16 ماۋسىم – ۇلىتاۋ وبلىسىندا العاش رەت «ۇلتتىق قۇرىلتاي» وتكىزىلمەكشى. «بۇل قۇرىلتايدان ەشنارسە كۇتپەيمىن. ەلدە قوردالانعان كۇردەلى ماسەلەلەر وتە كوپ. وتكىزىلەيىن دەپ جاتقان قۇرىلتايعا قىرۋار قاراجات كەتەدى. سول قاراجاتتى وبال ەكەن دەپ ويلاماي ما ەكەن وسى... قازىر قانشاما ادام «قاڭتار قىرعىنىنان» كەيىن قيىن جاعدايدا قالدى. ادامدار جاقىندارىنان ايىرىلدى. وق ءتيىپ، جاراقات الدى. سولارعا كومەك بەرمەي مە؟!" بۇل پىكىردى بەلگىلى ساياساتكەر، قوعام قايراتكەرى رىسبەك سارسەنباي Adyrna.kz ۇلتتىق پورتالىنىڭ تىلشىسىنە بەرگەن سۇحباتىندا ايتتى.
«بۇل قۇرىلتايدان ەشنارسە كۇتپەيمىن. وتەدى دەگەن ماسەلەگە ەلەڭدەپ تە تۇرعان جوقپىن جانە بۇل تۋرالى ويلاعىم دا كەلمەيدى. ويتكەنى قازىرگى بيلىك شىنايى حالىقتىڭ كوڭىلىنەن شىعاتىن شارۋا اتقارىپ جاتقان جوق. مىنا سوڭعى رەفەرەندۋمدى الىپ قاراڭىز. نە بولدى؟! حالىقتى الداۋ بولدى! مىنا قۇرىلتاي دا سول حالىقتى الداۋ! ودان باسقا تۇكتە ەمەس»، - دەيدى ساياساتكەر.
رىسبەك سارسەنبايدىڭ ايتۋىنشا، ەگەر بۇل راسىمەن ەلدىڭ مۇددەسى ءۇشىن كوپتىڭ كوڭىلىندە جۇرگەن ماسەلەلەردى شەشۋ ماقساتىندا وتكىزىلەتىن قۇرىلتاي بولسا، وندا وعان قازاقستاننىڭ كەز-كەلگەن ازاماتى بارىپ، قاتىسار ەدى.
«قازىر بۇل قۇرىلتاي وتە مە، نە بولادى دەگەن ماسەلەگە ەشكىم ءمان بەرىپ جاتقان جوق، ءتىپتى كوڭىل اۋدارمايدى دا... ول جاققا وڭكەي جاعىمپاز، جالتاق، ماقتاۋ-ماداقتاۋ ايتاتىندار عانا كەرەك قوي. ال كەلەلى ماسەلەنى كوتەرىپ، كوپتىڭ كوڭىلىندەگى ءسوزدى ايتاتىن ادامداردى ول جەرگە شاقىرمايدى. كەيبىر ادامدار «ءبىزدى نەگە شاقىرمادى» دەپ رەنىش ءبىلدىرىپ جاتىر. قايتا مەن ول ادامدارعا سىزدەردى «شاقىرتپاعانىنا قۋانىڭىزدار» دەيمىن. ول جەرگە بارىپ ابىرويلارىڭىزدى كەتىرىپ نەلەرىڭىز بار؟...»، - دەيدى رىسبەك سارسەنباي.
ساياساتكەردىڭ ايتۋىنشا، توقاەۆ ۇلتتىق قۇرىلتاي وتكىزەمىن دەپ سونشا اقشانى جەلگە شاشقانشا «قاڭتار قىرعىنىنان» زارداپ شەككەن جاندارعا كومەك كورسەتۋى كەرەك ەدى.
«ەلدە قوردالانعان كۇردەلى ماسەلەلەر وتە كوپ. مەن بۇل شاراعا ەشقانداي قىزىعۋشىلىق بىلدىرگەن جوقپىن. وتكىزىلەيىن دەپ جاتقان قۇرىلتايعا قىرۋار قاراجات كەتەدى. سول قاراجاتتى وبال ەكەن دەپ ويلاماي ما ەكەن وسى... قازىر قانشاما ادام «قاڭتار قىرعىنان» كەيىن قيىن جاعدايدا قالدى. ادامدار جاقىندارىنان ايىرىلدى. وق ءتيىپ، جاراقات الدى. سولارعا كومەك بەرمەي مە؟! قانشاما اۋرۋ-سىرقاۋلار، ادامدار شەتەلگە شىعىپ ەمدەلىپ، ومىرلەرىن ساقتايدى. سوعان بىزدىكىلەردىڭ مۇمكىندىكتەرى جوق. ودان دا سولارعا جۇمىس اشايىق، ساۋاپتى ءىس بولار ەدى»، - دەيدى قوعام قايراتكەرى.
رىسبەك سارسەنبايدىڭ توپشىلاۋىنشا، «بۇل سول توقاەۆتىڭ جاساندى بەدەلىن اسپەتتەۋ ءۇشىن عانا كەرەك نارسە عوي»...
«ەرتەڭ كور دە تۇرىڭىزدار، وي «توقاەۆ ءسىز كەرەمەتسىز، اناۋ، مىناۋ» دەپ ايتادى. «توقاەۆ دانىشپان» دەپ بيلىككە جەتىپ جاتقاندار سونىڭ مىسالى بولادى عوي. ەندى ەرتەڭ سول جاققا بارىپ ماداق ايتۋشىلار جارىس وتكىزەدى. سونىڭ ناتيجەسىندە اۋداننان باستاپ وبلىستىڭ، مينيسترلىكتىڭ تۇتقاسىن ۇستاپ جاتسا ەشقانداي تاڭ قالمايمىن. سوندايلاردىڭ كوزگە ءتۇسىپ، كورىنىپ قالاتىن جەرى...»، - دەيدى ساياساتكەر.
قوعام قايراتكەرىنىڭ ايتۋىنشا، بيلىك «قاڭتار قىرعىنىنان» ساباق العان جوق.
«بيلىكتەگىلەرگە «قاڭتار قىرعىنى» ساباق بولدى دەپ ايتۋ قيىن. كەرىسىنشە سولاي ىستەگەنىمىز دۇرىس بولدى دەپ وتىرعان شىعار. ەگەر توقاەۆ جىبەرىلگەن قاتەلىكتەردى مويىنداسا، وندا اناۋ قاماۋدا وتىرعان ازاماتتاردىڭ ءبارىن بوساتار ەدى. ناعىز قىلمىس جاساپ، ارانداتۋدى ۇيىمداستىرعانداردان باسقا... ونداي جاساعان جوق. ال مىنا رەفەرەندۋم كەزىندە تاعى دا سول ويلارىنا كەلگەنىن جاسادى. سوعان قاراعاندا بۇل قۇرىلتايدان ايتارلىقتاي ناتيجە كۇتۋ بوسقا اۋرەشىلىك!»، - دەپ پىكىرىن ءبىلدىردى رىسبەك سارسەنباي.
زارينا اشىربەك،
"ادىرنا" ۇلتتىق پورتالى
