قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا بالالار جىلىن وتكىزۋ ماسەلەلەرى قارالدى. قر دەنساۋلىق ساقتاۋ ءمينيسترى اجار عينيات، مادەنيەت جانە سپورت ءمينيسترى داۋرەن اباەۆ، ءبىلىم جانە عىلىم ۆيتسە-ءمينيسترى شولپان كارينوۆا، قاراعاندى وبلىسىنىڭ اكىمى جەڭىس قاسىمبەك جانە اتىراۋ وبلىسىنىڭ اكىمى سەرىك شاپكەنوۆ بايانداما جاسادى، دەپ حابارلايدى «ادىرنا» ءتىلشىسى ۆەدومستۆونىڭ ءباسپاسوز قىزمەتىنە سىلتەمە جاساپ.
وتىرىس باسىندا ءاليحان سمايىلوۆ قازاقستاننىڭ كىشكەنتاي بالعىندارىن حالىقارالىق بالالاردى قورعاۋ كۇنىمەن قۇتتىقتادى. مەملەكەت باسشىسىنىڭ جارلىعىمەن 2022 جىل بالالار جىلى بولىپ جاريالاندى.
ءبىلىم جانە عىلىم مينيسترلىگىنىڭ دەرەكتەرىنە سايكەس، بالالار جىلىن وتكىزۋ جونىندەگى ءىس-شارالار جوسپارى 7 باعىت بويىنشا 66 ءىس-شارانى قامتيدى. ولار قاۋىپسىزدىك، دەنساۋلىق، ءبىلىم بەرۋ جانە بوس ۋاقىتتى ساپالى وتكىزۋگە باعىتتالعان.
بيىلعى 5 ايدا 2,5 ملن استام بالانىڭ قاتىسۋىمەن 17 300 وڭىرلىك ءىس-شارا وتكىزىلدى، بالالاردىڭ 59%-ى از قامتىلعان وتباسىدان شىققان.
بايانداماشىلاردى تىڭداعان پرەمەر-مينيستر بالالاردىڭ ءبىلىم الىپ، جان-جاقتى دامۋىنا، دەمالۋى مەن مەديتسينالىق قىزمەت الۋىنا جاعداي جاساۋ مەملەكەتتىڭ ماڭىزدى مىندەتى ەكەنىن اتاپ ءوتتى.
جىل سايىن ەلىمىزدە جۇزدەگەن مەكتەپ، بالاباقشا، مادەنيەت جانە سپورت نىساندارى سالىنادى – مۇنىڭ ءبارى بالالاردىڭ جان-جاقتى دامۋى ءۇشىن قاجەت.
ۇكىمەت باسشىسى بالالاردى قورعاۋ كۇنى قاشان دا جازعى ساۋىقتىرۋ كومپانياسىنىڭ باستاماسى بولعانىن اتاپ ءوتىپ، دەنساۋلىق ساقتاۋ مينيسترلىگىنە جاز مەزگىلىن بارىنشا ءتيىمدى پايدالانىپ، كەشەندى شارالاردى قابىلداۋدى تاپسىردى.
«ەڭ باستىسى – كوشەدە، سۋدا دەمالۋ كەزىندە، ءتۇرلى ەكسكۋرسيالاردا بالالارىمىزدىڭ قاۋىپسىزدىگىن قامتاماسىز ەتۋ. بالالار قاتىساتىن كەز كەلگەن ءىس-شارانى ۇيىمداستىرۋ، ەڭ الدىمەن، ولاردىڭ قاۋىپسىزدىگىنە كەپىلدىك بەرۋى ءتيىس»، — دەدى قر پرەمەر-ءمينيسترى.
وسىعان بايلانىستى سالالىق ۆەدومستۆولارعا ءتيىستى قىزمەتتەردىڭ جۇمىسىن جۇمىلدىرىپ، وقۋ ورىندارىن قاۋىپسىزدىك جۇيەسىمەن جاراقتاندىرۋ جانە جاڭعىرتۋ جۇمىستارىن جانداندىرۋ تاپسىرىلدى.
وعان قوسا، ءا. سمايىلوۆ وبلىس اكىمدىكتەرىنە الەۋمەتتىك جاعىنان از قامتىلعان ساناتتاعى بالالاردى ساۋىقتىرۋ شارالارىمەن، جازعى دەمالىسپەن جانە بوس ۋاقىتتارىن پايدالى وتكىزۋمەن بارىنشا قامتۋدى تاپسىردى. بارلىق اۋىلدىق ەلدى-مەكەندەردە سپورت الاڭدارىن، بالالاردى دامىتۋ ورتالىقتارىن جابدىقتاپ، ويىن-ساۋىق، مادەني ءىس-شارالار ۇيىمداستىرۋ قاجەت.
دەنساۋلىق ساقتاۋ بويىنشا شالعايداعى ەلدى-مەكەندەردە بالالاردىڭ دەنساۋلىق جاعدايىنا سكرينينگتىك جانە ستوماتولوگيالىق تەكسەرۋلەر جۇرگىزۋ ءۇشىن جىلجىمالى مەديتسينالىق پۋنكتتەردىڭ جۇمىس ىستەۋىنە قاتىستى شارالار قابىلدانۋى كەرەك.
ودان بولەك، بالالار قۇقىقتارىنىڭ ساقتالۋىن قامتاماسىز ەتۋ ءۇشىن ءوڭىر اكىمدىكتەرى جانىنداعى تاۋەلسىز بالا قۇقىقتارى جونىندەگى ۋاكىلدەردىڭ لاۋازىمدارىن ەنگىزۋدى تەزدەتۋ تاپسىرىلدى.
ىشكى ءتۋريزمدى دامىتۋ اياسىندا بالالار ءۇشىن ەكسكۋرسيالىق-تانىمدىق ءىس-شارالار ۇيىمداستىرۋ كەرەك.
بالالاردى ۇيىرمە جانە سەكتسيالارمەن قامتۋ ماقساتىندا مەملەكەتتىك ءبىلىم بەرۋ، سپورت جانە شىعارماشىلىق تاپسىرىستار بويىنشا اقپاراتتىق جۇيەلەر ينتەگراتسياسى قامتاماسىز ەتىلەدى. بۇل سەكتسيالار مەن ۇيىرمەلەردەگى ناقتى جاعدايدى كورۋگە، سونداي-اق ولاردىڭ قولجەتىمدىلىگىن ارتتىرۋعا مۇمكىندىك بەرەدى.
«قورىتا ايتقاندا، بارلىق ءوڭىر اكىمدەرىنە بالالار جىلىنا ارنالعان ءىس-شارالاردىڭ ورىندالۋىن جەكە باقىلاۋعا الۋدى تاپسىرامىن»، — دەپ تۇيىندەدى قر پرەمەر-ءمينيسترى.
