قر ءبىلىم جانە عىلىم ءمينيسترى اسحات ايماعامبەتوۆ مەكتەپتەردە ورامال تاعۋ ماسەلەسىنە قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
«مەكتەپتەردە ورامال تاعۋ ماسەلەسى تەك ءبىزدىڭ ەلدە عانا ەمەس، باسقا دا بىرقاتار ەلدە ۇنەمى قىزۋ تالقىلانىپ كەلەدى. بىراق قازاقستان – زايىرلى مەملەكەت جانە مەكتەپ تە زايىرلى مەكەمە. 2016 جىلى قابىلدانعان بۇيرىقتا تالاپتار كورسەتىلگەن. دەگەنمەن ءارتۇرلى توپتاردىڭ ينكليۋزيۆتىلىگىن قامتاماسىز ەتۋ ماڭىزدى ەكەنىن كورىپ وتىرمىز. مىسالى، باسىنا ورامال تاعۋ مۇمكىندىگى بولماعاندىقتان اتا-اناسى ساباققا جىبەرمەيتىن قىزداردىڭ ماسەلەسىن الىپ قاراۋعا بولادى. وسىنداي سەبەپتەرگە بايلانىستى بالالار مەكتەپكە بارماسا نەمەسە قاشىقتان وقۋعا كوشۋگە ءماجبۇر بولسا، وندا ول كەرى اسەرىن تيگىزەدى. جالپى ءبىز ينكليۋزيۆتى قوعام بولۋىمىز كەرەك»،– دەپ ءتۇسىندىردى ول.
