Qazaqstanda ortasha zeınetaqy men bazalyq zeınetaqy tólemi qosa eseptegende 105 myń teńgeden asty. Jyl basynan beri jalpy 1,2 trln teńgeden astam zeınetaqy tólengen. Bul týraly Eńbek jáne halyqty áleýmettik qorǵaý mınıstrligi málimdedi, dep habarlaıdy “Adyrna” ulttyq portaly.
Mınıstrlik dereginshe, bıylǵy mamyrda respýblıkalyq bıýdjetten zeınetaqy tólemderine 235,4 mlrd teńgeden asa, onyń ishinde bazalyq zeınetaqyǵa – 71,3 mlrd teńge, yntymaqty zeınetaqyǵa 163,2 mlrd teńge bólinipti.
“1 maýsymdaǵy jaǵdaı boıynsha zeınetkerler sany 2 mln 246 myńnan asty. Zeınetaqy tólemderiniń ortasha mólsheri (bazalyq zeınetaqy tólemin qosa eseptegende) 105 189 teńge boldy”, - delingen habarlamada.
Eger azamattyń zeınetaqy júıesindegi ótili 10 jyl nemese odan az bolsa, sondaı-aq eger múlde joq bolsa, bazalyq zeınetaqy eń tómengi kúnkóris deńgeıiniń 54 paı yzyn quraıdy. Sodan keıin 10 jyldan asqan ár jyl úshin onyń mólsheri 2 paıyzǵa artady. Al eger eńbek ótili 20 jyl bolsa, bazalyq zeınetaqy tómengi kúnkóris deńgeıiniń 74 paıyzyn, 30 jyl bolsa, 94 paıyzyn quraıdy. Eńbek ótili 33 jyl nemese odan kóp bolsa, kúnkóris deńgeıiniń eń joǵarǵy mólsherinde belgilenedi.
Eger bir aı ishinde mindetti zeınetaqy jarnalary Biryńǵaı jınaqtaýshy zeınetaqy qoryna birneshe ret aýdarylsa, jınaqtaýshy júıege qatysý merzimi bir aıdy quraıdy.
Osylaısha mindetti zeınetaqy jarnalary neǵurlym turaqty jáne tolyq kólemde aýdarylsa, zeınet jasyna jetkende bazalyq zeınetaqy tólemderiniń mólsheri soǵurlym kóp bolady.
Óz kezeginde azamattyń jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 aı qajet) jáne zeınetkerlikke deıingi kezeńdegi ortasha aılyq tabysyna baılanysty bolady.
”Adyrna” ulttyq portaly
