ەرتەڭ 5 ماۋسىم كۇنى قازاقستان ازاماتتارى اتا زاڭىمىزعا ەنگىزىلەتىن وزگەرتۋلەر مەن تولىقتىرۋلارعا قاتىستى تاعدىرشەشتى شەشىم قابىلدايدى. ال بۇگىن — تىنىشتىق كۇنى، دەپ حابارلايدى «ادىرنا» ۇلتتىق پورتالى «قازاقپاراتقا» سىلتەمە جاساپ.
«رەسپۋبليكالىق رەفەرەندۋم تۋرالى» كونستيتۋتسيالىق زاڭنىڭ 7-بابى 4-تارماعىنا سايكەس رەفەرەندۋم قارساڭىنداعى كۇن مەن رەفەرەندۋم وتەتىن كۇنى كەز كەلگەن ۇگىت جۇرگىزۋگە تىيىم سالىنادى. دەمەك، 4 جانە 5 ماۋسىمدا بۇقارالىق اقپارات قۇرالدارىندا، ونىڭ ىشىندە ينتەرنەتتە رەفەرەندۋم بويىنشا ۇگىت جۇرگىزۋگە بولمايدى.
اقپارات جانە قوعامدىق دامۋ مينيسترلىگىنىڭ تۇسىندىرۋىنشە، «ۇگىت» ۇعىمىنىڭ ءمانىن جانە مازمۇنىن نەگىزگە الا وتىرىپ، رەفەرەندۋمعا شىعارىلعان سۇراققا سايلاۋشىلاردى «كەلىسەمىن» نەمەسە «قارسىمىن» دەپ داۋىس بەرۋگە تۇرتكى بولاتىن ماتەريالدار ۇگىت ماتەريالدارى رەتىندە قاراستىرىلادى. بۇل رەتتە، اتالعان بۇزۋشىلىققا جول بەرگەن جەكە تۇلعالار دا، زاڭدى تۇلعالار دا، ونىڭ ىشىندە الەۋمەتتىك جەلىلەردى پايدالانۋشىلار دا اكىمشىلىك جاۋاپكەرشىلىككە تارتىلۋى مۇمكىن.
ينتەرنەت-رەسۋرستاردا بۇرىن جاريالانعان ۇگىت ماتەريالدار باستاپقى ورىندارىندا ساقتالۋىنا جول بەرىلەدى، ولاردى سايتتىڭ باستى بەتىندە شىعارۋعا تىيىم سالىنادى. سونداي-اق، رەفەرەندۋمدى وتكىزۋ كۇنى، شارتتارى، داۋىس بەرۋ ءتارتىبى، ونىڭ ىشىندە جارنامالىق باننەرلەر، رەفەرەندۋمعا دەيىنگى كۇندەردى كەرى ساناۋ جانە باسقا دا تۋرالى تۇسىندىرمە سيپاتتاعى بۇرىن جاريالانعان اقپاراتتىق ماتەريالدار ينتەرنەت-رەسۋرستار مەن تەلەارنالاردا ولاردىڭ باستاپقى ورىندارىندا ساقتالۋىنا جول بەرىلەدى.
قر باس پروكۋرورىنىڭ ورىنباسارى بولات دەمباەۆ ايتۋىنشا، ۇگىتكە تىيىم سالىنعان كەزەڭدە بۇل ءىس-شارالار جۇرگىزىلگەن جاعدايدا قر اكىمشىلىك قۇقىق بۇزۋشىلىق تۋرالى كودەكسىنىڭ (اقبتك) 102-بابى بويىنشا جاۋاپكەرشىلىك ەسكەرىلگەن.
«ەكى نەمەسە ودان دا كوپ رەت نەمەسە باسقا بىرەۋ ءۇشىن داۋىس بەرۋ، سونداي-اق ۋچاسكەلىك رەفەرەندۋم كوميسسياسى مۇشەسىنىڭ ازاماتتارعا وزگە ادامدار ءۇشىن داۋىس بەرۋگە مۇمكىندىك جاساۋ ماقساتىندا بيۋللەتەندەردى بەرۋ ارەكەتى اقبتك-ءنىڭ 108 جانە 110-باپتارى بويىنشا جاۋاپتىلىققا اكەپ سوعاتىنىنا دا نازار اۋدارامىز»، - دەيدى باس پروكۋروردىڭ ورىنباسارى.
«ادىرنا» ۇلتتىق پورتالى
