بۇگىن نۇر-سۇلتان قالاسىندا «قازاقستان» تەلەراديوكورپوراتسياسىنىڭ ۇيىمداستىرۋىمەن 16 ساعاتتىق «رەفەرەندۋم» ونلاين مارافونى وتۋدە، دەپ حابارلايدى “ادىرنا” ۇلتتىق پورتالى.
مارافوندا ءار ساعات سايىن حالىقارالىق جانە وتاندىق ساراپشىلاردىڭ قاتىسۋىمەن بريفينگتەر، ديسكۋسسيا الاڭدارى ۇيىمداستىرىلادى جانە قاتىسۋشىلار «اشىق ميكرافون» الاڭىندا ءتۇرلى تاقىرىپتار بويىنشا پىكىر الماسادى. مارافونعا 1200-دەن استام قوناق، ءار سالا بويىنشا 300-دەن استام سپيكەر تالقىلاۋلارعا قاتىسادى. ونىڭ ىشىندە دەپۋتاتتار، ساياساتتانۋشىلار، ۇكىمەتتىك ەمەس ۇيىم وكىلدەرى، ءار سالاداعى بەلسەندى جاستار مەن مادەنيەت، سپورت سالاسىنىڭ وكىلدەرى بار. مارافوندى ەلىمىزدەگى ەڭ تانىمال 23 تەلەجۋرناليست جۇرگىزەدى.
شارا 09:00-دەن 01:00-گە دەيىن وتاندىق باق-تاردىڭ ينتەرنەت رەسۋرسى مەن الەۋمەتتىك جەلىدەگى پاراقشالارىندا ونلاين-ترانسلياتسيالانادى.
ءار ساعات سايىن ديسكۋسسيا الاڭىندا
- «الدىمەن ەكونوميكا جانە ساياسات»
- «تەلەارنا جانە ينتەرنەت: كورەرمەن مەن جارناما ءۇشىن كۇرەس»
- «قايىرىمدىلىق پەن قامقورلىق: ءسابيت پەن ساعيت وقيعاسى»
- «فەيك اقپاراتتى تاراتۋ كىمگە ءتيىمدى؟»
- «جاھاندانۋ VS وقشاۋلانۋ»
- «ساياساتتاعى ايەلدەر ءرولى»
- «بالالارعا قارسى كيبەربۋللينگ»
- «جاڭا ۇرپاق – جاڭا سانا» تاقىرىپتارى تالقىلانادى جانە بۇل تالقىلاۋلار رەسپۋبليكالىق تەلەارنالار ەفيرىنەن تىكەلەي ەفيردە كورسەتىلەدى.
سپيكەرلەر قاتارىندا ءماجىلىس دەپۋتاتى ساياسات نۇربەك، امانجول التاەۆ، قسزي ديرەكتورى ەركىن تۇقىموۆ، مەملەكەت جانە قوعام قايراتكەرى ءاليحان بايمەنوۆ، ساياساتتانۋشى عازيز ابىشەۆ، پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل، استانا حالىقارالىق ۋنيۆەرسيتەتىنىڭ دوتسەنتى نۇربەك يساباي، «Atameken Business» تەلەارناسىنىڭ ديرەكتورى قانات ساحاريا، مەدياساراپشى مولديار ەرگەبەكوۆ، Stopfake.kz جوباسىنىڭ جەتەكشىسى ايبەك كۇمىسبەكوۆ، ەڭبەك قۇقىعى سالاسىنداعى ساراپشى بيبىگۇل نۇراشەۆا بار.
ساحنادا مارافون قاتىسۋشىلارىمەن نۇر-سۇلتان قالاسى ونكولوگيا ورتالىعىنىڭ باس دارىگەرى، قازاقستاننىڭ ەڭبەك ەرى مۇحتار تولەۋتاەۆ، «QazVac» ۆاكتسيناسىن ازىرلەۋشى عالىمدار توبىنىڭ جەتەكشىسى كۇنسۇلۋ زاكاريا، «نازارباەۆ زياتكەرلىك مەكتەپتەرى» دبۇ باسقارما ءتورايىمى كۇلاش ءشامشيدينوۆا، مەتسەنات، «التىن قىران» قايىرىمدىلىق قورىنىڭ پرەزيدەنتى يسلامبەك سالجانوۆ، قازاقستان گرەك-ريم، ەركىن جانە ايەلدەر كۇرەسى فەدەراتسياسىنىڭ پرەزيدەنتى داۋلەت تۇرلىحانوۆ، وليمپيادا ويىندارىنىڭ قولا جۇلدەگەرى، الەم چەمپيونى ساكەن بيبوسىنوۆ، شورت-ترەكشى ابزال اجعاليەۆ، ۇلتتىق ونەر ۋنيۆەرسيتەتىنىڭ رەكتورى ايمان مۇساقوجاەۆا، وپەرا ءانشىسى مايرا مۇحامەدقىزى، اكتريسا لەيلو بەكنازار-حانينگا، اكتەر ەرىك جولجاقسىنوۆ، كينوپروديۋسەر مۇرات ەسجان ەركىن پىكىر الماسادى.
«اشىق ميكروفون» ايدارىندا مارافونعا قاتىسۋشىلار جۋرناليستەر ساۋالىنا جاۋاپ بەرەدى.
شارادا تانىمال ستەنداپەرلەردىڭ قويىلىمدارى مەن مۋزىكالىق نومىرلەر، ارنايى فلەشموبتار ۇيىمداستىرىلادى. ونلاين مارافون سوڭىندا تىكەلەي ەفيردە قازاقستاندىقتاردىڭ داۋىس بەرۋ قورىتىندىسى بويىنشا EXIT-POLL-دىڭ الدىن الا ناتيجەلەرى جاريالانادى.
ينفوتەينمەنت فورماتىنداعى اۋقىمدى ونلاين مارافون قازاقستاندا تۇڭعىش رەت ۇيىمداستىرىلىپ وتىر.
«قازاقستان» تەلەراديوكورپوراتسياسى ونلاين مارافوننىڭ زاڭناماعا سايكەس وتكىزىلەتىنىن، ۇگىت-ناسيحات جۇمىستارى جۇرگىزىلمەيتىنىن حابارلايدى.
”ادىرنا” ۇلتتىق پورتالى
