اقتاۋ قالاسىن كوگالداندىرۋ ءىسى ەندى الداعى 5 جىل قاتارىنان مەملەكەتتىك-جەكەمەنشىك ارىپتەستىك جوباسى اياسىندا جۇرگىزىلەدى. وسىعان دەيىن شولەيتتى وبلىس ورتالىعىن جاسىل-جەلەككە وراپ، ونى سۋارۋمەن اينالىساتىن مەكەمە جىل سايىن انىقتالاتىن. بۇل جۇمىستىڭ ساپاسىنا كەرى اسەرىن تيگىزدى. سوندىقتان دا قالا اكىمدىگى كەلىسىم مەرزىمىن 5 جىلعا ۇزارتتى، دەپ حابارلايدى قالالىق تۇرعىن-ءۇي كوممۋنالدىق شارۋاشىلىعى ءبولىمى. جەڭىمپاز مەكەمە – «GreenCityAktau» جشس.
جوبا اياسىندا اقتاۋ قالاسىن كوگالداندىرۋ، اعاشتاردى، بۇتالاردى، گۇلدەردى وتىرعىزۋ جانە جاسىل جەلەكتەر مەن اعاشتاردى كۇتىپ-باپتاۋ جۇمىستارى جۇرگىزىلەدى.
-بەس جىلعا باعىتتالعان جوبا اياسىندا جاپىراقتى اعاشتاردان 20 905 دانا، قىلقان جاپىراقتى اعاشتاردان 11 750 دانا، ساندىك بۇتالاردان 1 460 دانا، بۇتالاردان 20 000 مەتر، كوگالداردان 5 000 شارشى مەتر، گۇلزارلاردان 652 500 دانا، راۋشان گۇلدەرىنەن 18 000 دانا ەگۋ جوسپارلانعان،-دەدى اقتاۋ قالالىق تۇرعىن-ءۇي كوممۋنالدىق شارۋاشىلىعى ءبولىمى باسشىسىنىڭ م.ا انۋار تۋلياكوۆ.
مەملەكەتتىك-جەكەمەنشىك ارىپتەستىك اياسىندا جۇمىس ىستەيتىن مەكەمە انىقتالعانعا دەيىن جىل باسىنان بەرى «اقبوتا» مكك-نىڭ كوگالداندىرۋشىلارى جاسىل جەلەكتەردى كۇتىپ-ۇستاۋ، سونداي-اق جاڭا اعاش كوشەتتەرىن وتىرعىزۋ جۇمىستارىن جۇرگىزگەن. ولار اقپان ايىنان باستاپ 4650 ءتۇپ اعاش وتىرعىزدى. ونىڭ 2650 داناسى قىلقان جاپىراقتى (قاراعاي، بيوتا) 2000 داناسى جاپىراقتى اعاشتار (ايلانت، كلەن، ياسەن، كيليتەريا).
- سونىمەن قاتار، قالانىڭ 9, 11, 14 شاعىناۋداندارىن بىرىكتىرەتىن اينالما جولىنىڭ ورتاسىنا 112 000 دانا 1 جىلدىق پەتۋنيا گۇلدەرى، 12 شاعىن اۋدان توبانياز ەسكەرتكىشىنىڭ الدىنا راۋشان گۇلدەرى ەگىلدى. وتىرعىزىلعان كوشەتتەردىڭ بارلىعى اقتاۋ قالاسىندا وسىرىلگەن. ياعني بارلىق اعاشتار مەن كوگالدار ماڭعىستاۋ وبلىسىنىڭ قۇرعاق كليماتىنا ءتوزىمدى جاسىل جەلەكتەر، - دەدى انۋار تۋلياكوۆ.
ال جاسىل-جەلەكتەردى سۋارۋ جۇمىستارى بيىل اقتاۋدا العاش رەت سۋ قۇبىرى ارقىلى جۇرگىزىلە باستادى. جىلدار بويى تەڭىزگە كەتىپ جاتقان جەراستى تۇششى سۋلارىن ءتيىمدى پايدالانۋ ءۇشىن قالانىڭ ورتالىق بولىكتەرىنە، ساياباقتار مەن الاڭدارعا ۇزىندىعى 55 شاقىرىمدى قۇرايتىن قۇبىر تارتىلدى. (قاجەتتىلىك تاۋلىگىنە 1 700م3). قازىرگى تاڭدا اتالعان قۇبىرلاردىڭ 45 شاقىرىمى ىسكە قوسىلعان. قالعان 10 شاقىرىمىنا اعىمداعى جوندەۋ جۇمىستارى جۇرگىزىلۋدە. ماۋسىم ايىنىڭ سوڭىنا دەيىن تولىقتاي ىسكە قوسىلماق.
بۇدان بولەك، شاعىناۋدان بويىنداعى جاسىل-جەلەكتى سۋارۋ ءۇشىن «GreenCityAktau» جشس جىل سوڭىنا دەيىن تاعى 40 شاقىرىم سۋ قۇبىرىن ىسكە قوسپاقشى. قازىرگى تاڭدا ونىڭ 13 شاقىرىمى 1,2,3,3ا،3ب،4 شاعىن اۋداندارىنا جۇرگىزىلىپ، ىسكە قوسىلدى.
- شاعىناۋدان ىشىندەگى جاسىل جەلەكتەردى سۋارۋ ءۇشىن قازىرگى تاڭدا مۇلىك يەلەرىنىڭ بىرلەستىگى جانە تۇرعىن ۇيلەرگە قىزمەت كورسەتۋشى مەكەمەلەرمەن كەلىسسوزدەر جۇرگىزىلىپ، كەلىسىم-شارتقا وتىرۋعا جۇمىستانۋدامىز. سونداي-اق، قوسىمشا 30 دانا ارنايى سۋ تاسۋشى كولىكتەر قالانىڭ جاسىل جەلەكتەرىن سۋارۋدا. ءبىرى جەر استىندا، ەكىنشىسى جەر ۇستىندە ورنالاسقان 60 تەكشەمەترلىك قوس رەزەرۆۋار بار. وپەراتور كۇن سايىن تاڭعى ساعات 6-دا كەلىپ، ناسوستاردى قوسادى. 7.30-دان باستاپ، كولىكتەر كەلىپ، سۋ تولتىرىپ الادى. ءبىرىنشى اۋىسىمدا ساعات 8:00 - 16:00 دەيىن 80-گە جۋىق ادام جۇمىس ىستەيدى. وسى ۋاقىت ارالىعىندا كوشە بويىنداعى اعاشتاردى سۋارادى. جاسىل جەلەكتى، گازونداردى قىرقادى. ەكىنشى اۋىسىم ساعات 16.00 باستالادى، 20 ادام شاعىناۋدان ىشتەرىن سۋارادى. ءبىر شاعىناۋدانعا شامامەن 10 كۇندە قايتىپ كەلەدى، -دەدى انۋار تۋلياكوۆ.
قازىرگى تاڭدا «GreenSityAktau» جشس-گى مەكەمەسى تالداردى ۋلاۋ (دەزينفەكتسيا) جۇمىستارىن دا جۇرگىزىپ جاتىر. «بي-58» جانە «كاراتە» دەپ اتالاتىن ۋ تۇرلەرى قولدانىلۋدا. قالا اۋماعىندا 40 مىڭعا جۋىق جاسىل جەلەكتەر ۋلاۋدان ءوتتى. اتالعان جۇمىستار ءالى دە جالعاسادى.
