاراجاتىن ۋاقىتىلى يگەرۋ، ينۆەستيتسيالىق جوبالاردى كوبەيتۋ قاجەت ەكەنىن العا تارتىپ، جۇمىس قارقىنىن تومەندەتپەي، مەجەلەنگەن كورسەتكىشتەرگە قول جەتكىزۋدى تاپسىردى.
