ءماجىلىس دەپۋتاتى عالىمجان ەلەۋوۆ 30 ساۋىردە سەۋل-الماتى باعىتى بويىنشا ۇشقان جولاۋشىنىڭ ءومىرىن ساقتاپ قالدى، دەپ حابارلايدى «ادىرنا» ءتىلشىسى.
وسىعان وراي «Air Astana» اۋە كومپانياسىنىڭ پرەزيدەنتى پيتەر فوستەردىڭ اتىنان كومپانيانىڭ وكىلدەرى العىس حات پەن ارنايى سىيلىق تابىس ەتتى.
- «Air Astana» اۋەكومپانياسىنىڭ باسشىلىعى 2022 جىلدىڭ 30 ساۋىرىندە الماتى – سەۋل باعىتى بويىنشا ۇشقان جولاۋشىعا دەر كەزىندە كورسەتكەن كومەگى ءۇشىن العىس بىلدىرەدى. ءسىزدىڭ كاسىبي شەبەرلىگىڭىز، جاۋاپتىلىعىڭىز جانە بەلسەندى ازاماتتىق ۇستانىمىڭىز ادامنىڭ ءومىرىن ساقتاپ قالدى، – دەلىنگەن العىس حات ماتىنىندە.
اۆياتاسىمالداۋشى كومپانيا وكىلى اتاپ وتكەندەي، ۇشاقتىڭ بورتىندا جولاۋشىلاردىڭ ءبىرىنىڭ قىسىمى تومەندەپ، ەسىن جوعالتا باستاعان. بورتسەرىكتەر سالونداعى جولاۋشىلار اراسىنان مەديتسينا قىزمەتكەرلەرىن ىزدەگەن. ەر ادام كومەككە كەلدى. ول كەيىن بەلگىلى بولعانداي شەتەلگە ىسساپارمەن بارا جاتقان ماماندىعى بويىنشا دارىگەر، ءماجىلىس دەپۋتاتى عالىمجان ەلەۋوۆ بولدى.
عالىمجان ەلەۋوۆتىڭ ايتۋىنشا، ادام ەس-ءتۇسسىز، كلينيكالىق ءولىم جاعدايىندا بولعان. ونىڭ قىسىمى مەن تامىر سوعۋى سيرەپ، جەدەل تۇردە رەانيماتسيالىق ءىس-شارالار جۇرگىزىلگەن. ءماجىلىس دەپۋتاتى جولاۋشىنىڭ جۇرەك قىزمەتىن قالپىنا كەلتىرىپ، ونىڭ جاعدايىن جاقسارتا الدى. وسىلايشا، جاقىن ماڭداعى قالاعا ۇشاقتىڭ شۇعىل قونۋى قاجەت بولعان، دەگەنمەن 37 جاستاعى ەر ادامنىڭ جاعدايى تۇراقتانىپ، ول ءارى قاراي ۇشۋدى جالعاستىردى.
