3 ماۋسىم كۇنى پرەزيدەنت قاسىم-جومارت توقاەۆ 5 ماۋسىمدا وتەتىن رەفەرەندۋمعا قاتىستى قازاقستان حالقىنا ۇندەۋ جولداعان بولاتىن. ۇندەۋگە بايلانىستى “ادىرنا” ءتىلشىسى قوعام قايراتكەرى، ەكونوميست جانۇزاق اكىمنىڭ پىكىرىن ءبىلدى.
ايتۋىنشا، 30 جىلدا سەنبەگەن بيلىككە حالىق 30 كۇندە سەنە قويمايدى. الايدا بۇل رەفەرەندۋم قوعامنىڭ دامۋىنا ءبىر قادام العا جىلجۋ بولىپ تابىلادى.
“ازاماتتاردىڭ جارتىسى قولداپ، جارتىسى قولداماۋى مۇمكىن. “ونداي جاعدايدا نە بولادى؟” دەگەن سۇراق تۋىندايدى. سودان قوعامدا تۇسىنىسپەستىك، سەنبەۋشىلىك، نە داۋىس بەرگەننىڭ وزىندە ونى وزگەرتىپ جىبەرەدى دەگەن كۇدىك بولادى. سەنىم بولۋ ءۇشىن ءاربىر ۋچاسكىنىڭ تۇرعىندارى وزدەرى توپ قۇرىپ، تەرگەپ، داۋىستى ساناۋعا قاتىسۋ كەرەك. وعان قۇقىقتارى بار. بەلسەندى رەتىندە ارنايى رۇقسات قاعاز بەرىپ جاتقان الماتىدا قوعامدىق ۇيىمدار دا بار. ولار داۋىستاردى ساناپ، تەكسەرىپ، تۇگەل اياعىنا دەيىن جەتكىزۋ كەرەك”،- دەدى ول.
سونىمەن قاتار، قوعام قايراتكەرى قازاقستاندىقتاردى رەفەرەندۋمدا بەلسەندىلىك تانىتۋعا شاقىردى.
“پرەزيدەنتتىڭ ۇندەۋىن كوردىك. ول دۇرىس. ۇيدە وتىرماۋ كەرەك. بەلسەندىلىك تانىتۋ كەرەك. بۇل ەلدىڭ تاعدىرىن شەتتەن بىرەۋ كەلىپ نەمەسە تەك قانا بيلىك شەشە المايدى. بيلىك 30 جىل بويى شەشەم دەپ، شەشە الماي، اۆتوريتارلىق بيلىك بولىپ كەتتى. حالىق ءوز مۇددەسىن ءوزى شەشەمىن دەسە، ءوز مۇددەسىن، مەملەكەتتىڭ مۇددەسىن، ەلدىڭ، جەردىڭ، ءتىلدىڭ مۇددەسىن شەشەم دەسە، قالاي بولعاندا دا بەلسەندىلىك تانىتۋ كەرەك. بارىپ، داۋىس بەرۋ كەرەك. ول داۋىستى قولدايسىڭ با، قولدامايسىڭ با ءاربىر ازاماتتىڭ ءوزى بىلەدى. بىراق، داۋىس بەرۋ بورىشىمىز! ەگەر سەنىمسىزدىك بولماسىن دەسەك، ءبىز ءار ۋچاسكىنى تەكسەرۋىمىز كەرەك.
بۇل رەفەرەندۋم سوڭعى ەمەس، العاشقى دا ەمەس. ءار ماسەلەنى وسىنداي تۇپكىلىكتى رەفەرەندۋم ارقىلى شەشىپ وتىرۋىمىز كەرەك. ياعني حالىقپەن ساناسسا، حالىقپەن بيلىكتىڭ اراسىندا سەنىم پايدا بولادى. ءبىز ءوزىمىزدىڭ زاڭدى قۇقىمىزدى تۇگەلدەي پايدالانۋىمىز كەرەك. كۇرەسۋ كەرەك. قاڭتارداعىداي عيماراتتاردى ورتەپ، دۇكەندار توناۋ ارقىلى كۇرەسىپ ەمەس، وركەنيەت جولىمەن كۇرەسۋىمىز كەرەك”،- دەپ ويىن قورىتىندىلادى جانۇزاق اكىم.
”ادىرنا” ۇلتتىق پورتالى
